काठमाडौं– कोरोना रोगथाम तथा नियन्त्रणका लागि भन्दै देशका अधिकांश ठाउँमा निषेधाज्ञा जारी भएको झन्डै ६० दिन पुगेको छ। संक्रमण घटेको भन्दै अहिले विस्तारै निषेधाज्ञा खुकुलो बनाउँदै लगिएको छ।
निषेधाज्ञाकै बीचमा अख्तियार दुरुपयोग अनुसन्धान आयोगले ७ जनाविरुद्ध झन्डै १ अर्ब ३८ लाख रुपैयाँ बिगो दाबी गर्दै भष्ट्रचार मुद्दा दायर गरेको छ।
यो बीचमा अख्तियारले सबैभन्दा ठूलो रकम भष्ट्रचार गरेको भन्दै कर फर्छ्यौट आयोग, २०७१ का पदाधिकारी चूडामणि शर्मा ढकाल (तत्कालीन महानिर्देशक आन्तरिक राजस्व विभाग) समेत ३ जनाविरुद्ध भ्रष्टाचार मुद्दा दायर गरेको छ। कर फर्छ्यौट आयोग, २०७१ का अध्यक्ष अध्यक्ष लुँम्बध्वज महत तथा सदस्य चूडामणि शर्मा ढकाल र उमेशप्रसाद ढकालले १ अर्ब ३३ लाख २० हजार ३ सय ८५ रुपैयाँ राजस्व चुहावट गरी भष्ट्रचार गरेको आरोपमा अख्तियारले असार ९ गते विशेष अदालत काठमाडौंमा मुद्दा दायर गरेको हो।
महत, शर्मा र ढकालले कर फर्छ्यौट आयोग ऐन २०३३ ले दिएको अधिकार क्षेत्र बाहिर गई बद्नियतपूर्वक करदातासँग कर फर्छ्यौट सम्झौता गरी सरकारलाई प्राप्त हुने ठूलो मात्राको रावस्व रकम चुहावट गरेको अख्तियारको आरोप पत्रमा उल्लेख छ। अख्तियारले उनीहरुविरुद्ध १ अर्ब ३३ लाख २० हजार ३ सय ८५ रुपैयाँ बिगो तथा जरिवाना असुली र ८ देखि १० वर्षसम्म कैद सजायको समेत मागदाबी गरेको छ।
अख्तियारले आइतबार (असार १३ गते) मात्रै इलाका प्रहरी कार्यालय सीतागञ्ज सुनसरीमा कार्यरत प्रहरी जवान कासिन्दर यादवविरुद्ध ६० हजार रुपैयाँ बिगो कायम गरी विशेष अदालतमा भ्रष्टाचार मुद्धा दायर गरेको छ।
यादवले इलाका प्रहरी कार्यालय सीतागञ्जमा परेको उजुरी मिलाइदिने प्रयोजनका लागि सेवाग्राहीसँग रिसवत लिएका अख्तियारले जानकारी दिएको छ। पूर्व सूचना एवं उजुरी निवेदनका आधारमा अख्तियार दुरुपयोग अनुसन्धान आयोगको इटहरीस्थित कार्यालयबाट खटिएको टोलीले प्रहरी जवान यादवलाई घुस रकमसहित नियन्त्रणमा लिएको थियो।
यस्तै, असार १० गते आन्तरिक राजस्व कार्यालय जनकपुरधाम धनुषाका कर अधिकृत रमेश ढकालविरुद्ध १ लाख ५० हजार रूपैयाँ बिगो कायम गरी भ्रष्टाचार भ्रष्टाचार मुद्धा दायर गरिएको अख्तियारले जानकारी दिएको छ। ढकालले सेवाग्राहीसँग अन्तशुल्क समायोजनको रकम फिर्ता गर्ने प्रयोजनको लागि घुस रकम लिएको अख्तियारको दाबी छ। पूर्व सूचना एवं उजुरी निवेदनका आधारमा अख्तियार दुरुपयोग अनुसन्धान आयोगको बर्दिवासस्थित कार्यालयबाट खटिएको टोलीले सेवाग्राहीबाट १ लाख ५० हजार रूपैयाँ घुसररिसवत रकम लिएको अवस्थामा ढकाललाई नियन्त्रणमा लिएको थियो।
अख्तियारले असार ६ गते धादिङको निलकण्ठ सब–डिभिजन वन कार्यालयका सहायक वन अधिकृत आठौं तह (कार्यालय प्रमुख) कृष्ण प्रसाद पौडेललार्इ ४० हजार रूपैयाँ घुस रकमसहित नियन्त्रण लिएको थियो। अहिले उनीमाथि अनुसन्धान भइरहेको र मुद्धा दर्ता भने भइनसकेको अख्तियारले जानकारी दिएको छ।
अख्तियारले बाराको जीतपुर सिमरा उपमहानगरपालिकाका तत्कालीन गाबिस सचिव बिजयकान्त झाविरूद्ध २ लाख ८२ हजार ७ सय ३५ रूपैयाँ भष्ट्रचार गरेको भन्दै जेठ ३० गते काठमाडौं विशेष अदालतमा मुद्धा दर्ता गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
