काठमाडौं- बाराको कलैया उपमहानगरपालिका-७ का अब्दुल रसार अन्सारीका दुई छोरा ९ वर्षीय उशमान र ७ वर्षीय अमिनको हत्या आरोपमा प्रहरीले एक जनालाई पक्राउ गरेको छ।
पक्राउ पर्नेमा कलैया-७ रंगपुरका २५ वर्षीय फरमुल्लाह अन्सारी रहेको बाराका एसपी दीपेन्द्र शाहीले बताए। उनको घरबाट हत्यामा प्रयोग भएको चक्कु र रगत लागेको पेटी समेत बरामद भएको छ।
हत्याको कारण भने बालकका आमा र फरमुल्लाहबीचको 'अनैतिक सम्बन्ध' रहेको प्रहरीले जनाएको छ। अब्दुल रसार विगत ३ वर्षदेखि रोजगारीका लागि कतार गएपछि बालकका आमा र फरमुल्लाहबीच हिमचिम बढेको थियो। फरमुल्लाहले छोराछोरी छाडेर आफूसँग जान आग्रह गरेको तर, उनी जान नमानेपछि त्यही रिसका कारण बालकहरुको हत्या गरेको पाइएको प्रहरीले जनाएको छ।
दुई छोराहरु छाडेर आफू जान नसक्ने बताएपछि पख्लास भन्दै फरमुल्लाहले धम्की दिएको बताइएको छ। सोही कारण दुई बालकको उनले हत्या गरेको प्रहरीको दाबी छ।
गत मंगलबार बिहान कलैया उपमहानगरपालिका–११ रंगपुरमा रहेको मदर्शा सल्फिया कन्जुल उलुममा दुई बालकको शव भेटिएको थियो।
मदर्शाको नयाँ बन्दै गरेको भवनभित्र आधा घाँटी काटिएको अवस्थामा बालकको शव भेटिएपछि मंगलबार बिहान स्थानीयले प्रहरीलाई खबर गरेका थिए। प्रहरी घटनास्थलमा पुग्दा घाँटी काटिएको अवस्थामा फेला परेका दुई बालकको शव कलैया–७ का अब्दुल रसार अन्सारीका दुईभाइ छोराको भएको खुलेको थियो।
घरमा बच्चाहरू मात्र भएको मौका छोपी फरमुल्लाहले साँझपख बच्चाहरूलाई लोभलालचमा पारी एकान्त स्थलमा बोलाई हत्या गरेका प्रहरीले जनाएको छ।
हत्यापश्चात फरमुल्लाह कलैया बजारमा बिहान ५ बजेतिर हिँडडुल गरेको सिसी टिभी फुटेजमा देखिएको छ। शव फेला परेपछि फरमुल्लाह घटनास्थल समेत पुगेको पाइएको छ। तालिमप्राप्त कुकुर आउने र हत्या गर्ने मान्छेको पहिचान गर्ने सुनेपछि त्यहाँबाट फरार भएको उनले प्रहरीसमक्ष बताएका छन्।
सम्बन्धित समाचार :
बारामा दुई बालकको हत्या घटना: राति घरबाट बोलाएर लैजाने व्यक्ति को हुन्?
बारामा घाँटी रेटी हत्या गरेको अवस्थामा दुई बालकको शव भेटियो
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789383080.png)
