युरोकप २०२० : मान्सिनीले उकासेको इटालीको खास परीक्षा

लेख-विश्लेषण

नेपाल लाइभ शुक्रबार, जेठ २८, २०७८ १८:१२

काठमाडाैं- रोबर्टो मान्सिनी आफ्नो जमानाको उत्कृष्ट स्ट्राइकर थिए। क्लब स्तरमा कयौँ उपाधि जिते उनले। उनमा अविश्वसनीय प्रतिभा थियो। यद्यपि, राष्ट्रिय टिमबाट भने उनी सफल हुन सकेनन्। त्यसबखतका प्रशिक्षक आरिगो साचीसँग विवाद भएपछि उनले धेरै खेल खेल्न पाएनन्।

आन्तरिक बिबादका कारण चाँडै सन्यास लिएका थिए, मान्सिनीले। तर, उनमा राष्ट्रको लागि ट्रफी दिलाउने भोक उस्तै थियो। खेलाडी जीवनबाट सन्यास लिएपछि उनले प्रशिक्षकको भूमिका निर्वाह गर्ने मौका पाए। उनले इंग्लिस क्लब म्यानचेस्टर सिटीलाई समेत प्रशिक्षण दिइसकेका छन्।

उनलाई इटालियन फुटबल संघले सन् २०१८ मा प्रशिक्षकको जिम्मेवारी दिएको थियो। त्यो त्यही समय थियो जुनबेला चार पटकको विजेता इटाली २०१८ को विश्वकपमा छनोट भएन। संयोग, तत्कालिन प्रशिक्षक जियान पिएरो भेन्टुरा पनि जिम्मेवारी मुक्त भए। मान्सिनीले यस्तो बेला टिम सम्हालेका थिए। हुन त उनी इटालीको प्रशिक्षक बन्न त्यति इच्छुक थिएनन्। ‘म भर्खरै बूढो भएको थिएँ। उही जोश र जाँगर ममा थिएन। त्यसैले सम्झौता गर्न इच्छुक थिइन,’ उनी भन्छन्।

यद्यपि, उनले टिम सम्हाले। ओरालो लाग्दै गएको टिमको प्रशिक्षक बनेपछि मान्सिनीमाथि नकारात्मक टिप्पणी नभएको होइन। अनुभव नै नरहेको भन्दै धेरैले आलोचनासमेत गरेको उनी सम्झिन्छन्। ‘सन् २०१८ मा प्रशिक्षक बन्दै गर्दा मेरो उद्देश्य थियो, इटालीलाई बलियो टिम बनाउने। तर, त्यसबेला हामीलाई कमैले विश्वास गर्थे। अनुभवविहीनलाई प्रशिक्षकको जिम्मेवारी दिएको भन्दै आलोचना पनि नगरेको होइन। तर, म रत्तिभर बिचलित भइनँ। म विश्वस्त थिएँ हामी युरोकपमा फर्कनेछौं,’ मान्सिनी भन्छन्।

हुन पनि हो। इटाली त्यही टिम हो जो २०१० को युरोकप फाइनल खेलेको थियो। तर, दुर्भाग्य भन्नुपर्छ इटाली फाइनलमा स्पेनसँग पराजित भयो। त्यसयता ठूला प्रतियोगितामा औपचारिक सहभागिता जनाउनुबाहेक इटालीले कुनै उपलब्ध हासिल गर्न सकेन। तर, टिमको नेतृत्व सम्महालेपछि सबैको मुखमा बुझो लगाउन भएपनि उनले राम्रो नतिजा देखाउनु पर्ने थियो।तर, उनको लागि यो काम त्यति सजिलो भने थिएन।

टोलिलाई २०२० मा आयोजना हुने युरोकपमा पुर्याउनुपर्ने जिम्मेवारी उनको काँधमा थियो। केही नाम चलेका खेलाडीको उमेर ढल्कँदै गरेको थियो। केही आशलाग्दा युवा खेलाडीले मौका पाइरहेका थिएनन्। यसलाई पनि ठिक गर्नुपर्ने जिम्मेवारी थियो उनमा। टिम भएपनि नतिजा शून्य भएको चिन्ता उनीमाथि थपियो। उनले पहिला टिमको संरचनामाथि अध्ययन गरे। त्यसपछि बनाए युवा टिम।

मान्सिनीले युवा खेलाडीलाई मौका दिए। अनि अनुभवी खेलाडीलाई पनि टिममा राखे। युवा जोश र पाका खेलाडीको अनुभवले टिम सन्तुलित बन्ने मान्सिनीको ठम्याई छ। उनी एट्याकिङ फुटबल खेलाउन चाहन्थे। उनको स्वभाव पनि यही हो। इटालीको प्रशिक्षक भएपछि उनले प्रायः खेलमा ४-३-३ संरचना प्रयोग गरे।
उनको यो रणनीति सफल भयो। मे २८, २०१८ यता इटालीले ३० खेल खेलिसकेको छ। इटाली पछिल्ला २५ खेलमा अपराजित छ।

३० मध्ये जम्मा दुई खेलमा मात्रै हारे बेहोरेको छ इटालीले। यो नतिजा बास्तवमै अपत्यारिलो छ। उनकै प्रशिक्षणमा इटालीले युरोकप छनोट चरणमा शतप्रतिशत जित दर्ता गर्यो। इटालीले १० खेलमा ३४ गोल गर्यो भने चार गोल मात्रै खायो।

सन् १९३० को दशकमा भिट्टारियो पोज्जोले इटालीलाई ३० खेलमा अपराजित राखेको थिए। यो कीर्तिमान आजको मितिसम्म कायम छ। अब कीर्तिमान बराबर गर्न मान्सिनीलाई पाँच जितको खाँचो छ। मान्सिनीको टिमले नोभेम्बर २०२० देखि मार्च २०२१ सम्म ६ खेल खेलेको थियो। ती खेलमा इटालीले जम्मा एक गोल खाएको थियो।

मान्सिनीको परीक्षा
शुक्रबार रातिदेखि सुरु हुने युरो कपको पहिलो खेलमा इटालीले टर्कीसँग प्रतिस्पर्धा गर्दैछ। युरोकप अगाडि इटालीले देखाइरहेको लयले मान्सिनीप्रतिको समर्थकको विश्वास बढेको छ। उनमा यही लयलाई निरन्तरता दिनुपर्ने चुनौति थपिएको छ।

बास्तवमा पछिल्ला ३० खेलमा इटालीका अधिकांश विपक्षी बलिया थिएनन्। इटालीले सामना गरेका जम्मा तीन विपक्षी मात्रै फिफा वरियताको शीर्ष २० मा अटेका थिए। युरोकपको छनोट चरणमा फिनल्याण्ड, ग्रीस, बोस्निया एण्ड हर्जेगोभिना, आर्मेनिया र लिक्टेनस्टेनको साथ सजिलो समूहमा परेको थियो इटाली।

इटालीको प्रशिक्षक भएपछि उनले प्राय: खेलमा ४-३-३ संरचना प्रयोग गरेका छन्। उनी चाहन्थे ‘एट्याकिङ मुभ’ रक्षापंक्तिबाटै सुरु होस्। मान्सिनीले मिडफिल्डमा जर्जिन्हो र मार्को भेराट्टीको उपयोग गरे। यी दुवै खेलाडी ‘बल पोसेसन’ राख्न माहिर छन्। उनीहरूको बल पास गर्ने शैली र क्षमता धेरै माथि छ। मान्सिनीले छनोट गर्ने मिडफिल्डमा प्लमेकर बन्छन्, २४ वर्षीय निकोलो बरेला। जो मौका पाउन साथ विपक्षीको क्षेत्रमा पुगिहाल्छन्।

मान्सिनी पनि अन्य रणनीतिक प्रशिक्षक जस्तै आफ्नो टिमले आक्रमण बुन्दा बढी भन्दा बढी खेलाडी विपक्षीको क्षेत्रमा पुगुन् भन्ने चाहन्छन्। त्यस्तोमा इटालीको संरचना ३-२-५ मा परिवर्तन हुन्छ। फुलब्याक आफ्ना विङ्गर साथीलाई सहयोग गर्न मैदानको माथिल्लो भागमा पुगेका हुन्छन्। जस्तै, मैदानको बायाँ भागमा फुलब्याक एमरसन पाल्मिरी र विङ्गर फ्रेडरिको किएसाको जोडीको साझेदारी देख्न सकिन्छ। त्यसैले इटालीको टिम मजबुत र नतिजा दिनलायक बन्यो।मान्सिनीप्रति विश्वास बढेरै होला, इटालियन फुटबल संघले उनलाई सन् २०२६ सम्मका लागि प्रशिक्षक बनाउने भइसक्यो।

युरोमा हुनेछ स्तर मापन
पछिल्ला खेलहरूमा जे जस्तो नतिजा आएपनि मान्सिनीको वास्तविक परीक्षा युरो नै हो। त्यसकारण युरोमा इटालीको स्तर मापन हुनेछ। इटाली युरोको समूह ‘ए’ मा छ। त्यस समूहमा इटाली बाहेक वेल्स, टर्की र स्विटजरल्यान्ड छन्। इटालीले समूह चरणका सबै खेल रोममा खेल्नेछ।

इटालियन टिम साँच्चैको सन्तुलित देखिएको छ। विशेषगरी रक्षापंक्तिमा इटालीमाथि खोट लगाउने ठाउँ देखिँदैन। यसका साथै खेलाडीमा पनि उच्च मनोबल छ। ‘म यस टिमको हिस्सा बन्न पाउँदा गर्व महसुस गरिरहेको छु। हाम्रो लक्ष्य युरो जित्ने नै हो,’बरेला भन्छन्।

उता, टिम कप्तान जर्जियो किलिनी पनि बरेला जस्तै उत्साहित देखिएका छन्। ‘टिममा एकता छ। हामीबीच केमेस्ट्री पनि गज्जबको छ,’ उनी भन्छन्। तर, इटालीको टोलीसँग अनुभवको अभाव एक समस्या हुन सक्छ। यस्तोमा मान्सिनीले बढी भन्दा बढी खेलाडीको उपयोग गर्न प्रयास गर्नेछन्।

समूह चरण पार गरेपछि बलिया टिमको सामना गर्नुपर्ने भएकाले मान्सिनीका लागि ‘टिम रोटेसन’ चुनौति हो। उनीसँग सिरो इमोविले, लोरेन्जो इन्सिग्ने, फेडरिको चिइसा, जर्गिन्हो, म्यानुयल लोकाटेली, निकोलो बरेल्ला, लियोनाद्रो बोनुची, जिअरजियो किएलिनी, एलेसान्द्रो फ्लोरेन्जी र गोलरक्षक जियानलुइगी डोन्नररुम्माजस्ता नाम चलेका खेलाडीको साथ रहेको छन्।

तर, युवा खेलाडीका लागि पहिलो प्रतियोगिता भएकाले पनि मान्सिनीले सावधानी अपनाउनु पर्नेछ।

यस पटकको इटालियन टिममा रहेका सबै खेलाडीको लोकप्रियता करिब उस्तै छ। तीमध्येबाट कुनै एक स्टार छान्ने हो भने, ती हुन् जिजियो डोनारुमा। २२ वर्षीय डोनारुमा इटालीका पहिलो रोजाइका गोलरक्षक हुन्। उनी एसी मिलानबाट खेल्दै आएका छन्। कुनै पनि आफ्नो गुणहरूमा शंका गर्ने ठाउँ नभएको उनको बिषेशता भनेको फुर्तिलो शरीर, रिफ्लेक्सहरू र परिपक्वता हो ।क्लब करिअरमा देखिएको अन्योलले डोनारुमालाई युरोमा बलियो खेल देखाउन रोक्ने छैन भन्ने अनुमान गरिरहेका छन्, मान्सिनी।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

सोलुखुम्बु र ओखलढुङ्गाको पर्यटन प्रवद्र्धनका लागि ‘स्पार्क एडभेञ्चर’

वैदेशिक रोजगारमा कतार गएका समसुद्दीन पत्नी बलात्कारको आरोपमा इन्टरपोलमार्फत पक्राउ

सरकारले औपचारिकाताका लागि मात्रै नीति तथा कार्यक्रम ल्याएको देखियो : अध्यक्ष लिङ्देन