राजेन्द्र महतो भन्छन्- ‘हामीलाई सत्ताको लोभी देखाएर मार्न खोजिँदैछ’

राजनीति

वीरेन्द्र ओली बुधबार, फागुन २६, २०७७ १८:१७

काठमाडौं- प्रतिनिधि सभाको चौंथो ठूलो दल जनता समाजवादी पार्टी (जसपा) यतिखेर चर्चामा छ। सर्वोच्च अदालतले सत्तारुढ नेपाल कम्युनिस्ट पार्टी (नेकपा)ले वैधता नपाउने फैसला सुनाएपछि सत्तारुढ दल तत्कालीन एमाले र माओवादी केन्द्रका रुपमा ब्युँतिएका छन् र त्योसँगै प्रधानमन्त्री ओली अल्पमतमा परेका छन्।

किनभने माओवादी केन्द्रले एमालेका अध्यक्ष ओली नेतृत्वको सरकारलाई दिएको समर्थन फिर्ता लिने निश्चितप्रायः छ। योसँगै ओलीलाई आफ्नो सरकार जोगाइराख्न वा एमालेइतरका दलले अर्को सरकार बनाउन जसपाको साथ अपरिहार्य छ।

यहीकारण हुनसक्छ, मंगलबारदेखि जसपा सरकारमा जान थालेको चर्चा चुलिएको छ। जसपाभित्र पनि अध्यक्ष महन्थ ठाकुर र वरिष्ठ नेता राजेन्द्र महतोले प्रधानमन्त्री ओलीसँगै सत्ता सहकार्यका लागि जोडबल गरिरहेको चर्चा हुनथालेको छ। बुधबार हामीले महतोलाई यही विषयमा सोध्यौं- तपाईंहरु प्रधानमन्त्री ओली नेतृत्वको सरकारमा जाँदै हुनुहुन्छ?

महतोले ओली नेतृत्वको सरकारमा जाने भनेर आफ्नाबारे ‘वाहियात कुरा आइरहेको’ टिप्पणी गरे। साथै उनले विगतका सरकारले उधारो सहमति मात्र गरेकाले यसपालि नगदमा सहमति भए मात्र आफूहरु सरकारमा जाने दाबी गरे।

‘सरकारमा जाने भनेर हाम्राबारे सबै वाहियात कुरा आइराखेका छन्, हामीलाई सत्ताको लोभी देखाएर मार्न खोजिँदैछ’, महतोले नेपाल लाइभसँग भने, ‘मिडियाहरु शासनसत्तामा बसेकाहरुको औजारको रुपमा काम गर्दोरहेछन्। मिडियाहरु उस्तै प्रायोजित हुन्छन्। हामीबाट चलेका मिडिया छैनन्, शासकबाट पालितपोलित मिडिया मात्र छन्। त्यसैले उल्टोपाल्टो मात्र देख्दा रहेछन्।’

जसपाको सरोकार आफ्ना मुद्दासँग मात्र भएको, सत्तासँग नभएको उनले दाबी गरे। ‘जसपा आफूले उठाएका मुद्दाको साथमा छ। मुद्दा सम्बोधन भएन भने सत्ताको ‘स’पनि उच्चारण गर्दैनौं। विगतमा पनि हामीलाई ठग्ने प्रवृत्ति भयो। उधारो सहमति गर्दै, ठगिँदै जाने भयो, त्यसले पार लाग्ने देखिएन। हामीले उठाएका सबै मागहरु पूरा गरिनुपर्छ’, महतोले भने। महतोले आफ्ना माग जसले पूरा गर्छ, उसैलाई सहयोग गरेर जाने स्थिति बन्ने बताए।

जेलमा रहेका आफ्नो पार्टीका सांसद रेशम चौधरीलाई छाडेर मात्र नहुने भन्दै महतोले संविधान संशोधन लगायत आफ्ना सबै मुद्दाको सम्बोधन प्याकेजमा हुनुपर्ने पनि उल्ललेख गरे। ‘जसले हाम्रा माग पूरा गर्छ, त्यसैलाई सहयोग गर्ने हो। रेशम चौधरीलाई छाडेर मात्रै हुँदैन’, उनले भने, ‘संविधान संशोधन लगायत सबै मुद्दालाई नगदमा सम्बोधन गर्नुपर्छ। सबै मुद्दा सम्बोधन गर्न तयार भए धन्यवाद पनि दिने सहयोग पनि गर्ने हो।’

उनले विगतमा ओलीलाई सहयोग गरे पनि केही नभएको र अब किन गर्ने भन्ने प्रश्नसमेत गरे। ‘हिजो माग पूरा नगरेपछि आज गर्नुहुन्छ भन्ने विश्वास के?’, महतोले भने, ‘अब हुन्छ बहादुर भएर होइन, गर्छु बहादुर हुनुपर्‍यो। पहिले गरेर देखाउनुपर्‍यो।’

महतोले आफूहरुलाई ‘सत्ता सत्ता’ भनेर बदनाम गरिएको दुःखेसो पनि गरे। ‘देशमा नश्लवादी चिन्तन बोकेकाको हालीमुहाली छ, हाम्रा मुद्दालाई विषयान्तर गर्ने, जहिले पनि हल्का रुपमा लिने गर्छन्। संविधान घोषणा भएपछि असन्तुष्ट हुँदा यहाँका नश्लवादीहरुले के भने?’, उनले भने, ‘हामी संविधान संशोधनका लागि लडिरहँदा त्यो आन्दोलनलाई भारतको आन्दोलन भनियो। हामी त्यसको मार अहिले पनि भोगिरहेका छौं।’ आफूहरुलाई सत्तासँग मात्र जोडेर लोभीपापी देखाउने र 'ब्ल्याकमेल' गर्ने क्रम चलिरहेको दुःखेसो पनि उनले गरे।

जसपाका नेता ठाकुर र महतोले बुधबार माओवादी केन्द्रका अध्यक्ष पुष्पकमल दाहाल ‘प्रचण्ड’लाई भेटेका थिए। ‘प्रचण्डसँग हामीले भन्यौं- मुद्दाका लागि लडेको हो, मरेको हो, संविधान बनाउँदा सबै मिलेर त्यस्तो संविधान बनाइदिनुभयो। त्यतिबेला पनि लडियो, अहिले पनि लडेकै छौं’, उनले भने, ‘हामी ओली, प्रचण्ड र देउवालाई खाली समर्थन गर्नलाई मात्रै जान्मेका होइनौं। शोषण, उत्पीडनमा परेका जनताको सेवा गर्न जन्मेका हौं। के उनीहरुका कुनै समस्या र माग छैनन्?’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।