काठमाडौं- नेपाल प्रहरीले बरामद गरेको युरेनियम–२३८ को अनुसन्धान फाइल सरकारी वलिक कार्यालयमा पुगेको छ। अनुसन्धान सकेर आइतबार फाइल सरकारी वकिल कार्यालमा पठाइएको महानगरीय प्रहरी परिसर काठमाडौंका एसएसपी अशोक सिंहले बताए।
रेडियोधर्मी पदार्थ (उपयोग तथा नियमन) ऐन, २०७७ अन्तर्गतको कसूरमा अनुसन्धान सकेर फाइल बुझाइएको एसएसपी सिंहले बताए। महानगरीय प्रहरी कार्यालय रानिपोखरीको विशेष टोलीले गत फागनु २८ गते साढे २ किलो युरेनियम–२३८ सहित ४ जनालाई पक्राउ गरेको थियो।
रामेछाप लिखु तामाकोशी–५ बस्ने ४० वर्षीय नारायणसिंह तामाङ, सोही ठाउँकी ४० वर्षीया जानुका तामाङ, रामेछापकै मन्थली नगरपालिका–४, का २० वर्षीय प्रकाश चौहान र सिन्धुलीको सुनकोशी–४ बस्ने २० वर्षीय मनोज न्यौपानेलाई प्रहरीले पक्राउ गरेको थियो।
प्रहरीले बरामद गरेको युरेनियम २० वर्षअघि नेपाल भित्रिएको अनुसन्धानबाट खुलेको थियो। भारतको एक खानीमा काम गर्ने अमर लामा भन्ने व्यक्तिले २० वर्षअघि उक्त युरेनियम ल्याएको प्रहरीको भनाइ छ। लामा हाल अमेरिकामा छन्।
बरामद भएको युरेनियम लामाकी बुहारी जानुकासँग थियो। आफ्नो विवाह हुनुभन्दा अघिनै उक्त पदार्थ घरमा भएको जानुकाले बयानमा बताएकी छिन्। आफूलाई युरेनियम हो भन्ने थाहा नभएको तर, ससुराले पुरानो वस्तु हो घरमा राख्दा राम्रो हुन्छ भनेपछि राखेको उनको बयान छ।
पुराना सामानको किनबेच गर्दै आएका नारायणसिंहले उक्त पदार्थ महंगोमा बिक्री हुनसक्ने भन्दै थोरै लिएर गएको र पछि महंगोमा बिक्री हुने वस्तु रहेछ, करोड भन्दा बढी रकम आउँछ भनेपछि आफू पनि बेच्न तयार भएको प्रहरीसमक्ष बयान दिएकी छिन्। जानुकाले भने आफूलाई युरेनियम हो भने जानकारी नै नभएको दाबी गर्दै आएकी छिन्।
चिनियाँ ल्याबले भन्यो : बरामद वस्तु युरेनियम–२३८
राष्ट्रिय विधि विज्ञान प्रयोगशाला (नास्ट)मा जाँच गर्दा प्रहरीले बरामद गरेको पदार्थ अप्रशोधित युरेनियम (युरेनियम–२३८) भएको रिपोर्ट आएको थियो। त्यसपछि थप जाँचका लागि चीन पठाइएको थियो।
बरामद साढे २ किलो अप्रशोधित युरेनियमको मात्रा कति छ भनेर जाँच गर्न चीन पठाइएको थियो। चीनको रिपोर्ट समेत आइसकेको एसएसपी सिंहले बताए। चिनियाँ ल्याबले बरामद युरेनियम कच्चा पदार्थ अर्थात् युरेनियम–२३८ नै भएको रिपोर्ट दिएको एसएसपी सिंहले बताए।
यसअघि दुई पटकसम्म नास्टमा जाँच गर्दा प्रहरीले बरामद गरेको पदार्थ अप्रशोधित युरेनियम रहेको भन्ने रिपोर्ट आएको थियो। युरेनियम–२३८ अप्रशोधित युरेनियम हो। यसलाई प्रशोधित गरेपछि युरेनियम–२३५ बनाइछ।
सम्बन्धित समाचार :
प्रहरीले बरामद गरेको युरेनियम-२३८ थप जाँचका लागि चीन पठाइयो
काठमाडौंमा २० वर्षदेखि लुकाइएको थियो युरेनियम, कहाँबाट आयो, कहाँ थियो गन्तव्य?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
