काठमाडौं- नेकपा (एमाले)का वरिष्ठ नेता माधवकुमार नेपाल पक्षका नेता एवं विघटित प्रतिनिधि सभाका सदस्य मेटमणि चाैधरीले नेपाली कांग्रेसका सभापति शेरबहादुर देउवालाई प्रधानमन्त्री बनाउन भनेर गरिएको हस्ताक्षर कुनै हालतमा फिर्ता नलिने बताएका छन्। उनले संविधान रक्षाका लागि हस्ताक्षर गरिएको भन्दै कुनै हालतमा फिर्ता नहुने नेपाल लाइभसँग बताए।
शुक्रबार प्रधानमन्त्रीनिवास बालुवाटारमा बसेको एमाले केन्द्रीय कमिटी बैठकले देउवाका पक्षमा गरेको हस्ताक्षर फिर्ता लिन नेपाल पक्षका २३ जनै नेताहरूलाई तीन दिनको समयसीमा दिएको छ। यसअघि नेपाल पक्षका केही नेताहरूले समेत त्यो निर्णयको कुनै अर्थ नभएको र ओलीले एमाले एकताको 'च्याप्टर क्लोज' गरेको प्रतिक्रिया दिएका छन्।
नेपाल पक्षीय नेता चाैधरीले पनि बालुवाटारको 'धम्की र अल्टिमेटम'को कुनै महत्व नहुने बताए। यस्तो छ उनले नेपाल लाइभलाई दिएको प्रतिक्रिया :
प्रधानमन्त्रीको सरकारी निवास बालुवाटारमा बसेको ओली गुटको बैठकले केन्द्रीय कमिटीको सदस्यहरूलाई दिएको अल्टिमेटम पुन: पानीको फोका सावित हुनेछ। जाल, झेल, षडयन्त्र मात्रै गर्न जानेको ओली गुट आफैंमा अवैध छ। अवैध गुटले गरेको धम्की र अल्टिमेटमले कुनै महत्व राख्दैन।
नैतिकता र आचरण समेत गुमाएको गुट नेपालको कम्युनिष्ट आन्दोलन, राष्ट्रको प्रणाली, संविधान, कानुन नै समाप्त गर्ने अभियानमा लागिसकेको छ। राष्ट्रवादको नारा पुरै नाङ्गो भइसकेको छ। पटक-पटक प्रतिनिधि सभा भंग गरेर नेपाली जनताको मतको अवमूल्यन गरेको छ भने सर्वाेच्च अदालतप्रति समेत अवहेलना गरेको छ।
नेपालको प्रणाली नै खारेज गरेर निरंकुश र तानाशाही शासक बन्ने चिन्तनकासाथ अघि बढेको ओली सरकार नेपाली जनताको नजरमा पुरै गिरिसकेको छ। तर पनि आफूलाई कम्युनिष्ट सरकार भन्दै नेपाली जनताका आँखामा छारो हाल्ने र भ्रम सिर्जना गर्ने काम गरिरहेको छ।
कम्युनिस्ट पार्टीको बीचमा एकता नहोस् भनेर अनेक षड्यन्त्र गरिएका छन्। दुई ठूला कम्युनिस्ट पार्टीको बीचमा भएको एकतालाई भाँड्नका लागि भएजति सबै काम गरे। सग्लो नेकपा एमाले हुन नसकोस् भनेर हतार हतार बैठक बसेर नेकपा एमालेको पदाधिकारी भंग गर्नेदेखि लिएर प्रदेशको इन्जार्जहरू हटाएको र सबै प्रदेशमा आफनो गुट र झोलिका मान्छे मात्रै राखेको, नेकपा एमालेको सदस्य समेत नभएकाहरूलाई केन्द्रीय कमिटीको सदस्य बनाएको, आफूभन्दा सिनियर नेताहरूलाई कारबाही गरी नेकपा एमालेलाई विभाजन गरेको सबैले देखेकै छन्। सार्वजनिक कार्यक्रममा मनमरी बोलेर एकता हुनै थालेको नेकपा एमालेलाई विभाजनको लागि मलजल गर्ने काम ओलीबाट भएको हो। नजानेर होइन, जानी जानी योजनावद्ध तरिकाले यी सबै कार्यहरू भइरहेको महसुस भइरहेको छ। ओली कम्युनिष्ट आन्दोलनलाई विखण्डन गरेर पुँजीवादको अगाडि घुँडा टेकेर लम्पसार भइसकेका छन्।
जबसम्म ओलीले आफूले गरेको अपराधको विषयमा नेपाली जनता र कम्युनिष्ट कार्यकर्ताहरूसँग माफी माग्दैनन् तबसम्म ओली गुटसँग एकता हुँदैन। जहाँसम्म सर्वाेच्च अदालतमा गरिएको हस्ताक्षरको कुरा छ- त्यो कुनै पनि हालतमा फिर्ता हुँदैन। किनकी त्यो हस्ताक्षर ओलीको असंवैधानिक कदम विरुद्धको कदम हो। नेपालको प्रणाली जोगाउनका लागि, संविधान र कानुनको रक्षाका लागि गरिएको पवित्र कार्य हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
