काठमाडौं- कानुन व्यवसायीहरुको अन्तर्राष्ट्रिय संस्था अन्तर्राष्ट्रिय बार एशोसिएसनको मानव अधिकार इन्ष्टिच्युट (आईबीएएचआरआई)ले नेपालमा दोस्रोपटक भएको प्रतिनिधि सभा विघटनप्रति ध्यानाकर्षण भएको बताएको छ।
राष्ट्रपति विद्यादेवी भण्डारीद्वारा ६ महिनामा दोस्रोपटक प्रतिनिधि सभा विघटन गरेर निर्वाचनको घोषणा गर्दै नेपालको संवैधानिक व्यवस्था समेत मिचेको उक्त संस्थाले जारी गरेको विज्ञप्तिमा भनिएको छ।
‘संसदीय लोकतन्त्र र न्यायिक मापदण्डहरू अझ चिन्ताको विषय हो, जस्तो कि नेपालका नागरिकहरूले राजनीतिक उथलपुथलको बीचमा मानव अधिकार उल्लंघनका घटनाहरु सहनु परेको छ’, विज्ञप्तिमा भनिएको छ ‘कोडिभ-१९ को महामारीका बीचमा पनि सरकारले जनताको स्वास्थ्यको अधिकारमा ध्यान दिनुभन्दा असंवैधानिक कदम चाल्नमा ध्यान दिएको देखिन्छ।’
अन्तर्राष्ट्रिय बारका सह-अध्यक्ष एवं स्वीडेन बार एशोसिएसनका भूतपूर्व महासचिव, एन रामबर्ग जूर एचसीले यसरी प्रतिनिधि सभा विघटन गर्दै संवैधानिक निकायमा अध्यादेशमार्फत् गरिएको नियुक्तिमा पनि प्रश्न उठाएका छन्।
’संंसद भंग भएपछि राष्ट्रिय मानव अधिकार आयोग, निर्वाचन आयोग र अन्य संवैधानिक निकायमा अपारदर्शी नियुक्तिहरू गरिएको रिपोर्ट सार्वजनिक भएका छन्’ उनले भनेका छन्, ‘प्रधानमन्त्रीको नेतृत्वमा रहेको संवैधानिक परिषद्ले जारी गरेको अध्यादेशमार्फत् नेपालमा कानुनको शासनका आधारभूत पक्षहरूलाई त्यागेर भएको कार्यप्रति चिन्ता जाहेर हुने देखिन्छ।’ आईबीएएचआरआईले संसद्को विघटन र शक्ति पृथकीकरणको सम्बन्धमा हुने हस्तक्षेपको निन्दा गर्ने विज्ञप्तिमा उल्लेख छ।
‘यसरी हुने दुवै कार्य कुनै पनि प्रजातन्त्रका लागि हानिकारक हो, तर विशेष गरी नयाँ लोकतन्त्रको लागि’ विज्ञप्तिमा भनिएको छ ‘हामी नेपालका अधिकारीहरूलाई वास्तविक लोकतन्त्रको ग्यारेन्टी गर्न, नेपालको २०७२ सालको संविधानको साथै नागरिकहरूको अधिकार तथा जीवन र स्वास्थ्यको सर्वोपरि अधिकारसहितको अधिकारको समर्थन गर्न आग्रह गर्दछौं।’ त्यस्तै, कोभिड-१९ को महामारीमा जनताको बाँच्न पाउने र स्वास्थ्यको अधिकारमा ध्यान दिन उसले भनेको छ।
सरकारले कोभिड-१९ को गम्भीरतालाई चिन्नु पर्ने विज्ञप्तिमा भनिएको छ। नागरिकहरूलाई निर्वाचन प्रक्रियामा पूर्ण रूपमा भाग लिनका लागि औजारहरू उपलब्ध गराउनु सरकारको लागि विवेकशील हुने विज्ञप्तिमा भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
