काठमाडौं- धरानस्थित बीपी कोइराला स्वास्थ्य विज्ञान प्रतिष्ठानका उपकुलपति डा ज्ञानेन्द्र गिरीले प्रतिष्ठानमा भएको अनियमितताबारे बोल्ने डाक्टरलाई स्पष्टीकरण सोधेका छन्।
गिरीले प्रतिष्ठान सुधारको कुरा राख्दै आइरहेका डा विष्णु पोखरेललाई स्पष्टीकरण सोधेका हुन्। डा पोखरेलले सामाजिक सञ्जालमा प्रतिष्ठानमा भएका भ्रष्टाचार, अनियमितता र प्रतिष्ठानको अस्तित्व ध्वस्त पार्ने काम भइरहेको भन्दै लेखेका थिए। सोही विषयलाई लिएर उपकलुपति डा गिरीले डा पोखरेललाई तीन दिनभित्र स्पष्टीकरण दिन भन्दै पत्र काटेका छन्।
प्रतिष्ठानको हितका विषयमा बोल्ने एशोसिएट प्रोफेसर पोखरेललाई स्पष्टीकरण सोधेपछि प्रतिष्ठानका कर्मचारी उपकुलपतिसँग रुष्ट भएका छन्। उनीहरुले त्यसको विरोध गरेका छन्।
डा पोखरेल प्रतिष्ठानको अर्थोपेडिक्स विभागमा कार्यरत छन्। उनले केही समय पहिले सामाजिक सञ्जालमा प्रतिष्ठानको अस्तित्व ध्वस्त पार्ने र निजी मेडिकल कलेजलाई काखि च्याप्ने मेडिकल माफियालाई अख्तियारसँग कारबाहीको माग गर्न सार्वजानिक आह्वान गरेका थिए।
डा गिरी निजी मेडिकल कलेजका पक्षमा वकालत गर्दै आएका व्यक्ति हुन्। उनी तत्कालीन स्वास्थ्यमन्त्री भानुभक्त ढकालको सिफारिसमा नियुक्त भएका थिए। उनले प्रतिष्ठानको हित विपरीत काम गर्दै आइरहेको भन्दै विरोध भइरहेको छ।
प्रतिष्ठानमा उपकुलपति नियुक्त भएदेखिनै डा गिरी एकपछि अर्को विवादमा मुछिँदै आइरहेका छन्। केही समयअघि डा गिरीले प्रतिष्ठानको हितमा काम गर्न नसकेको भन्दै प्रतिष्ठानका फ्याकल्टी (शिक्षक चिकित्सक) हरु आन्दोलित भएका थिए। उनीहरुले डा गिरीलाई बर्खास्त गर्न माग समेत गरेका थिए।
त्यसयता पनि उनले प्रतिष्ठानमा मनपरी ढंगले काम गर्दै आइरहेको र आर्थिक अनियमितता गरेको भन्दै प्रतिष्ठानका कर्मचारीसहित प्रतिष्ठान बाहिरका सरोकारवालाले समेत विरोध गर्दै आइरहेका छन्।
उपकुलपतिले डा पोखरेललाई सोधेको स्पष्टीकरण पत्र :
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
