काठमाडौं- संवैधानिक व्यवस्था अनुसार स्थानीय तहले असार १० गतेभित्रै आगामी आर्थिक वर्षको बजेट ल्याउनु पर्छ। सोही अनुसार अधिकांश स्थानीय तहले आगामी आर्थिक वर्षको बजेट नगर सभामा/गाउँ सभामा पेस गरिसकेका छन्।
सोही अनुसार देशभरका ६ वटा महानगरपालिकामध्ये ५ वटा महानगरपालिकाले असार १० गते नै आगामी आर्थिक वर्ष २०७८/७९को बजेट नगर सभामा पेस गरे। तर, ललितपुर महानगरपालिकाले भने असार १० गते नै बजेट नगर सभामा पेस गर्न सकेन। ललितपुरमा सत्ता पक्ष र विपक्षीबीच सहमति हुन नसक्दा बजेट आउन सकेको छैन।
ललितपुर महानगरपालिकामा मेयर कांग्रेसका चिरिबाबु मर्हजन छन्। कांग्रेसको नगर सभामा बहुमत छैन। एमाललेका जनप्रतिनिधिले नगर परिषद्को बैठकमा बजेट पास गर्न नदिएपछि बजेट रोकिएको हो। अब कानुन अनुसार नै ३ दिनभित्र बजेट ल्याउने तयारी महानगरपालिकाले गरेको छ।
सबै महानगरपालिकाले कोभिड रोकथाम तथा नियन्त्रणलाई पहिलो प्राथमितामा राखेका छन्। कोभिडलाई प्राथमिकतामा राखेर बजेट ल्याइएको काठमाडौं महानगरपालिका प्रवक्ता ईश्वरमान डंगोलले जानकारी दिए।
महानगरले कोभिडका कारण प्रवाभित उद्योग, व्यवसायी र सर्वसाधरणलाई राहत हुने गरी बजेट ल्याएको छ। यसबाहेक महानगरले निर्माण भइरहेको आयोजनाको काम सम्पन्न गर्ने लक्ष्य समेत लिएको उनको भनाइ छ।
महानगरले कूल १८ अर्ब ९५ करोड रुपैयाँ बराबरको बजेट ल्याएको छ। महानगरपालिकाहरुमध्ये काठमाडौंले ल्याएको बजेट सबैभन्दा बढी हो।
यसैगरी, भरतपुर महानगरपालिकाले किसानलाई दूधमा दिँदै अएको प्रतिलिटर १ रुपैयाँ अनुदानलाई बढाएर ३ रुपैयाँ दिने गरी ४ अर्ब ८१ करोड रुपैयाँको बजेट ल्याएको छ।
भरतपुर महानगरपालिकाले कोभिडका कारण ज्यान गुमाएकाको दाससंस्कार गर्न आवश्यक दाउरामा ३ हजार र शव गाड्नेको हकमा आवश्यक सहयोग गर्ने भएको छ।
यसैगरी, पोखरा महानगरपालिकाले ६ अर्ब २७ करोड रुपैयाँको बजेट ल्याएको छ। वीरगञ्ज महानगरपालिकाले ३ अर्ब ५५ करोड र विराटनगर महानगरपालिकाले ४ अर्ब १० करोड रुपैयाँ बराबरको बजेट ल्याउको छ।
संघ सरकारले आगामी आर्थिक वर्ष २०७८/७९ को बजेटमार्फत् ६ महागरपालिकालाई १० अर्ब ९ करोड २८ लाख रुपैयाँ बजेट विनियोजन गरेको थियो।
अन्तर–सरकारी वित्तीय हस्तान्तरण अनुसार ६ वटा महानगरपालिकालाई समानीकरण अनुदान, सर्शत अनुदान, विशेष अनुदान, समपुरक अनुदान तथा चालु र पूँजी खर्च समेत गरी संघबाट १० अर्ब ९ करोड २८ लाख रुपैयाँ बजेट गएको थियो।
जसमा नेकपा एमालेका तर्फबाट निर्वाचित मेयर भएको महानगरपालिकामा सबैभन्दा बढी बजेट गएको थियो। पोखरा महानगरपालिकाका लागि सबैभन्दा बढी बजेट गएको हो। पोखराका लागि २ अर्ब ५६ करोड १६ लाख संघबाट गएको छ।
यसैगरी, दोस्रो बढी काठमाडौं महानगरपालिका लागि २ अर्ब १ करोड ३७ लाख र तेस्रो भरतपुर महानगरपालिका लागि १ अर्ब ६४ करोड २८ लाख रूपैयाँ बजेट गएको छ।
यसैगरी, वीरगञ्ज महानगरपालिका लागि १ अर्ब ४५ करोड ४० लाख, ललितपुर महानगरपालिका १ अर्ब २२ करोड ५४ लाख र विराटनगर महानगरपालिका लागि १ अर्ब १९ करोड ५३ लाख संघ सरकारबाट गएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
