काठमाडौं- प्रधानन्यायाधीश चोलेन्द्र शमशेर राणा वरिष्ठताको आधारमा इजलास गठन गर्न सहमत भएपछि केही दिनदेखि जारी विवाद अन्त्य हुने देखिएको छ। मंगलबार बिहान सर्वोच्च बारका पदाधिकारीसँग भएको छलफलपछि राणा वरिष्ठताको आधारमा इजलास गठन गर्न सहमत भएका थिए। संवैधानिक इजलासमा आज भएको सुनुवाइपछि २३ गतेका लागि नयाँ पेशी तोकिएको छ। अब नयाँ इजलाश गठन हुने छ।
‘संवैधानिक इजलास गठन सम्बन्धमा सहमति भएको छ। संवैधानिक इललासको नियममै आवश्यकता अनुसार परिवर्तन गरी वरिष्ठताको आधारमा इलजास गठन गर्ने र त्यसरी गठन गर्दा पनि वरिष्ठ सदस्यलाई पनि ‘कन्फ्लिट अब इन्ट्रेस्ट’ वा स्वास्थ्यको कारणबाट बस्न नसक्ने भयो भने उहाँले कारणसहित नबस्ने सूचना दिएपछि त्यसभन्दा तल वरिष्ठतामा जो छ, उसै सहितको इजलास गठन गर्ने कुरामा प्रधानन्यायाधीशज्यूले सहमति जनाउनभएको छ’, मंगलबारको भेटपछि सर्वोच्च बारका अध्यक्ष पूर्णमान शाक्यले पत्रकारसँग भने। उनका अनुसार, एक हप्ताभित्रै नियमावली परिमार्जन गरिने छ।
राणाले प्रतिनिधि सभा विघटन लगायतका विषयमा परेका निवेदनमाथि सुनुवाइका लागि गत शुक्रबार इलजास गठन गरेका थिए। इजलासमा उनी सहित दीपककुमार कार्की, आनन्दमोहन भट्टराई, तेजबहादुर केसी र बमकुमार श्रेष्ठ थिए। संवैधानिक इजलासमा ‘पिक एन्ड चुज’का आधारमा न्यायाधीश चयन गरिएपछि आशंका सुरु भएको थियो। तर, शुक्रबारकै सुनवाइका क्रममा निवेदक पक्षका गोविन्द बन्दीले श्रेष्ठको निष्पक्षलतालाई लिएर प्रश्न उठाएका थिए। उनले नेकपा नाम विवादमा फैसला गरेको भन्दै बन्दीले प्रश्न उठाएका हुन्। आइतबारको सुनुवाइको क्रममा पुस ५ मा गरिएको प्रतिनिधि सभा विघटनपछिको सुनुवाइको क्रममा सहभागी केसीमाथि पनि प्रश्न उठेको थियो। वरिष्ठ अधिवक्ता शम्भु थापाले प्रधानन्यायाधीश राणालाई पनि बिदामा बस्न सुझाएका थिए।
सोमबार सर्वोच्चमा हलचल भएको थियो। राणा, केसी र श्रेष्ठ बाहेकका संवैधानिक इजलासको रोस्टरमा रहेका न्यायाधीशहरुले इजलास बहिस्कार गर्नेसम्मको छलफल गरेपछि राणा हच्चिएका हुन्। जसअनुसार उनी वरिष्ठताको आधारमा इजलास गठन गर्न तयार भएका हुन्।
वरिष्ठकताको आधारमा इलास गठन हुँदा अब चोलेन्द्र शमशेर राणा, दीपककुमार कार्की, मीरा खड्का, हरिकृष्ण कार्की र विश्वम्भर श्रेष्ठ सहितको इजलास गठन हुनेछ। हरिकृष्ण कार्की अघिल्लो पटक पनि इजलासबाट बाहिरिएका थिए। केपी ओली पहिलो पटक प्रधानमन्त्री भएका बेला महान्यायाधीवक्ता भएकाले उनको निष्पक्षतामा प्रश्न उठेको थियो। त्यसपछि उनले इजलास छाडेका थिए। वरिष्ठतामै रहेका अर्का न्यायाधीश विश्वम्भर श्रेष्ठ पनि अघिल्लो पटकको फैसलामा पनि सहभागी थिए। साथै परिवारका सदस्यलाई कोरोना संक्रमण भएकाले उनी आइसोलेसनमा रहेको बुझिएको छ।
वरिष्ठताको आधारमा इजलास गठन भएमा राणा, दीपककुमार कार्की, मीरा खड्का, हरिकृष्ण कार्की र विश्वम्भर श्रेष्ठ रहनेछन्। हरिकृष्ण र विश्वम्भर मध्ये एक जना बाहिरिएमा त्यस ठाउँमा ईश्वरप्रसाद खतिवडा रहनेछन्। उनीहरु दुवै बाहिरिएमा खतिवडा र आनन्दमोहन भट्टराई रहनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
