काठमाडाैं– वाग्मती प्रदेशको राजधानी हेटौंडा बजारमा अवस्थित क्याम्पाडाँडा नजिकको खेलमैदानलाई मिनी रंगशाला निर्माण सुरु भएको छ।
खेलमैदानको वरपर आठ लेनको ४०० मिटर लामो एथलेटिक्स ट्र्याक निर्माण सुरु भएको हो । ट्र्याक निर्माणका लागि हेटौंडा उपमहानगरपालिकाले चालु आर्थिक वर्ष २०७७\७८ मा ११ लाख रुपैयाँ बजेट उपलब्ध गराएको छ। मकवानपुरमा एथ्लेटिक्स ट्र्याक हालसम्म निर्माण भएको थिएन।
यसअघि जिल्ला एथलेटिक्स संघ मकवानपुरले हुप्रचौरभित्र ट्र्याक निर्माण गर्ने नाममा केही रकम खर्च गरेर योजना बीचैमा अलपत्र बनाएको थियो। अब क्याम्पाचौरमा एथलेटिक्स ट्र्याक निर्माणले पूर्णता पाउने हेटौंडा–५ का वडाध्यक्ष राजेश बानियाँले जानकारी दिए।
यस वर्ष प्यारापिटको जग निर्माण गरिसक्ने र आगामी वर्ष माथिल्लो भाग निर्माण सक्ने योजना छ। प्यारापिट निर्माणका लागि आगामी वर्ष उपयुक्त बजेट उपलब्ध गराइने हेटौंडा उपमहानगरपालिकाका प्रमुख हरिबहादुर महतले जानकारी दिए।
पिप्ले युवा क्लबले ट्र्याक मात्र नभई मैदानको दक्षिणतर्फ प्यारापिट पनि निर्माण गर्ने भएको छ। कङ्क्रिट प्यारापिटका लागि उपमहानगरबाट २० लाख रुपैयाँ बजेट उपलब्ध भएको छ।
मैदान सम्याउने र घाँस उमार्ने काममा हाल पिप्ले युवा क्लब व्यस्त छ। विगतमा कार, मोटरसाइकल सिक्ने मैदानका रूपमा प्रयोग हुँदै आएको क्याम्पाचौरलाई तारजाली लगाएर सुरक्षित गरिएको छ।
पिप्ले युवा क्लबले मैदानबाहिर हरियाली बगैँचा पनि निर्माण गर्दै छ। रुख, फलफूलका बिरुवा रोपण गरेर मैदानलाई हरियाली बनाउने योजना क्लबको छ। डिभिजन वन कार्यालय मकवानपुरले बगैँचासहितको संरचना निर्माणका लागि र१० लाख रुपैयाँ उपलब्ध गराएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
