काठमाडौं- नेपाली राष्ट्रिय फुटबल टिमको मुख्य प्रशिक्षक अब्दुल्लाह अलमुताइरीले अस्ट्रेलियासँग हार्दा कुनै लाज नहुने बताएका छन्। नेपालले अस्ट्रेलियालाई हराउन सक्ने सम्भावना नरहेको भन्दै उनले यदि हारे लाज नहुने बताएका हुन्।
दी वर्ल्ड गेमसँगको कुराकानीमा उनले भनेका छन्, ‘हामी राम्रो फुटबल खेल्ने प्रयास गर्नेछौं। हुनसक्छ हामी उनीहरुलाई हराउन सक्दैनौं। हार्दा कुनै लाज हुँदैन तर, लाज तब हुन्छ जब फुटबल खेल्न प्रयास गर्दैनौं। केही व्यक्तिले भनेका छन्- म बौलाहा छु तर, यो हामी गर्छौं।’
यसअघि २०१९ मा नेपालले पहिलो पटक अस्ट्रेलियासँग उसैको मैदानमा खेलेको थियो। नेपाल ५-० गोलले पराजित हुँदा स्वीडिस योहान कालिन नेपालका प्रशिक्षक थिए।
यस्तै, उनले युरोपमा भएको खेलबाट समेत प्रभावित भएको बताउँदै नर्थ मेसेडोनियाले जर्मनी २-० ले पराजित गरेको उदाहरण समेत दिए।
‘मलाई एउटा कुरामा विश्वास छ। यदि नर्थ मेसेडोनियाले जर्मनीलाई हराउन सक्छ भने हामी अस्ट्रेलियालाई अट्याक गर्न सक्छौं,’ उनले उनले भने।
यद्यपि, उनले डिफेन्स र अट्याकमा धेरै सन्तुलन बनाएको भन्दै अस्ट्रेलियासँग अट्याकिङ खेल्ने बताए।
‘हामी डिफेन्सिभ मानसिकताका साथ खेलिरहेका थियौं। तर, अहिले डिफेन्स र अट्याकमा धेरै सन्तुलन बनाएका छौं। हामीले खेल्ने तरिका परिवर्तन गरिरहेका छौं। कहिलेकाहीं डिफेन्सलाई रेस्ट दिन अट्याक गर्नुपर्छ। यदि हामी हाम्रो बक्समा बस्छौं भने त्यो समाधान हुँदैन र हामी हार्छौं,’ उनले भने।
यस्तै उनले खेल्ने फर्मसेन पनि परिवर्तन गर्ने बताएका छन्। ‘मैले यसको ४-४-२ वा ४-२-३-१ को फर्मेसनलाई चेन्ज गर्दै ४-३-३ को सिस्टममा ल्याएको छु।’
अस्ट्रेलियाली टिमको विश्लेषण गरेपछि आफ्नो टिमले गर्नुपर्ने तयारीबारे पनि बुझेको उनले बताएका छन्।
‘राएन ग्रान्ट, ज्याक्सन इर्भिन र मिलोस डेगेनेकलाई हामीले विशेष हेर्नुपर्छ, किनकि हामीले उनीहरुलाई नियन्त्रणमा राख्दै खतरा कम गर्नुपर्छ,’ अलमुताइरीले भने, ‘निश्चय नै यो कठिन छ तर हरेक कुरा सम्भव छ। मैदानमा ५ मिनेट एक रातो कार्डले अवस्था परिवर्तन गर्छ।’
कतार विश्वकप २०२२ तथा एसियन कप २०२३ छनोटको बाँकी तीन खेल र इराकसँगको मैत्रीपूर्ण खेलको लागि मंगलबार राति नै नेपाल इराक प्रस्थान गरिसकेको छ। नेपालले जेठ १५ गते बसरा इन्टरनेसनल स्टेडियममा इराकसँग मैत्रीपूर्ण खेल खेल्ने छ।
इराकविरुद्धको खेलपछि अर्थात भोलिपल्ट जेठ १६ गते नेपाली टोली स्थलमार्ग हुँदै कुवेत जाने छ। त्यहाँ टोलीले तीन विश्वकप र एसिया कप छनोटका खेल्नेछ।
नेपालले जेठ २० गते चाइनिज ताइपेइ, २५ गते गते जोर्डन र २८ गते अस्ट्रेलियासँग प्रतिस्पर्धा गर्नेछ।
विश्वकप क्वालिफायर्सको समूह बी मा रहेको नेपालले ५ खेल खेल्दै ३ अंक जोडेको छ। यसअघि सबै अवे खेल खेलिसकेको नेपालले अब होम गेमका खेल मात्र खेल्न बाँकी छ।
५ खेलमा १ जित र ४ खेलमा हार बेहोरेको नेपाल साथ चौथो स्थानमा छ। होम गेमको पहिलो खेलमा कुवेतसँग यसअघि नै नेपाल पराजित भइसकेको छ।
विश्वकपमा छनोट हुने नेपालको सम्भावना भने गणितीय रुपमा मात्रै बाँकी छ। नेपाल रहेको समूहमा अस्ट्रेलिया, जोर्डन, कुवेत र चाइनिज ताइपेइ छन्।
अंक तालिको पुछारमा रहेको ताइपेइले अंक जोड्न सकेको छैन। अंक तालिकाको चौथो स्थानमा रहँदै छनोट चरण सकेको खण्डमा नेपालले एसियन कप छनोटको तेस्रो राउन्डमा सोझै स्थान बनाउने छ।
अस्ट्रेलिया १२ अंकका साथ शीर्षस्थानमा छ भने कुवेत र जोर्डनको समान १० अंक छ। यद्यपि, अलमुताइरीले आफ्नाे लक्ष्य चाैथाे स्थानमै रहनु रहेको सुनाए।
‘हामी यस समूहमा चौथो स्थानमै रहन चाहन्छौं र एसियन कपको यात्रा निरन्तर गर्न चाहन्छौँ,’ उनले भने।
यस्तै, उनले यस पटक युवा खेलाडीलाई मौका दिनुको कारण पनि अहिलेको नतिजाभन्दा पनि सेप्टेम्बरमा हुने साफ च्याम्पियनसिपलाई लक्षित रहेको बताएका छन्।
‘हाम्रो अर्को लक्ष्य साफको फाइनल पुग्नु पनि छ। हामीले मे २९ मा इराकसँग मैत्रीपूर्ण खेल खेल्छौं। नेपाल सुपर लिग केही समयअघि सकिएको छ र खेलाडीहरु पनि लयमा छन्। हामी जुनको ठूलो खेललाई लिएर तयार छौं,’ उनले भने।
नवनियुक्त प्रशिक्षण अलमुताइरीको प्रशिक्षणमा नेपालले इराकविरुद्ध पहिलाे खेल खेल्दै छ। एन्फाले औपचारिक रुपमा उनलाई चैत २२ गते राष्ट्रिय टोलीको मुख्य प्रशिक्षकको जिम्मेवारी दिएको थियो।
विश्वकप छनोटका लागि भनेर एन्फाले कुवेती प्रो लाइसेन्सधारी अलमुताइरीलाई अनुबन्ध गरेको हो। उनी कतार फुटबल संघको सहयोगमा नेपाल आएका हुन्।
उनले आगामी खेलका लागि २३ सदस्यीय टिमको घोषणा गरिसकेका छन्। उनले भरत खवास, रञ्जित धिमाल, शेसेहाङ आङदेम्बे, रवि पाशवान, निशान खड्का, विवेक बस्नेत, नितिन थापा, दर्शन गुरुङजस्ता खेलाडीहरुलाई विश्राम दिएर नयाँ खेलाडीलाई मौका दिएका छन्।
विशाल सुनार, आयुस घलान, मनिष डाँगी, सुरज जिउ ठकुरीलगायतका खेलाडीले पहिलोपटक टोलीमा स्थानमा बनाएका छन्। त्यस्तै, नवयुग श्रेष्ठ र सन्तोष तामाङले पुनरागमन गरेका छन्।
यस्तो छ नेपाली टोली
गोलरक्षक : किरण चेम्जोङ, विशाल सुनार, दीप कार्की
डिफेन्डर : रोहित चन्द, अनन्त तामाङ, दिनेश राजवंशी, गौतम श्रेष्ठ, सुमन अर्याल, विकास खवास
मिडफिल्डर : विशाल राई, मनिष डाँगी, एरिक विष्ट, कमल थापा, सन्तोष तामाङ, सुमन लामा, सुनिल बल, सुरज जिउ ठकुरी, पुजन उपरकोटी, आयुष घलान
फरवार्ड : अभिषेक रिजाल, अन्जन विष्ट, नवयुग श्रेष्ठ, आशिष लामा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_3anZTthbso-1766484950.jpg)
-1764146706.png)
-1763721444.png)
