काठमाडौं- नेपाल र बलिउडबीचको सम्बन्ध निकै घनिष्ठ छ। त्यसैले त बलिउडमा बनेका कयौं फिल्मले कतै नेपाल जोडेका छन् त धेरै फिल्म नेपालमै छायांकन गरिएका छन्। यो क्रम निरन्तर छ।
कुनै ग्याङस्टरबारे फिल्म या सिरिज बनेको छ भने त त्यो नेपालबिना अपूरो नै हुन्छ। खुला सिमाना, मिल्दो भाषा र परम्पराका कारण भारतको आर्थिक, सामाजिक र राजनीतिक घटनाक्रमले नेपाललाई प्रत्यक्ष असर पार्छ। यो कुरा फिल्म या सिरिजमा पनि देखिन्छ।
केही महिनाअघि मात्रै नेपालमा छायांकन गरिएको साउथ इन्डियन फिल्म ‘दिल धडक-धडक’ युट्युबमा सार्वजनिक भयो। नेपालमा २०७२ सालमा आएको भूकम्पमा आधारित फिल्म दुई वर्षअघि छायांकन गरिएको थियो।
यहाँ ९० को दशकभन्दा अघि र पछि नेपालमा छायांकन गरिएका केही चर्चित बलिउड फिल्मका बारेमा चर्चा गरेका छौं।
जोनी मेरा नाम
सन् १९७० मा बनेको बलिउड फिल्म 'जोनी मेरा नाम' अपराध विधाको फिल्म हो।
पुलिस इन्स्पेक्टरका दुई छोरा छन्, मोहन र सोहन। यी दुवै बक्सिङ खेलमा पोख्त छन्। तर, गुन्डाहरूले सोहनका बाबु र दाइ मोहनलाई मारिदिन्छन्। वर्षौंपछि सोहन सीआईडीको पुलिस अफिसर बन्छ, दाइ र बाबुलाई मार्ने गुन्डासँग बदला लिन्छ।
उक्त फिल्म विजय आनन्दले लेखेका हुन्। फिल्ममा लेखक तथा निर्देशक विजय आनन्दका भाइ देव आनन्द र प्रानको मुख्य भूमिका छ। यीबाहेक फिल्ममा हेमा मालिनी, जीवन, प्रमानाथ लगायतको भूमिका देख्न सकिन्छ। यो फिल्मले ‘१८औं फिल्म फेयर अवार्ड’ समेत जितेको थियो।
हरे राम हरे कृष्ण
नेपालमा खिचिएको अर्को चर्चित फिल्मको नाम हो ‘हरे राम हरे कृष्ण’। अन्तर्राष्ट्रिय हरेराम मुभमेन्टको समयको कथा फिल्ममा समेटिएको छ।
यस फिल्ममा बाबु र आमा बिछोडिएको लामो समयपछिको विषय उठाइएको छ। आमाबाबुको बिछोड भएपछि बाबु नेपालको काठमाडौं आउँछन् र यतै नयाँ घरबार गरेर बस्छन्। यही बाबुछोराको मिलन, सौतेनी आमाको टोकेसो र नेपालमा बसेको त्यो समयको हिप्पी संस्कृतिलाई फिल्ममा समेटिएको छ।
चर्चित नायक देवानन्दले अभिनयका साथै फिल्म लेखन तथा निर्देशन गरेका थिए। साथै, उनैले पैसा लगानी गरेर फिल्म निर्माण पनि गरेका थिए। काठमाडौं घुम्न आउँदा देखेको दृश्यले प्रभावित भई फिल्मको कथा लेखेको देवानन्दले विभिन्न अन्तर्वार्तामा बताएका थिए।
सन् १९७१ मा बनेको यो फिल्ममा देवानन्दका साथै जिनत अमान, मुमताज, प्रेम चोपडा लगायतका कलाकारको अभिनय देख्न सकिन्छ। निकै चर्चित गीतहरू कान्छा रे कान्छा रे, फुलोका तारोंका सबका केहेना हे, दम मारो दमसमेत यही फिल्ममा समावेश छन्।
महान
नेपालमा छायांकन गरिएका फिल्मको सूचीबाट हटाउनै नहुने अर्को फिल्मको नाम हो- महान। फिल्ममा अभिनेता अमिताभ बच्चनको तेहेरो भूमिका देख्न सकिन्छ। धेरै दृश्य नेपालमा खिचिएको फिल्ममा पशुपतिनाथ मन्दिरलाई बारम्बार हेर्न पाइन्छ।
फिल्ममा एक ड्रग्स माफियाले आफूलाई व्यवसायीको खोल ओडेर गैरकानुनी धन्दा गरेको देखाइएको छ। फिल्ममा अमिताभको भूमिका वकिल अमित र जुम्ल्याहा दाजुभाइ गुरू र पुलिस इन्स्पेक्टर शंकरको रूपमा देखाइएको छ।
उक्त फिल्म छायांकनका समयमा अमिताभलाई हेर्न आउने भीडले सुटिङमै समस्यासमेत ल्याएको थियो। एमडी सुन्दरको लेखनमा एस रमानाधनले निर्देशन गरेको फिल्म महान अमिताभसँगै वाहेदा रहमान, प्रविन बावी, शक्ति कपुर, जन्नत अमन, अशोक कुमार लगायतको अभिनय छ।
प्यारमे दिल पे मार्दे गोली, आधी बाटो हो चुकी लगायतका गीत समावेश गरिएको यो फिल्म सन् १९८३ मा बनेको हो।
आँधी तुफान
अधिकांश दृश्य नेपालको भक्तपुरमा खिचिएको फिल्म ‘आँधी तुफान’ नेपालमा खिचिएको अर्को चर्चित फिल्म हो। सन् १९८५ मा बनेको यो फिल्ममा पनि ग्याङस्टरकै कथा देखाइएको छ। प्रहरी इन्स्पेक्टर रञ्जित सिंहलाई ग्याङस्टर बलवीरले मारेपछिको कथालाई फिल्ममा देखाइएको छ।
त्यो समयमा पनि यो फिल्मलाई पाँच करोड भारू लगानी गरिएको थियो।
बी सुवासले निर्देशन गरेको यो फिल्मलाई पहलाज निहालनीले निर्माण गरेका हुन्। फिल्ममा मिथुन चक्रबर्ती, डेनी डेन्जोम्पा, हेमा मालिनी, शत्रुघन सिन्हा, शशी कपुर, मिनाक्षी सेसादरीजस्ता कलाकारको अभिनय देख्न सकिन्छ।
युद्ध
सर्वाधिक सफल मानिएको फिल्म ‘युद्ध’ पनि नेपालमै छायांकन गरिएको बलिउड फिल्म हो। सन् १९८५ मा प्रदर्शनमा आएको युद्धलाई राजिव रायले निर्देशन गरेका हुन्। गुलसान रायले फिल्ममा लगानी गरेका छन्।
यो फिल्ममा पनि बाबुलाई मारेपछि पुलिस इन्स्पेक्टर बनेर छोराले लिएको बदलालाई हेर्न सकिन्छ।
फिल्ममा चर्चित कलाकार ज्याकी श्राफ, डेनी डेन्जोङपा, अनिल कपुर, टिना मुनिम, नुतनलगायतको अभिनय देख्न सकिन्छ।
खोज
नेपालमा छायांकन गरिएको अर्को फिल्मको नाम हो- खोज। रहस्यमयी कथावस्तु रहेको खोज सन् १९८९ मा सार्वजनिक भएको बलिउड फिल्म हो। दक्षिण भारतीय फिल्मको ‘रिमेक’ गरिएको फिल्ममा रातारात श्रीमती हराएको कथा छ।
फिल्मका पात्र रवि कपुर र उनकी श्रीमती अनिता छुट्टी मनाउन काठमाडौं आउँछन्। तर, रातारात अनिता हराउँछिन्। पछि अनिताका बाबुले छोरी आफूसँगै चर्चमा गएको सुनाउँछन् भने भेटिएकी अनिताजस्तै देखिने केटीले पनि तिम्री श्रीमती हैन भन्छिन्। फिल्म तिनै रहस्यमयी महिलाको कथा वरपर घुमेको छ।
केसु राम्सेले निर्देशन गरेको फिल्मलाई किरण राम्सेले निर्माण गरेका छन्। फिल्ममा कलाकार ऋषि कपुर, नसिरूद्धिन शाह, किमी काटकर, सतिश शाह, डेनी डेन्जोङपा लगायतको अभिनय देख्न सकिन्छ।
खुदा गवा
काठमाडौंको कालिकास्थानलगायतका ठाउँमा खिचिएको फिल्म ‘खुदा गवा’ पनि त्यो समयको चर्चित फिल्म हो। फिल्ममा स्वर्गीय नायिका श्रीदेवीले दोहोरो भूमिका निर्वाह गरेकी छन्।
फिल्ममा घोडा दौड प्रतियोगिता हुन्छ। त्यहाँ बादशाह खान पनि घोडा दौडमा सहभागी हुन्छन्, तर उनले त्यहाँ बेनजिरलाई देख्छन्। बेनजिरको सुन्दरताले बादशाह खान घोडाबाट खस्छन्, साथै बेनजिरसँग प्रेममा पनि पर्छन्। बेनजिरसँग बिहेको प्रस्ताव राख्दा उनले सर्त राख्छिन्। उनका बाबुका हत्यारा हविवुल्लाह भएको ठाउँमा पुर्याउने सर्त। त्यही सिलसिलामा फिल्मका कलाकारहरू नेपाल आइपुग्छन्।
मुकुलेश आनन्दले निर्देशन गरेको फिल्मलाई नाजिर अहमद र मनोज देसाइले निर्माण गरेका छन्। फिल्ममा श्रीदेवीसँगै अमिताभ बच्चन, साउथ फिल्मका चर्चित अभिनेता नागर्जुन, डेनी डेन्जोङपालगायतको अभिनय देख्न सकिन्छ।
सन् १९९२ मा प्रदर्शनमा आएको यो फिल्म १९३ मिनेटको छ।
बेकाबु
केही आतंकवादी समूह नेपालको जंगलमा तालिम लिइरहेका हुन्छन्। त्यही समयमा नेपालको हिमाली क्षेत्र घुम्न आएका पर्यटकको कथामा केन्द्रित छ फिल्म ‘बेकाबु’।
फिल्ममा पाटनका रमाइला दृश्यहरू समेत देख्न पाइन्छ। एन चन्द्रले निर्माण तथा निर्देशन गरेको फिल्म बेकाबुमा सञ्जय कपुर, ममता कुलकर्नीलगायतका कलाकारको अभिनय देख्न सकिन्छ। सन् १९९६ मा प्रदर्शनमा आएको बेकाबु रोमान्टिक विधाको फिल्म हो।
घरवाली बाहरवाली
डेविड धवनले निर्देशन गरेको फिल्म घरवाली बाहरवाली निकै रमाइलो फिल्म हो।
अरूण वर्मा श्रीमती मरेकी विदुर बाबु हुन्छन्। उनले नातीनातिनाका लागि छोरा हिरालालको बिहे काजलसँग गरिदिन्छन्। तर, दुःखको कुरा, काजल बच्चा जन्माउन सक्दिनन्। बाबु अरूण छोरा हिरालाललाई दोस्रो बिहे गर्न दबाब दिन्छन् तर छोरो मान्दैन।
घरको अशान्त वातावरण भुलाउन हिरालाल मिल्ने साथी जम्बोको साथमा नेपाल घुम्न आउँछन्। त्यसपछिको रमाइलो कथा फिल्ममा हेर्न पाइन्छ। फिल्ममा नेपाली भाषा पनि सुन्न पाइन्छ।
सन् १९९८ मा बनेको फिल्ममा ‘नेपालकी ठन्डी ठन्डी हावाओं मे’ बोलको गीतसमेत समावेश गरिएको छ। फिल्ममा अनिल कपुर, रविना टन्डन, रम्बालगायतको अभिनय हेर्न पाइन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778309656.png)
-1764146706.png)
