ओलीसँगको प्रक्रियाबाट ‘ब्याक’ हुन मिल्दैन: महतो, ओलीको विकल्प खोज्नै पर्छ: यादव

राजनीति

वीरेन्द्र ओली शुक्रबार, चैत २७, २०७७ २०:२६

काठमाडौं- जनता समाजवादी पार्टी (जसपा)मा प्रधानमन्त्री केपी शर्मा ओली नेतृत्वको सरकारमा जाने वा नजाने विषयमा स्पष्ट दुई धार देखिएको छ। नेपाली कांग्रेसका सभापति शेरबहादुर देउवाले शुक्रबार संयुक्त संरकारको प्रस्ताव गरेपछि जसपामा स्पष्ट दुई धार देखिएको हो।

कांग्रेस सभापति देउवाले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, सचिवालय सदस्य नारायणकाजी श्रेष्ठ, स्थायी कमिटी सदस्य देव गुरुङसहित जसपाका अध्यक्ष महन्थ ठाकुर, उपेन्द्र यादव, वरिष्ठ नेता राजेन्द्र महतो, संघीय परिषद् अध्यक्ष बाबुराम भट्टराईलाई आफ्नै निवास बूढानीलकण्ठमा बोलाएर संयुक्त सरकारको प्रस्ताव राखेका हुन्।

देउवाले संयुक्त सरकारको प्रस्ताव राखेलगत्तै जसपा अध्यक्ष महन्थ ठाकुरले बन्दी रिहा, मुद्दा फिर्तालगायत विषयमा सरकारसँग छलफल चलिरहेको र पार्टीमा छलफल गरेर मात्रै निर्णय दिन सक्ने जवाफ फर्काए। जसपाले आफ्नो पार्टीमा छलफल गरेर मात्रै संयुक्त सरकारका विषयमा निर्णय दिने जवाफ फर्काएपछि बैठक सकियो। जसपामा ओली सरकारमा जाने विषयमा शुरुदेखि नै विवाद हुँदै आएको छ।

अध्यक्ष ठाकुर, वरिष्ठ नेता महतोलगायत तत्कालीन तराई-मधेश लोकतान्त्रिक पार्टी (तमोलोपा) आफ्ना माग पुरा भए सरकारमा जाने विषयमा लचिलो छ। तर, जसपाकै तत्कालीन समाजवादी पार्टीका अध्यक्ष यादव, संघीय परिषद् अध्यक्ष भट्टराई ओली नेतृत्वको सरकारमा जानै नहुने पक्षमा छन्।

पछिल्लो समय ओलीसँग निरन्तर छलफल चलिरहेकाले सरकारसँग शुरु भएको प्रक्रियाबाट पछाडि हट्न नमिल्ने महतोको भनाइ छ। ‘हामी आफ्ना माग र मुद्दामा केन्द्रित छौं। रेशम चौधरीलगायत नेता/कार्यकर्ता रिहा, मुद्दा फिर्ता गर्ने विषयमा सरकारसँग छलफल गरिरहेका छौं। सरकारले आफ्नो तर्फबाट प्रक्रिया अघि बढाइसकेको छ। हिजो मात्रै २०८ जनाको मुद्दा फिर्ताको सम्बन्धमा गृह मन्त्रालयमा छलफल गरि बुझाइसकेका छौं’, नेपाल लाइभसँग कुरा गर्दै महतोले भने, ‘सरकारसँग एउटा प्रक्रिया नै सुरु भइसकेको छ। यदि, बीचमै छोड्यौं भने सारा प्रक्रिया बीचमै टुट्छ। हामी काम गर्ने, गराउनेमै केन्द्रित छौं। प्रक्रिया शुरु भइसक्यो, त्यसबाट ‘ब्याक’ हुन मिल्दैन।’

ओली नेतृत्वको सरकारको विकल्प खोजेर अर्को सरकार बन्ला र गरौंला भन्ने दिशातिर जान नहुने महतो बताउँछन्। केपी ओलीले माग पुरा नगरे मात्रै विकल्प सोच्न सकिने उनको तर्क छ।

तर, जसपाकै अर्का अध्यक्ष उपेन्द्र यादवले संघीय लोकतान्त्रिक गणतन्त्र र संविधान जोगाउनकै लागि भएपनि ओलीलाई हटाउनुको विकल्प नभएको बताए। शुक्रबारको बैठकमा पनि प्रचण्ड, देउवा र रामचन्द्र पौडेलले ओलीले गर्ने काम आफूहरू सरकारमा गएर गर्ने भन्दै संयुक्त सरकारमा सहभागी हुन आग्रह गरेका थिए।

‘प्रचण्ड, देउवा, रामचन्द्र पौडेलजीहरूले जुन मुद्दा केपी ओलीले खारेज गर्न सक्छन्। त्यो गर्न हामीले पनि सक्छौं, मिलेरै सरकार बनाएपछि आफैं गर्ने किन केपी ओलीको पछि लाग्ने? भन्नुभयो। हामीले जे जति गर्न सक्छौं त्यो सरकारमै बसेर गरौंला भन्नु भएको छ’ यादवले भने, ‘यो प्रस्ताव पार्टीमा आजै आयो। पार्टीमा छलफल गरेर निर्णय गर्छौं। यी विषयमा पार्टीमा छलफल गरेर छिटोभन्दा छिटो निर्णय गरेर अघि बढ्छौं।’

ओली नेतृत्वको सरकारको विकल्प खोज्न लामो समयदेखि लागेको बताउँदै यादवले सत्ता साझेदारी गरेर जान नसकिने स्पष्ट पारे। जसपाले ओलीसँग बन्दी रिहा, मुद्दा फिर्ता गर्ने विषयमा मात्रै छलफल भएको यादवले बताए।

मुद्दा फिर्ताका सम्बन्धमा जसपा (महन्थ-राजेन्द्र पक्ष) र सरकारले कार्यदल बनाएर काम गरिरहेका छन्। तर, कार्यदलका विषयमा यादव पक्षले खासै रूचि देखाएको छैन।

प्रधानमन्त्री ओलीको निरन्तरता वा नयाँ सरकार भन्ने विषयमा जसपा नै निर्णायक छ। जसपाको निर्णयले नै आगामी राजनीतिको बाटो तय गर्नेछ। र, यसका लागि केही दिन पर्खनै पर्छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।