काठमाडौं- सर्वोच्च अदालतले बाल यौन दुराचारको अभियोगमा अमेरिकी नागरिक केन्नेथ जोसेफ कम्बोसलाई ९ वर्ष कैद हुने फैसला सदर गरेको छ। जबरजस्ती करणीको अभियोग सरह सजाय हुने जिल्ला र उच्च अदालतको फैसलालाई सर्वोच्चले सदर गरेको हो। त्यस्तै पीडित बालबालिकालाई जनही ५० हजार जरिवाना दिन पनि सर्वोच्चले भनेको छ।
न्यायाधीशद्वय दीपककुमार कार्की र कुमार रेग्मीको इजलासले पीडितलाई क्षतिपूर्ति दिन र पीडक कम्बोसलाई ९ वर्ष कैद सजाय हुने फैसला सदर गरेको हो।
आफूलाई धेरै सजाय गरिएको दाबी गर्दै कम्बोस २०७५ भदौ ६ गते सर्वोच्च पुगेका थिए। २०७७ माघ ८ गते उनले आफूलाई बढी अवधि थुनामा राखेको दाबी गर्दै दोस्रो पटक बन्दीप्रत्यक्षीकरणको निवेदन दायर गरेका थिए। उनले दायर गरेको बन्दीको निवेदन सर्वोच्चले खारेज गर्दै तल्लो तहका अदालतले गरेको फैसलालाई सदर गरेको हो।
मुलुकी ऐन २०२० कार्यान्वयन भएको अवस्थामा कसुर गरेको तर अपराध संहिता २०७४ अनुसार आफूलाई कैद सजाय सुनाइएकाले पुरानै व्यवस्था अनुसार सजाय हुनुपर्ने भन्दै कम्बोस सर्वोच्च पुगेका थिए।
कम्बोस एप्स डिजाइनर भएको बताउँदै दुराचारमा संलग्न भएका थिए। उनलाई जिल्ला अदालत काठमाडौंले बाल यौन दुराचार गरेको पुष्टि गर्दै ९ वर्ष कैद र ५० हजार रुपैयाँ जरिवानाको फैसला सुनाएको थियो। उनी अहिले कैद जीवन बिताइरहेका छन्।
केन्नेथका सहयोगीको सजाय पनि सदर
कम्बोसलाई बालक उपलब्ध गराउने काठमाडौंको स्वयम्भूका २१ वर्षीय ‘लुच्चे’ भनिने बुद्ध पतुवारलाई ४ वर्षको कैद सजाय सुनाइएको छ। उनले कम्बोसलाई १२/१४ वर्षका बालबालिका उपलब्ध गराउँथे। काभ्रे स्थायी घर भएका पुतुवारले बालकहरूलाई प्रलोभनमा पारी केन्नेथसम्म पुर्याइदिने काम गर्ने गरेको अभियोगमा जिल्ला र उच्चले दोषी ठहर गर्दै ४ वर्षको कैद सजाय सुनाएको थियो। पतुवारका हकमा पनि तल्लो तहका अदालतले गरेको फैसला सर्वोच्चले सदर गरेको हो।
पुतुवार यौन दुराचार गर्नेहरुका लागि बालबालिका उपलब्ध गराउने गर्दथे। उनी दलित तथा गरिब बस्तीहरूमा पुगेर यस्ता बालबालिकाको खोजी गर्दथे। पैसादेखि विदेश लैजानेसम्मको प्रलोभन देखाएर उनी बालबालिका अभिभावकबाट फकाउने गर्दथे। पुतुवार ती बालकको तस्बिर केन्नेथलाई पठाउँथे। केन्नेथले छानेको बालकलाई स्वयम्भुस्थित आफ्नो कोठामै ल्याउँथे र केन्नेथलाई उपलब्ध गराउथे। विदेशी बाल यौन दुराचारीलाई सहयोग गरेको र बालक उपलब्ध गराएको तथा दुराचारको मतियार भएको प्रमाणित गर्दै जिल्ला अदालत काठमाडौंले बुद्ध पुतुवारलाई समेत कैदको कैद सजाय सुनाएको थियो।
कम्बोसका मुख्य सहयोगी रुपमा रहेका उनी लुच्चे भनेर पनि चिनिन्थे। पतुवार काभ्रे, सिन्धुपाल्चोक, रामेछाप, दोलखा पुगेर अभिभावकको माया नपाएका बालकहरूलाई प्रलोभन दिई काठमाडौं ल्याउने गरेका थिए।
पतुवारले बालबालिकाको फोटो र भिडियो खिचेर भाइबर, हवाट्स एप र विच्याटमार्फत विदेशी यौन दूराचारीलाई पठाउने र दूराचारीले बालबालिका हेरेर माग गर्ने गरेको खुल्न आएको थियो।
विदेशी दूराचारीले फोटो र भिडियोमार्फत छानेर बालबालिका छानेर नेपाल आउने गरेका थिए। विदेशीको माग अनुसार लुच्चेले नगरकोट, धुलिखेल, ककनीका साथै काठमाडौंमा नै रहेको पाँचतारे होटलहरुमा बालक पुर्याउने गरेका थिए।
५० वर्ष कैद सजाय!
कम्बोसविरुद्ध १० वटा भन्दा बढी मुद्दा दायर भएका थिए। ती मुद्दामा अदालतले करिब ५० वर्ष बराबर कैद सजाय हुने फैसला सुनाएको थियो। सबै मुद्दाको कैद सजाय जोड्ने हो भने ५० वर्षसम्म पुग्ने सजाय भएको महान्यायाधिवक्ता कार्यालयका प्रवक्ता सञ्जीवराज रेग्मीले बताए। तर अधिकतम सजाय मात्र लागू हुने भएकाले ९ वर्ष बराबरको कैद सजाय हुने उनले बताए।
जिल्ला अदालतले २०७४ वैशाख १० गते उक्त मुद्दामा फैसला गर्दै केन्नेथलाई दोषी ठहर गरेको थियो। केन्नेथलाई ९ वर्षको कैद र पीडित बालकमध्ये १६३ र १६५ कोडका बालकलाई जनही ५० हजार रुपैयाँ क्षतिपूर्ति भराउन आदेश जिल्ला अदालतले शुरुमा गरेको थियो। जिल्ला अदाललते अन्य मुद्दामा पनि यही फैसला गरेको थियो। उच्च अदालत (पुनरावेदन) पाटनले पनि यही फैसला सदर गरेको थियो। केन्नेथ घुम्ने क्रममा सडक बालबालिका वा अभिभावकको रेखदेख नभएको बालक देखेमा उनीहरुलाई आफ्नो लक्ष्य बनाउने गर्दथे।
बाल यौन दूराचारको आरोपमा २०७३ भदौ २४ गते अमेरिकी नागरिक केन्नेथ जोसेफ कम्बोस पक्राउ परेका थिए। उनी ६ पटकसम्म नेपालमा यौन दूराचारमा संलग्न भएको तथ्य प्रहरीले फेला पारेको थियो।
अमेरिकाको इलिनोइस घर बताउने ४८ वर्षिय कम्बोसलाई ठमेलको याम्बु होटलबाट ५ जना बालकहरुसहित प्रहरीले पक्राउ गरेको थियो। उनको साथबाट प्रहरीले मोबाइल र ल्यापटपबाट नग्न तस्बिर र भिडियोहरु बरामद गरेको थियो।
केन्नेथ अमेरिकाको इन्डियाना राज्यमा प्रहरीको फरार अपराधीको सूचीमा भएका व्यक्ति थिए। इन्डियाना प्रहरीले यौन दूराचारकै आरोपमा उनलाई २०११ देखि फरार अपराधीको सूचीमा राखेको थियो। फरार अपराधी भएको थाहा पाएपछि प्रहरीले उनको बारेमा इन्टरपोलसँग आपराधिक विवरण माग गरेको थियो। कम्बोसबाट ८ बालबालिका पीडित भएको पाइएको थियो।
यस्तो छ कानुनी व्यवस्था
मुलुकी अपराध (संहिता) ऐन २०७४ को दफा २२५ मा 'बाल यौन दुराचार गर्न नहुने' उल्लेख छ। ‘बाल यौन दुराचार गर्न गराउन नहुने र कसैले करणीका आशयले बालबालिकालाई अस्वाभाविक रूपमा एकान्तमा लगेमा, यौनसम्बन्धी अङ्ग छोएमा वा छुन लगाएमा बाल यौन दुराचार गरेको मानिने’ उल्लेख गरिएको छ।
बालबालिकासँग कुनै किसिमको यौनजन्य व्यवहार गरेमा समेत यौन दुराचार मानिने संहितामा बताइएको छ। बाल यौन दुराचारको घटनामा दोषी ठहर भए तीन वर्षसम्म कैद र ३० हजार रूपैयाँसम्म जरिवाना हुने व्यवस्था गरिएको छ। त्यस्तै, बालबालिकालाई अप्राकृतिक मैथुन गरेमा पीडितको उमेरका हिसाबले १० वर्षदेखि २० वर्षसम्म जेल सजाय हुने व्यवस्था छ। पीडित बालबालिकालाई पीडकबाट क्षतिपूर्तिसमेत भराउनु पर्ने उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
