काठमाडौं- प्रथम खुल्ला साइनो मेयर कप ब्याडमिन्टन प्रतियोगिताको उपाधि सिल्क ग्रुपका प्रिन्स दाहाल र आर्मी क्लबकी अनुमाया राईले जितेका छन्।
पुरुष एकलतर्फ एपिएफका दीपेश धामीलाई पराजित गर्दै प्रिन्सले उपाधि जितेका हुन्। उनले दीपेशविरुद्ध २३-२१ र २१-१८ को जित निकाले। विजेता बनेका प्रिन्सले ५० हजार रुपैयाँ हात पारे। उपविजेतामा चित्त बुझाएका दीपेशले ३० हजार रुपैयाँ पाए। तेस्रो स्थानमा रहेका पुलिस क्लबका विष्णु कटुवाल र सेनाका रुकेश महर्जनले १०-१० हजार रुपैयाँ पाए।
आइतबार सांगलास्थित साइनोको कभर्डहलमा भएको महिला एकलतर्फको प्रतिस्पर्धामा आफ्नै क्लबकी अमिता गिरीलाई २१-१० र २१-१७ को सोझो सेटमा पराजित गर्दै अनुमाया राईले उपाधि जितिन्। अनुमायाले ३० हजार रुपैयाँ पारिन्। उपविजेता बनेकी अमिताले १५ हजार रुपैयाँ पाइन्।
साइनो स्पोर्ट्स हलको आयोजनामा भएको प्रतियोगिताको पुरुष युगलतर्फ हिमालयन क्लबका विशाल बस्नेत र झापाका प्रनिशसिंह ठकुरीको जोडीले आयोजक साइनोका अभिषेक बोश र सुजन थापाको जोडीलाई हराउँदै उपाधि जिते। विशाल र प्रनिशको जोडीले २१-१७, १६-२१ र २१-१७ को सेटमा जित निकाले। विजयी जोडीले ५० हजार रुपैयाँसहित ट्रफी जिते। उपविजेता जोडीले ३० हजार रुपैयाँ पाए।
पुरुष भेट्रान ४५ तर्फ ज्येष्ठ ब्याडमिन्टन एकेडेमीका श्याम पराजुली र नविन बाबु श्रेष्ठको जोडी विजयी भयो। उक्त जोडीले परफेक्ट फिटनेश क्लबका पूर्णहरि होना र संजय कपालीको जोडीलाई १२-२१, २२-२० र २१-१६ ले पराजित गरेको हो। विजयी जोडीले ४० हजारसहित ट्रफी हात पारे। उपविजेता जोडीले २५ हजार पाए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।