काठमाडौं- गृह मन्त्रालयले सोमबार रूपन्देहीका प्रमुख जिल्ला अधिकारी (सीडीओ) पिताम्बर घिमिरेलाई अचानक त्यहाँबाट हटाएर पर्साको प्रमुख जिल्ला अधिकारीमा सरुवा गर्यो। उनको ठाउँमा पर्साका सीडीओ अस्मान तामाङलाई पठाइयो। सोमबार नै गृहको निर्देशनमा प्रहरी प्रधान कार्यालयले रूपन्देहीका प्रहरी प्रमुख, एसपी प्रवीण पोखरेललाई मुख्यालय तानेर उनको ठाउँमा मनोज केसीलाई पठायो।
सीडीओ र जिल्ला प्रहरी प्रमुख मात्र होइन, सोमबार गृह मन्त्रालयकै निर्देशनमा सशस्त्र प्रहरी बलका रूपन्देही प्रमुख पनि जिम्मेवारीबाट हटाइए। सशस्त्र प्रहरी प्रधान कार्यालयले २७ नम्बर गण रूपन्देहीका गणपति, एसपी भरत खनियाँलाई हेडक्वार्टर तानेर उनको ठाउँमा एसपी राजु सुवेदीलाई पठाएको छ।
उनीहरू तीनै जनाको सरुवा गरिएको पुष्टि गरेपनि गृह मन्त्रालयका प्रवक्ता चक्रबहादुर बुढाले सरुवाको कारणबारे भने खुलाउन चाहेनन्। उनले भने, ‘आवश्यकता अनुसार सरुवा गरिएको हो।’
जानकार स्रोतका अनुसार तीनै जनाको जिम्मेवारी खोसिनुको मुख्य कारण भने अर्थमन्त्री विष्ण पौडेल हुन्। पौडेलकै दबाबमा गृह मन्त्रालयले तीनै जनाको जिम्मेवारी खोसेको स्रोतले नेपाल लाइभलाई बतायो।
गत फागुन १२ गरे रूपन्देहीको मोतिपुर औद्योगिक क्षेत्र शिलान्यास गर्न पुगेका अर्थमन्त्री पौडेल र उद्योग, वाणिज्य तथा आपूर्तिमन्त्री लेखराज भट्टलाई आक्रोशित स्थानीयले ढुंगामुढा गर्दै लखेटेका थिए। त्यही घटनालाई आधार बनाएर तीनै जनाको सरुवा गरिएको हो। सरुवा गरिएका तीनै जनालाई ‘मन्त्रीहरूलाई राम्रोसँग सुरक्षा दिन नसकेको’ आरोप लागेको छ।
सरुवा भएका तीन जनामध्ये सशस्त्रका एसपी खनियाँ भने अर्थमन्त्री पौडलकै कारण आकर्षक ठाउँको जिम्मेवारी पाएका अधिकृत हुन्। रोचक त के भने जसको जोडबलमा खनियाँले इन्चार्जको जिम्मेवारीमा ‘ह्याट्रिक’ गरे, उनैलाई सुरक्षा दिन नसकेको भन्दै जिम्मेवारीबाट हटाइनुपरेको छ। पटक-पटक विवादमा परेका र सशस्त्र प्रहरी हेडक्वार्टरले कारबाही गर्न खोज्दा शक्तिकेन्द्रसँगको पहुँचका कारण जोगिँदै आएका खनियाँको इन्चार्जको जिम्मेवारीमा ह्याट्रिक श्रृंखला भने रोचक छ।
आफ्नै ब्याचीको सरुवामा समेत इन्चार्ज
गत पुस ५ गते सशस्त्र प्रहरी प्रधान कार्यालयले दुईजना एसपीको काज सरुवाको सूची निकाल्यो। २७ नम्बर गण रूपन्देहीमा कार्यरत एसपी तेजप्रसाद पोखरेलको एक वर्ष पुगेकाले उनको ठाउँमा सशस्त्र प्रहरी बलको खेलकुद तथा शारीरिक सुगठन शिक्षालय काठमाडौंमा कार्यरत एसपी शंकर खनालको सरुवा सूची निकालिएको थियो।
सिसं ४ व्यवस्थापन तथा योजना तालिमको समापन कार्यक्रम सकेर तीन सातापछि सरुवा भएको ठाउँ रूपन्देही जान एसपी खनालले दिउँसो २ बजेको हवाई टिकट समेत लिइसकेका थिए। त्यसको दुई घण्टा अघि नै हेडक्वार्टरले एसपी खनाललाई तत्काल रूपन्देही नजान भन्यो। हेडक्वार्टरको आदेशपछि उनी रोकिए। एसपी खनाल रोकिनुको कारण भने उनकै ब्याची, एसपी भरत खनियाँ थिए।
भारतीय सीमासँग जोडिएका तराईका जिल्लालाई ‘पोस्टिङ’का लागि आकर्षक मानिन्छ। कारण हो, सीमाक्षेत्रमा हुने सक्ने ‘कमाई’को आकर्षण। त्यही आकर्षणकै कारण एसपी खनियाँले चलखेल गरेर खनाललाई पन्छाए र २७ नम्बर गण रूपन्देहीको इन्चार्ज बने।
त्यसअघि उनी ३६ नम्बर गण डोटीको प्रमुख भइसकेका थिए। डोटीमा गण प्रमुख भएकै बेला अर्थमन्त्री विष्णु पौडेलको निकट मानिएका उनी त्यहाँबाट पौडेलकै गृहजिल्ला रूपन्देही पुगेका थिए। जबकि एसपी खनियाँको दरबन्दी अहिले पनि डोटीमै छ।
शक्तिकेन्द्र रिझाएर इन्चार्जमा ‘ह्याट्रिक’
सशस्त्र प्रहरी बलमा सामान्यतया ‘इन्चार्ज टु इन्चार्ज’ सरुवा नहुने अभ्यास छ। अर्को व्यक्तिले इन्चार्ज नपाएको अवस्था छ भने सामान्यतया इन्चार्जबाट इन्चार्जमै सरुवा नगरिने सशस्त्र प्रहरी बलका प्रवक्ता, डीआइजी राजु अर्याल बताउँछन्।
एकै व्यक्तिलाई इन्चार्जबाट इन्चार्जमै सरुवा गर्दा अर्को व्यक्तिले अवसर नपाउने र नेतृत्व विकास, वृत्ति विकास र सुरक्षा व्यवस्थामा समेत असर पर्ने भएकाले सामान्यतया यस्तो सरुवा गरिँदैन। तर, एसपी खनियाँ त्यसमा अपवाद ठहरिएका अधिकृत हुन्। उनले इन्चार्जमा ‘ह्याट्रिक’ नै गरे।
डोटीको ३६ नम्बर गण प्रमुखबाट रूपन्देहीको २७ नम्बर गण प्रमुख बनेका उनी डोटी अघि पश्चिम नवलपरासीको २६ नम्बर गण प्रमुख थिए। संगठनकै नीति र अभ्यासविपरीत एसपी खनियाँले इन्चार्जको जिम्मेवारी कसरी पाए त? सशस्त्र प्रहरी प्रधान कार्यालय स्रोत भन्छ, ‘उहाँलाई संगठनले चाहेर इन्चार्ज टु इन्चार्जमा जिम्मेवारी दिएको होइन। थेग्न नसकिने दबाब आएपछि त्यहीअनुसार गरेको हो।’
सशस्त्र प्रहरी हेडक्वार्टर स्रोतका अनुसार खनियाँ एमाले नेता तथा अर्थमन्त्री पौडेलको निकट छन्। उनी डीएसपी हुँदा पनि बुटवलस्थित औद्योगिक सुरक्षा गुल्मको गुल्मपति थिए। बुटवलमा कार्यरत हुँदा नेता पौडलसँग खनियाँको सम्बन्ध राम्रो बाक्लिएको हो। त्यसपछि नै उनले आकर्षक ठाउँमा इन्चार्जको जिम्मेवारी पाइरहेको सशस्त्र प्रहरी हेडक्वार्टर स्रोत बताउँछ।
छानबिन भएर पनि रोकिएको ‘कारबाही’
एक वर्षअघि सुरु भएको लकडाउनका बेला एसपी खनियाँ २६ नम्बर गण, पश्चिम नवलपरासीको प्रमुख थिए। त्यहाँ पैसा लिएर तस्करलाई छाडिरहेको गुनासो तीब्र थियो। त्यहीबेला खनियाँकै गणका एक सशस्त्र प्रहरी जवान घुस लिएको रकमसहित समातिएका थिए।
एसपी खनियाँविरुद्ध पनि गुनासो आएपछि शसस्त्र प्रहरी प्रधान कार्यालयले छानबिनका लागि प्रदेश ५ कार्यालयमा कार्यरत एसपी तीर्थ पौडेलको संयोजकत्वमा छानविन समिति गठन गरेको थियो। समितिले एसपी खनियाँमाथि कारबाही गर्नुपर्ने रायसहित प्रतिवेदन बुझाए पनि उनीमाथि कारबाही अघि बढेन।
डोटीमा दर्बन्दी हुँदाहुँदै उनी रूपन्देहीको गण प्रमुख बनेर आउँदा पनि कारबाही गर्नुपर्ने कुरा उठेको थियो। इन्चार्ज हुँदाहुँदै संगठनको 'चेन अफ कमाण्ड'लाई अस्वीकार गरी शक्तिकेन्द्र रिझाएर पुनः अर्को ठाउँमा इन्चार्ज हुन खोजेको भन्दै सशस्त्र प्रहरी हेडक्वार्टरले नै एक्सन लिन खोजे पनि उनी शक्तिकेन्द्रकै दबाबमा कारबाही रोक्न सफल भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791196217.png)
-1791194094.png)
-1786602170.png)
-1791090469.jpeg)
