काठमाडौं– मनसुन सक्रिय भएपछि जारी अविरल वर्षासँगको बाढी र पहिरोले देशका विभिन्न ठाउँमा जनधनको क्षति भएको छ।
प्रहरी प्रधान कार्यालयका अनुसार अविरल वर्षाका कारण ३३ जिल्लाका ९९ ठाउँमा बाढी पहिरो लगायतका घटना घटेका छन्। सोमबार यता मात्रै बाढीले बगाउँदा ७ जनाको मृत्यु भएको छ भने १४ जना अझै बेपत्ता छन्।
मौसम पूर्वानुमान महाशाखाले अझै शुक्रबारसम्मै भारी वर्षाको सम्भावना रहेको जनाएको छ।
देशका धेरै ठाउँमा अझै भारी वर्षा हुने आकलन गरिएपछि नेपाल प्रहरीले विपत् प्रतिकार्यका लागि विशेष संरचना नै तयार गरेको छ।
नेपाल प्रहरीका प्रवक्ता प्रहरी वरीष्ठ उपरीक्षक (एसएसपी) बसन्त बहादुर कुँवरले देशका सबै प्रहरी कार्यालयमा विपत् प्रतिकार्यका लागि ‘स्पेसीफाइड युनिट’ बनाइएको जानकारी दिए।
प्रहरी प्रधान कार्यालयसहित देशभरका सबै युनिटहरुमा गरी १० हजार जनालाई विपत् प्रतिकार्यका लागि तयारी अवस्थामा राखिएको प्रवक्ता कुँवरले नेपाल लाइभलाई जानकारी दिए।
‘प्रहरी चौकीदेखि हेडक्वार्टर (प्रधान कार्यालय)सम्म युनिटहरु बनाइएको छ,’ प्रहरी प्रवक्ता कुँवरले भने, ‘यो युनिटले विपत्का घटनाको पूर्वानुमान गर्ने, सूचना संकलन गर्ने र प्रारम्भिक रेस्पोन्स गर्ने काम गर्छ ।’
प्रवक्ता कुँवरका अनुसार विपत् प्रतिकार्यका लागि हरेक प्रहरी चौकीमा ४ जनाको युनिट बनाइएको छ। यस्तै, हरेक इलाका प्रहरी कार्यालयहरुमा ७, जिल्ला प्रहरी कार्यालयहरुमा १५ जनाको युनिट बनाइएको छ। काठमाडौं उपत्यकामा हरेक प्रहरी परिसरमा ३० जना तथा मातहतका बृत्त, प्रभाग र पोस्टहरुमा आवश्यकताअनुसार जनशक्तिको विपत् प्रतिकार्य युनिट बनाइएको छ।
यस्तै, हरेक संघीय प्रहरी इकाइ र प्रदेश प्रहरी कार्यालयमा पनि ३०–३० जनाको विपत् प्रतिकार्य युनिट बनाइएको छ। सबै १४ वटा गणहरुमा १२५ जनाको युनिट बनाइएको प्रवक्ता कुँवरले जानकारी दिए।
प्रहरी प्रधान कार्यालय मातहतका ६ वटा इकाइहरुमा ५०–५० जना जनशक्तिको विपत् प्रतिकार्य युनिट बनाइएको प्रवक्ता कुँवरले जानकारी दिए।
विपत् प्रतिकार्यका लागि छुट्टै युनिट बनाइए पनि आवश्यकताअनुसार थप जनशक्ति पनि परिचालन गरिने प्रहरी प्रवक्ता कुँवरले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
