काठमाडौं– जुम्लाको तिला गाउँपालिका–९ ढिपु गाउँको मुल्लीमा आगलागी हुँदा ३५ घर जलेर नष्ट भएका छन्।
मुल्ली गाउँमा रहेकामध्ये ३५ घर जलेर नष्ट भइसकेको वडा अध्यक्ष शेरबहादुर बोहोराले बताए।
मुल्ली ढिपु गाउँको वर्षायाममा ६ महिना बस्ने बस्ती हो। यो समयमा हिमपात हुने र अत्यधिक चिसो हुने भएकोले सबै ढिपु गाउँमा बसेका छन्।
मुल्लीमा वर्षायाममा भण्डारण गरिराखेको अन्नपात सबै जलेको वडाध्यक्ष बोहोराले बताए।
आगो नियन्त्रण बाहिर रहेको बताउँदै उनले गाउँमा प्रर्याप्त पानी नभएको कारण आगो नियन्त्रणमा आउन नसकेको जानकारी दिए।
आगलागी भएको खबर पाउने बित्तिकै तत्काल उद्धारको लागि नेपाल प्रहरी र सशस्त्र प्रहरीको टोली आगलागी भएका घटनास्थलतिर पठाइसकेको प्रमुख जिल्ला अधिकारी भुपेन्द्र थापाले बताए।
शनिबार राति नै सदरमुकाम खलंगादेखि गएको २० जनाको प्रहरी टोली बिहानमात्र घटनास्थल पुगेकोउनको भनाइ छ।
सदरमुकामबाट घटनास्थल पुग्न पाँच घण्टा लाग्ने भएकाले क्षतिको पूर्ण विवरण अझै आउन नसकेको उनले बताए।
हाल आगाे पूर्ण नियन्त्रणमा नआए पनि केही कम भएकाे र सुरक्षाकर्मीकाे टाेली तथा स्थानीयले नियन्त्रणकाे प्रयास जारी राखेकाे खबर आएकाे जिल्ला प्रहरी कार्यालयका डिएसपी दानबहादुर थापाले बताए।
घरगाेठ तथा अन्नपात जलेर नष्ट भए पनि कुनै मानवीय क्षति भने नभएकाे उनकाे भनाइ छ। उक्त क्षेत्रमा फाेन सम्पर्क समेत हुन नसक्ने भएकाले क्षतिकाे यकीन विवरण आउन भने केही समय लाग्ने उनकाे भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
