काठमाडौं- गीता टन्डन, जसले बलिउडका धेरै फिल्ममा काम गरिसकेकी छन्। उनले काम गरेका प्रायः फिल्म हिट भएका छन्। यद्यपि, उनको नाम भने कमै सुनिन्छ। पर्दामा काम गरे पनि उनको नाम सधैं पर्दा पछाडिमात्रै गुञ्जन्छ।
गीता बलिउडकी ‘स्टन्ट वुमन’ हुन्। उनले दीपिका पादुकोण, प्रियंका चोपडा, करिना कपुर, आलिया भट्टलगायतका भूमिकामा स्टन्ट गरिसकेकी छन्।
उनै गीताको जिन्दगी पनि फिल्मी कथाभन्दा कम छैन। उनको जीवनकथामा एउटा छोटो डकुमेन्ट्री फिल्मसमेत सार्वजनिक भएको छ।
परिवारबाटै पीडित
पञ्जावी परिवारकी गीताको जन्म मुम्बईमा भएको थियो। गरिब परिवारकी उनले १० वर्ष नपुग्दै आमालाई गुमाइन्। चार जना साना छोराछोरीको हेरचाह गर्नुपर्ने जिम्मा बाबुको काँधमा आइपुग्यो, जसबाट गीताका बाबु आत्तिन पुगे।
गीता १५ वर्ष नपुग्दै उनको विवाहको चर्चा चल्न थाल्यो। छोरी हुर्किइसकेकी, छिट्टै बिहे नगरिदिए जे पनि हुनसक्ने, नाक काटिनेजस्ता कुरा उनका बाबुलाई लाग्न थाल्यो। यसमा अरूले पनि साथ दिए।
बाबुले गीताको बिहे गरिदिने तयारी गरे। गीतालाई पनि ठीकै लाग्यो। सोचिन्- आफैं पकाउने, आफैं खाने, आफ्नै घर, आफ्नै परिवार..। बाबुको घरमा दुःख सहेर बसेकी गीतालाई जीवनमा सुखले चियाएको अनुभूति भयो। अन्ततः गीताको विवाह भयो।
विवाहअघि जुन कल्पना गरेकी थिइन् पछि त्यो पाइनन्। श्रीमान् जतिखेर पनि रक्सी खान्थे। १५ वर्षकी गीतालाई यौनका बारेमा केही थाहा थिएन। रात परेपछि उनी डरले काप्न थाल्थिन्।
एक अन्तवार्तामा उनले भनेकी छन्, ‘सासुससुराले छक्का होस् कि के हो? एउटी महिलालाई नि तह लगाउन सक्दैनस्, लुगा च्यातिदे भनेर उक्साउँथे, र उनी (श्रीमान्) त्यसै गर्थे।’
उनी हरेक रात श्रीमानबाट ‘बलात्कृत’ भइन्। यही क्रममा दुई सन्तान जन्माइन्। बच्चा जन्मिएपछि त श्रीमानको व्यवहार सुधार होला भन्ने गीताको आशा थियो, तर झनै निराशामा बदलियो। श्रीमान् र घरपरिवारका सदस्य झनै उग्र बने।
एक दिन श्रीमानले तरवार लिएर मार्न खोजे। उनी दुई बच्चा लिएर जसोतसो घरबाट भाग्न सफल भइन्, र बहिनी ज्वाइँको घरमा पुगिन्।
त्यहाँ पनि धेरै दिन बस्ने अवस्था भएन। ज्वाइँको व्यवहार त राम्रो थियो तर उनका परिवारका सदस्यले बहिनीलाई अप्ठ्यारोमा पार्न थाले। गीता साना छोराछोरी लिएर गुरूद्वारको शरणमा पुगिन्।
त्यहाँ पनि भिख मागेर बस्न मन लागेन। उनले अवोध छोराछोरीलाई हेरिन्, र उनीहरूलाई राम्रो जीवन दिने निधो गरिन्।
घर मालिकको अफर
गीतासँग न पढाइ थियो, कुनै सीप नै। उनले सस्तो डेरा खोजिन्। कामको खोजीमा लागिन्। त्यहीबेला कोठा बसेकै घरका मालिकले अफर गरे- मेरी श्रीमती बिरामी छे, त्यसैले तिमीलाई केही अभाव हुन दिन्न।
गीता नर्कबाट निस्केर आएकी थिइन्। घरमालिकको यस्तो अफरले उनको दिमागमा फेरि चक्कर लगाइदियो। ‘तिम्रो रखेल बन्नेजस्तो देखिन्छु?’ भन्दै उनले घर मलिकलाई गाली गरिन्। र, दुई दिनमै डेरा छाडेर हिँडिन्।
अर्को ठाउँमा सस्तो डेरा लिइन्। कामको खोजीमा हिँडिरहेका बेला एउटा घरमा ‘काम गर्ने मानिसको आवश्यकता’ भनेर लेखेको बोर्ड देखिन्। त्यहाँ उनले रोटी पकाउने काम पाइन्। बिहान डेढ सय, बेलुकी डेढ सयका दरले दिनको तीन सय रोटी पकाउनुपर्थ्यो। त्यसबापत महिनाको १२ सय रूपैयाँ कमाउँथिन्।
यसले खानाका लागि त समस्या परेन, तर छोराछोरीलाई राम्रो शिक्षा पनि दिनु थियो।
अनि बनिन् ‘स्टन्ट वुमन’
एक दिन मसाज पार्लरमा काम गर्नेहरूसँग उनको भेट भयो। उनीहरूसँगै पार्लरमा काम गर्न गइन्।
तर, नाम मात्रैको मसाज पार्लर, भित्रको धन्दा बेग्लै रहेको थाहा पाइन्। त्यहाँबाट चुपचाप भागिन्।
काम नपाएर निराश बनिरहेकी उनलाई बाबुले आफ्नो साथीको नम्बर दिए। फिल्मको सुटिङमा पर्दा पछाडिको काम सम्हाल्ने रहेछन् ती मानिस। उनले बाबुका साथीलाई भेटिन्, सुटिङको काममा सहयोग गरिन्। त्यसबापत पहिलो दिन ४०० रूपैयाँ कमाइन्।
त्यसपछि उनले विभिन्न समूहसँग काम गरिन्। कामको सिलसिलामा एउटा पञ्जावी नृत्य भांगडा गर्ने समूहमा पुगिन्। त्यहाँ एउटी केटीले ‘स्टन्ट वुमन’का बारेमा बताइन्।
उक्त कुराले गीताको जिन्दगी परिवर्तन गरिदियो। उनले स्टन्ट वुमनको कुरा सुन्नेबित्तिकै आफू पनि त्यस्तै बन्ने निर्णय लिइन्।
उनको पहिलो स्टन्ट थियो आगोमा कुद्ने। पहिलो काममै उनको अनुहार आगोले पोल्यो। केही दिनमा निको पनि भयो। आगोले पोले पनि उनी स्टन्टमा रमाउन थालिन्। पैसा पनि राम्रो कमाइ हुने, मज्जा पनि हुने।
गीताले उक्त अन्तर्वार्तामा हाँस्दै भनेकी छन्, ‘डराउन डर बाँकी नै थिएन, त्यसैले खतराको खेलाडी बनेँ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
