काठमाडौं- देशका विभिन्न भागमा वर्षासँगै बाढी पहिरोले ठूलो भौतिक तथा मानवीय क्षति पुर्याएको छ। सिन्धुपाल्चोकको मेलम्ची र इन्द्रवती नदीमा आएको बाढीले धनजनको क्षति भएको छ भने देशका अन्य स्थानका नदीहरुमा बाढी आएको छ।
बुधबार कालिगण्डकी, भेरी, पश्चिम राप्ती, तिनाउ, बबई लगायत गण्डकी, लुम्बिनी, कर्णाली र सुदूरपश्चिम प्रदेशको मध्यपहाडी, तराई र चुरेको भू-भाग भएर बहने साना नदीमा बहाव बढ्नसक्ने र केहिमा आकस्मिक बहावका कारण सतर्कता तह पुग्ने पूर्वानुमान रहेकोले साना नदी तटिय क्षेत्रमा विशेष सावधानी अपनाउन जल तथा मौसम विज्ञान विभाग अन्तर्गतको बाढी पूर्वानुमान महाशाखाले आग्रह गरेको छ।
महाशाखाका अनुसार आज कोशी र यसका सहायक नदीमा बहाब सामान्य रहने रहने भएपनि नारायणी, कर्णाली र महाकाली जलाधारका केहि स-साना सहायक नदीमा क्षणिक मध्यम/भारी वर्षा भई बहाब बढ्ने र केही स-साना नदीमा आकस्मिक बहाब भई सतर्कता तह आसपास पन सक्ने पूर्वानुमान छ।
त्यस्तै कन्काई र यसका सहायक नदीमा बहाब सामान्य घटबढ हुने, कमला, बागमती. पूर्वी राप्ती लगायतमा बहाब बढ़ने सम्भावना रेहेको छ। पश्चिम राप्ती, तिनाउ, बबईका स-साना नदी जलाधारमा बहाब बढ्ने र केहीमा सतर्कता तह पुग्न सक्ने पूर्वानुमान छ।
आज कालिगण्डकी, भेरी र यसका सहायक नदीजलाधार लगायत बागमती प्रदेशको रसुवा, सिन्धुपाल्चोक, काठमाडौं, चितवन, मकवानपुर, गण्डकी प्रदेशको गोरखा, मनाङ, लमजुङ, कास्की, पर्वत, बागलुङ, म्याग्दी, तनहुँ, स्याङ्गजा, नबलपुर, लुम्बिनी प्ररेशको परासी, पाल्पा, कपिलवस्तु, अर्घाखाँची, गुल्मी, प्यूठान, दाङ, बाँके, बर्दिया, रुकुम, कर्णाली प्रदेशको सुर्खेत, सल्यान, दैलेख, जाजरकोट, सुदूरपश्चिम प्रदेशको कञ्चनपुर, कैलाली, डडेल्धुरा, डोटी, अछाम, बाजुरा, बझाङ, दार्चुला र आसपास जिल्ला भई बहने स-साना नदीजलाधारमा बहाब उल्लेख्य बढ्ने र केहीमा आकस्मिक बहाब भई सतर्कता आसपास पुग्ने पूर्वानुमान बाढी महाशाखाको छ।
आज बिहानको मापन अनुसार नारायणी र यसका सहायक नदीमा बहाब सतर्कता तह आसपास रहेको छ। हिजो बेलुकी सिन्धुपाल्चोकको जलबिरेस्थित बलेफी खोला जलमापन केन्द्रमा अकस्मात् जलसतह बढी खतरा तह पार गरेकोमा अहिले जलसतह घट्दो क्रममा रहेको बाढी पूर्वानुमान महाशाखाले जनाएको छ। कन्काई, कोशी, बागमती, कर्णाली. महाकाली र यसका सहायक नदीमा बहाब बढ्दो क्रममा रहेको जनाइएको छ। महाशाखाले बाढी पहिरोको जोखिम रहेको भन्दै सतर्कता अपनाउन आग्रह गरेको छ। 
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768457877.png)
-1764146706.png)
-1768395492.png)
