काठमाडाैं- म्यानमारमा सैन्य ‘कू’ विरुद्धकाे प्रदर्शनमा ज्यान गुमाएकाहरुकाे सम्झनामा मैनबत्ती जुलुस निकालिएकाे छ। साेमबार राति देशको सबैभन्दा ठूलो सहर यङ्गुनको अहलोन जिल्लामा सयौं व्यक्तिहरूले मैनबत्ती जुलुस निकालेका हुन्।
सुरक्षा बलले जारी प्रदशर्नमा गरेकाे दमनबाट ज्यान गुमाउनेकाे संख्या २६१ पुगेकाे द एसिस्टेन्स एशोसिएसन फर पोलिटिकल प्रिजनर्स (एएपीपी) ले जनाएको छ।
म्यानमारका स्थानिय मिडियाहरुका अनुसार सोमबार दोस्रो शहर मन्डालेमा १ वर्षीय बालकसहित कम्तिमा आठ व्यक्तिको मृत्यु भएकाे थियाे।
यता मिज्जिमा समाचार सेवाले पनि सोमबार राति याेङगुनका केही भागमा गोली चलेकाे र केही व्यक्ति घाइते भएकाे जनाएकाे छ। तर, कसैकाे मृत्यु भए/ नभएकाे खुलाइएकाे छैन।
गत नोभेम्बरमा सम्पन्न चुनावमा नेशनल लिग फर डेमोक्रेसी (एनएलडी)ले ठूलो जीत हासिल गरेकाे थियाे। उक्त मतगणना पछि राष्ट्रपति विन मिन्ट र एनएलडीकी प्रमुख नेतृ सू चीसहित अधिकांश नेताहरुलाई सेनाले पक्राउ गरेर सैन्य शासन लागु गरिएकाे थियाे। त्यसयता म्यानमारमा सेनाविरुद्ध प्रदर्शन जारी छ।
यसैबीच सेनाले नयाँ चुनावको आश्वासन दिएका छन् तर मिति तोकेका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
