काठमाडौं- प्रधानमन्त्री केपी शर्मा ओलीको क्याबिनेटमा अहिले उनीबाहेक चार मन्त्री छन्। सर्वोच्च अदालतले ओलीले गरेको मन्त्रिपरिषद् पुनर्गठन र विस्तारलाई खारेज गरेपछि एकैपटक २० मन्त्रीले पदबाट हात धुनु पर्यो। तर, त्यसको भार अहिले ओली क्याबिनेटका चार मन्त्रीमाथि थोपरिएको छ। सर्वोच्चको आदेशपछि ओलीले क्याबिनेटमा बाँकी रहेका चार मन्त्रीलाई नै थप मन्त्रालयहरूको जिम्मेवारी दिएका छन्।
गत असार ८ गते सर्वोच्च अदालतले कामचलाउ प्रधानमन्त्रीलाई मन्त्रिपरिषद् विस्तार गर्ने अधिकार नभएको भन्दै प्रधानमन्त्रीको निर्णय बदर गर्दा जसपाबाट मन्त्री बनेका ११ र एमालेबाट मन्त्री बनेका ९ जना बाहिरिएका थिए।
प्रधानमन्त्री ओलीले रक्षा र परराष्ट्र मन्त्रालय आफैंले राखेका छन् भने बाँकी १९ मन्त्रालयमध्ये विष्णु पौडेलले अर्थसहित चार मन्त्रालय, कृष्णगोपाल श्रेष्ठ, बसन्त नेम्वाङ र लिलानाथ श्रेष्ठले ५/५ मन्त्रालयको अतिरिक्त जिम्मेवारी सम्हालेका छन्।
एउटै मन्त्रीलाई पाँचवटा मन्त्रालयको जिम्मेवारी बोक्नुपर्ने भएकाले उनीहरूलाई भ्याइनभ्याइ हुन थालेको छ। अहिले एउटा मन्त्रीले पाँच वटासम्म मन्त्रालयको जिम्मेवारी सम्हाल्नु परेपछि उनीहरू पाँच दिनमै दिक्क मान्न थालेका छन्।
प्रतिनिधि सभा विघटन मुद्दामा सर्वोच्च अदालतको फैसला आएपछि राजनीतिक परिवेश फेरिने भएकाले त्यो समयसम्मका लागि पर्खेर बस्नुपर्ने बाध्यता रहेको मन्त्रीहरूले निकटस्थहरूलाई सुनाउने गरेका छन्। सबै मन्त्रालयमा समय दिनुपर्ने बाध्यता भएपछि मन्त्रीहरूले कार्यतालिका नै बदलेका छन्।
विष्णु पौडेल : गृहमा दैनिक एक घण्टा, उद्योग र ऊर्जामा आलोपालो दिन
अर्थमन्त्री विष्णुप्रसाद पौडेलको भागमा चार मन्त्रालय छन्। अर्थको अतिरिक्त गृह, उद्योग, वाणिज्य तथा आपूर्ति र ऊर्जा जलस्रोत तथा सिचाई मन्त्रालयको जिम्मेवारी पनि पौडेललाई छ।
तर, उनी प्रायः अर्थ मन्त्रालयमै रहने उनका स्वकीय सचिव यमप्रसाद पाण्डेले बताए। गृह मन्त्रालय शान्ति सुरक्षासँग जोडिएको संवेदनशील मन्त्रालय भएकाले दैनिक एक घण्टा पुग्ने गरेको उनले बताए।
उद्योग वाणिज्य तथा आपूर्ति र ऊर्जा, जलस्रोत तथा सिचाई मन्त्रालयमा एकदिन बिराएर पुग्ने गरेका छन्। ‘मन्त्रीज्यूलाई चार मन्त्रालयको जिम्मेवारी थपिएपछि सबै मन्त्रालयमा एकसरो पुगेर कार्यभार सम्हाल्नुभयो। त्यसपछि चार मन्त्रालयमा मन्त्रीज्यू जाने कार्यतालिका बनाएका छौं। गृहमा दैनिक एक घण्टा, उद्योग र ऊर्जामा एक दिन बिराएर पुग्नु हुन्छ’, पाण्डेले भने, ‘अरु समय अर्थ मन्त्रालयमा बिताउनु हुन्छ। त्यहीँ बसेर काम गर्नुहुन्छ। तीन मन्त्रालयका सचिवज्यूले मन्त्रीज्यूलाई दैनिक ब्रिफिङ गर्नुहुन्छ।’
पौडेललाई चार मन्त्रालयको जिम्मेवारी परेपछि प्रायः बिहान ९ बजेदेखि बेलुका ७ बजेसम्म सिंहदरबारमै हुने गरेको उनको सचिवालयले जनाएको छ।
बसन्त नेम्वाङ : बार मिलाएर मन्त्रालयमा हाजिर
भौतिक पूर्वाधार तथा यातायातमन्त्री बसन्त नेम्वाङलाई पाँच मन्त्रालयको जिम्मेवारी छ। जसमा सञ्चार तथा सूचना प्रविधि, कृषि तथा पशुपंक्षी विकास, खानेपानी र शहरी विकास मन्त्रालय छन्।
प्रायः बिहान १० बजेदेखि १ बजेसम्म नेम्वाङ भौतिक मन्त्रालयमा बस्ने गरेपनि चार घण्टा चार मन्त्रालयमा कार्यतालिका बनाएर बिताउने गरेका छन्। आइतबार, मंगलबार र बिहीबार दिउँसो १ बजेदेखि ३ बजेसम्म खानेपानी मन्त्रालयमा बस्ने गरेका छन्। सोही बार दिउँसो ३ बजेदेखि ५ बजेसम्म सञ्चार मन्त्रालयमा बस्ने गरेका छन्।
यस्तै, सोमबार, बुधबार र शुक्रबार दिउँसो १ बजेदेखि ३ बजेसम्म शहरी विकास मन्त्रालयमा बस्ने गरेका छन्। सोही बार दिउँसो ३ बजेदेखि ५ बजेसम्म कृषि मन्त्रालयमा बिताउने गरेका छन्। सबै मन्त्रालयलाई उत्तिकै महत्त्वपूर्ण ठानेर समय दिएको मन्त्री नेम्वाङको सचिवालयले जनाएको छ।
लिलानाथ श्रेष्ठ : कानुन बाहेक अरु मन्त्रालयमा दैनिक २ घण्टा
कानुन, न्याय तथा संसदीय मामिलामन्त्री लिलानाथ श्रेष्ठले पनि पाँच मन्त्रालयको जिम्मेवारी सम्हाल्दै आएका छन्। जसमा संस्कृति, पर्यटन तथा नागरिक उड्यन, भूमि व्यवस्था, सहकारी तथा गरिबी निवारण, महिला बालबालिका तथा जेष्ठ नागरिक, संघीय मामिला तथा सामान्य प्रशासन छन्। श्रेष्ठ बिहान प्रायः ९ बजे कानुन मन्त्रालय पुगेपछि कार्यतालिका बमोजिम अन्य मन्त्रालयमा पुग्ने गरेका छन्।
आइतबार, मंगलबार, बिहीबार श्रेष्ठ सामान्य प्रशासन र भूमि मन्त्रालय पुग्ने गरेका छन्। सोमबार, बुधबार र शुक्रबार पर्यटन र महिला बालबालिका मन्त्रालयमा पुग्ने गरेका छन्।
कानुन मन्त्रालय बाहेक अरु चार मन्त्रालयमा २ घण्टाको दरमा मन्त्रालयमा बस्ने गरेको उनको सचिवालयले जनाएको छ। एउटा मन्त्रालयमा कामको चाप हेरेर दैनिक २ घण्टाको दरले बस्ने कार्यतालिका बनाएका छन्। अरु दिन दैनिक ३ बजेदेखि भेटघाटका लागि कानुन मन्त्रालयमै व्यवस्था गरिएको छ। एउटै मन्त्रीले पाँच मन्त्रालयको जिम्मेवारी हेर्न नसक्ने भएकाले दीर्घकालीन असर पर्ने काम नगर्न सचिवहरुलाई निर्देशन दिएका छन्।
कृष्णगोपाल श्रेष्ठ : प्राथमिकतामा शिक्षा र स्वास्थ्य मन्त्रालय
शिक्षा, विज्ञान तथा प्रविधिमन्त्री कृष्णगोपाल श्रेष्ठलाई पनि पाँच मन्त्रालयको जिम्मेवारी छ। जसमा वन तथा वातावरण, युवा तथा खेलकुद, श्रम, रोजगार तथा सामाजिक सुरक्षा र स्वास्थ्य तथा जनसंख्या मन्त्रालय छन्। तर, उनको बढी प्राथमिकता शिक्षा र स्वास्थ्य मन्त्रालयमा छ।
‘मन्त्रीज्यूलाई पाँच मन्त्रालयको जिम्मेवारी लिनु पर्ने बाध्यता भएपछि एकपटक सबै मन्त्रालयमा पुगेर कार्यभार सम्हाल्नु भयो’, श्रेष्ठका प्रेस संयोजक ईश्वरराज ढकालले भने, ‘खेलकुद र वन मन्त्रालय त्यसपछि काम परे मात्रै जानु हुन्छ। नभए शिक्षा र स्वास्थ्य मन्त्रालयमा नियमित बराबर समय दिनु भएको छ।’
कोरोना महामारीमा शिक्षा र स्वास्थ्य सबैभन्दा धेरै प्राथमिकता परेकाले दुई मन्त्रालयमा नियमित जाने गरेको ढकालले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
