फाइल तस्वीर
काठमाडौं– देशभर मनसुनी वायुको प्रभावका कारण धेरै ठाउँमा अहिले वर्षा भइरहेको छ। काठमाडौं उपत्यकामा पनि शनिबार बिहानैदेखि वर्षा भइरहेको छ।
बिहानैदेखि मुसलधारे वर्षा भइरहे पनि उपत्यकाका बागमती लगायत नदीको सफाइ अभियान भने रोकिएन। बागमती सफाइ महाअभियानको ४२४औँ हप्तामा पशुपति र शङ्खमूल क्षेत्रमा सफाइ गरिएको छ। पशुपति क्षेत्रमा अधिकार सम्पन्न बागमती सभ्यता एकीकृत विकास समितिका सञ्चालक सदस्य डा माला खरेलको नेतृत्वमा तीन अभियानकर्मीले सफाइ गरेका छन्।
सफाइमा काठमाडौं महानगरपालिका–९ का सदस्य टेकराज अधिकारी र अभियानकर्मी दुर्गा रावल सहभागी भएका थिए। पशुपति क्षेत्रको बागमती किनारमा सफाइका क्रममा नदी सफा देखिए पनि किनारमा फोहोर भेटिएको अभियानकर्मीले जनाएका छन्।
यसैगरी शङ्खमूल क्षेत्रमा अभियानकर्मी डा लक्ष्मी पौडेलको नेतृत्वमा सफाइ गरिएको छ। यस क्षेत्रमा नदी किनारमा जम्मा भएको फोहोर सफा गरिएको जनाइएको छ।
विष्णुमती सफाइ अभियानको ३५७औँ हप्तामा टोखा नगरपालिका–९ स्थित आनन्द पुलबाट दक्षिणतर्फको क्षेत्रमा सफाइ गरिएको छ। त्यस क्षेत्रमा १४ शिरीष र पैंयुँका बिरुवासमेत रोपिएको सफाइ संयोजक शोभाकान्त पाण्डेले जानकारी दिए।
यसैगरी काठमाडौं उपत्यकामा गुह्येश्वरीमाथिको बागमती, रुद्रमती, विष्णुमतीको माथिल्लो भाग, मनोहरा, गोदावरी खोला, चक्रपथको उत्तर र पश्चिमी खण्डलगायत स्थानमा पनि भौतिक दूरी कायम गरी स्वास्थ्य सुरक्षाका मापदण्ड पूरा गरेर सफाइ अभियानलाई निरन्तरता दिइएको छ।
कोरोनाबाट बच्न सफाइ एवं भौतिक दूरी कायम गर्नु नै सबैभन्दा राम्रो उपचार हो भन्ने चेतना जगाएर धेरै स्थानमा सफाइ अभियानले जागरण फैलाएको जनाइएको छ। निषेधाज्ञाका कारण सफाइ अभियानका लागि नदी किनारमा जान नसकेका अभियानकर्मीले यस्तो जागरण फैलाउन सहयोग गरेका हुन्।
विसं २०७० जेठ ५ गतेदेखि शुरु भएको बागमती सफाइ महाअभियानले यसका सहायक नदी सफाइ गर्नसमेत जागरुक बनाएको छ। काठमाडौं उपत्यकामा बागमतीका सहायक नदीझैँ चक्रपथका विभिन्न क्षेत्रमा गरी २० स्थानमा सफाइ भइरहेको छ।
यसैगरी उपत्यकाबाहिर मुख्य शहर, नदी र सांस्कृतिक सम्पदास्थलमा सफाइ भइरहेको छ। उपत्यका र बाहिर गरी हाल १०७ स्थानमा सफाइ भइरहेको जनाइएको छ। बागमती सफाइ महाअभियान शुरु भएदेखि प्रत्येक हप्ता शनिबार निरन्तर जारी छ। जाडो, गर्मी, वर्षा, चाडपर्व, भूकम्प, नाकाबन्दी कोरोना महामारीजस्ता प्रतिकूल अवस्थामा पनि सफाइ निरन्तर छ।
‘हप्तामा दुई घण्टा देश सेवाका लागि स्वयंसेवा’ भन्ने नाराका साथ अभियानकर्मी नदी किनारमा उत्रने गरेका छन्। नयाँ भेरियन्ट सहितको कोरोनाबाट बच्न जारी बन्दाबन्दीका बेला भने नदी किनार नजीकै निवास भएका अभियानकर्मीले सफाइ महाअभियानलाई निरन्तरता दिएका छन्। अन्य अभियानकर्मीले भने घर टोलअघिको सफाइलाई निरन्तरता दिएका महाअभियानले जनाएको छ।
सफाइसँगै उपत्यकाका विभिन्न स्थानका नदी किनारमा रोपिएका बिरुवाको गोडमेलसमेत गरिएको छ। वर्षा लागेसँगै नदी किनारमा बिरुवा, गुर्जोलगायत वनस्पतिको रोपण अभियान पनि तीव्र भएको छ। राससको सहयोगमा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
