काठमाडौं- पोखरामा बस्दै आएका एक बालकको स्थानीय कोत्रे खोलामा पौडी खेल्ने क्रममा अमेरिकी नागरिक मिचेल नर्म्यान टेलरसँग घुलमिल भयो। त्यसको केही दिनपछि ती बालकसहित थप दुई बालक पुनः पौडी खेल्न गए। त्यसबेला पनि उनै अमेरिकी नागरिक मिचेलसँग भेट भयो।
‘हामी चारै जना सँगै पौडी खेल्यौं। त्यसपछि मिचेलले नजिकैको रेष्टुरेन्टमा लगेर हामीलाई खाजा खुवाए। मेरो घर जाउँ भनि आफ्नो मोटरसाइकलमा राखी आफू बसेको कोठामा लगे’, प्रहरीले गराएको बालकको घटना विवरण कागजमा भनिएको छ, ‘त्यसपछि हामीमाथि अश्लिल हर्कत भयो। घर फर्किने बेला हामीलाई ५ सय पनि दिए।’
यो घटना थियो, २०७५ कात्तिक २० गतेको। बालकको बयानपछि बाल यौन दुराचार भएको भन्दै पीडित पक्षका आफन्तले जिल्ला प्रहरी कार्यालय कास्कीमा मिचेलविरुद्ध जाहेरी दिए।
प्रहरीमा जाहेरी आउन्जेल मिचेलले नेपाल छाडिसकेका थिए। उनलाई पक्राउ गर्नु असम्भवप्रायः ठानेको थियो प्रहरीले। जाहेरी दिएको साढे दुई वर्षपछि उनै मिचेलले चौथोपटक नेपाल यात्रा गरे सन् २०२१ मार्च २ मा। यसअघि उनी २०१६, २०१८ र २०१९ मा नेपाल आइसकेका थिए।
चौथोपटक काठमाडौं आएपछि पुनः पोखरा पुगेका मिचेलले पहिले बसेको पोखराको विष्णु होमस्टे पुगे। जहाँ साढे दुई वर्ष पहिले तीन बालकलाई यौन दुराचार गरेको आरोप मिचेललाई लागेको थियो। त्यही होमस्टेबाट चैत १७ गते केन्द्रीय अनुसन्धान ब्यूरो (सीआईबी)ले मिचेललाई पक्राउ गर्यो।
कास्की प्रहरीमा जाहेरी परेकाले अनुसन्धानका लागि मिचेललाई सीआईबीले कास्की प्रहरीको जिम्मा लगायो। उनै मिचेललाई मंगलबार कास्की जिल्ला अदालतले जेल पठाउने आदेश दिएको छ।
जिल्ला अदालतका न्यायाधीश श्रीकृष्ण भट्टराईको इजलासले मिचेललाई पुर्पक्षका लागि कारागार चलानको आदेश दिएसँगै उनलाई कास्की कारागार पठाइएको छ।
उनले बालकहरूलाई सँगै घुमाउने, रेष्टुरेन्टमा लगेर खाना-खाजा खुवाउने गर्थे। यसरी प्रलोभनमा पारेर मिचेलले यौन दुराचार गर्दै आएको आरोप लागेको छ। मिचेलले भने अदालतसमक्ष आफूलाई लागेको आरोप अस्वीकार गरेका छन्।
पछिल्लो पटक २०२१ मार्च २ मा अमेरिकाबाट काठमाडौं आई २ रात बसेको र त्यसपछि पोखरा गएको उनको बयान छ।
तर, पीडित भनिएका तीनै जना बालकहरूलाई आफूले नचिनेको उनको दाबी छ। ‘मैले उनीहरूलाई चिन्दिनँ। मबाट आर्थिक प्रलोभन पाउने आशामा उक्त झुटा उजुरी दिइएको हो’, मिचेलले दिएको बयानमा उल्लेख छ।
त्यसैगरी, उक्त गेष्टहाउसको कोठाबाट प्रहरीले यौन शक्तिवर्द्धक औषधीहरू बरामद गरेको भन्दै मुचुल्कामा उल्लेख गरेको छ। प्रहरीले बरामद गरेका ती औषधीहरू यौन शक्तिवर्द्धक नरहेको मिचेलको दाबी छ। उनले भनेका छन्, ‘मेरो कोठाबाट बरामद भएका औषधीहरू उच्च रक्तचाप नियन्त्रण गर्ने, थाइराइड कम गर्ने तथा बुढोपनसँग जुध्ने औषधी हुन्।’
उता होमस्टे सञ्चालक विष्णुप्रसाद अधिकारीले मिचेल बालबालिकाहरूसँग घुलमिल भइरहने र होमस्टेमा ल्याउने गरेको बयान दिएका छन्। दुराचार भएको भनिएको दिन पनि उनीहरू बालकहरूसँगै होमस्टेमा बसेको अधिकारीको बयान छ।
मिचेलले इन्कारी बयान दिएपनि काठमाडौंस्थित अमेरिकी दूतावासले नेपाल प्रहरीलाई मार्च २३ मा पठाएको पत्रबाट भने अमेरिकाबाट नेपाल आउनुको उद्देश्य नै यौन दुराचार हुनसक्ने भनेर लेखेको छ।
मिचेल र उनको नेपाल यात्राको बारेमा 'होमल्याण्ड सेक्युरेटी इन्भेष्टिगेसन (एचएसआई) चाइल्ड एक्सप्लोइटेसन ग्रुप साउडियाओ, क्यालिफोर्नियालाई उदृत गर्दै एम्बेसी'ले प्रहरी महानिरीक्षकलाई नै सम्बोधन गरेर लेखेको छ, ‘एचएसआईले गरेको अनुसन्धान अनुसार मिचेलले हालसालै धेरै नेपाली बालकहरूसँग नियमित सम्पर्क गर्ने गरेको देखियो। यसको कारण नेपाल भ्रमणमा रहेकाले उनीहरूलाई दुराचार गर्न सकियोस् भन्ने उद्देश्य पनि हुनसक्छ।’
उनले इन्कारी बयान दिएपनि यी प्रमाणको आधारमा उनी निर्दोष हुन् भन्ने अवस्था नरहेको भन्दै मिचेललाई पुर्पक्षका लागि कारागार पठाइएको छ।
मिचेललाई पुर्पक्षका लागि कारागार पठाउनुपूर्व अदालतबाट आफन्तसँग सम्पर्क गर्ने मौका दिइएको थियो। न्यायाधीश भट्टराईका अनुसार सरकारी वकिलसमेतको रोहबर र निगरानीमा अमेरिकास्थित परिवारलाई आफू पक्राउ पर्नुको कारणबारे मिचेलले जानकारी गराएका थिए।
कारागारमा रहेका बेला समेत मिचेलले आफ्नो परिवारसँग सम्पर्क गर्न खोजेको अवस्थामा कारागार प्रशासनले उचित ठानेको माध्यमबाट सम्पर्क गराउने व्यवस्था मिलाउन समेत आदेशमा उल्लेख गरिएको छ।
यो पनि पढ्नुहोस् :
बाल यौन दुराचारका लागि अमेरिकादेखि नेपालसम्म, पक्राउ परे मिचेल
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1747220707.png)
-1747219795.png)
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
