घाइते महिलालाई जिउँदै पुरेर स्काभेटर अपरेटर फरार

सुरक्षा/अपराध

नेपाल लाइभ मंगलबार, फागुन १८, २०७७ ०८:१९

काठमाडौं–धादिङको त्रिपुरासुन्दरी गाउँपालिका–१ सल्यान्टारमा एक महिलालाई जिउँदै पुरेर स्काभेटर अपरेटर फरार भएका छन् । सल्यानटारकी ४५ वर्षीया महिला सरस्वती कुमाललाई मृत अवस्थामा खाल्टो खनेर निकालिएपछि सो कुरा बाहिर आएको धादिङका एसपी महेन्द्र खड्काले नेपाल लाइभलाई जानकारी दिए।

बाटो खन्ने क्रममा सुरुमा स्काभेटरले ठक्कर दिएर घाइते बनाएको र पछि खाल्टो खनेर पुरेको स्थानीयको आरोप रहेको एसपी खड्काले बताए । देख्ने मान्छे कोही नभएको र अपरेटरसमेत फरार रहेकाले घटना कसरी भयो भन्नेबारे प्रष्ट भइनसकेको एसपी खड्काको भनाइ छ ।

जिउँदै महिलालाई पुरेको घटना बाहिरिएपछि हिजो सो क्षेत्र तनावग्रस्त भएको थियो । स्थानीयले स्काभेटरमा तोडफाेड तथा आगजनीसमेत गरेका थिए । सल्यानटारस्थित इलाका प्रहरी कार्यालयको टोली र एसपी श्रेष्ठ आफैं घटनास्थल पुगेका थिए । अपरेटर भीमबहादुर बुढाथोकी भने फरार छन् । उनको खोजी भइरहेको प्रहरीले जनाएकाे छ ।

एक्स्काभेटर चालक भीमबहादुर बुढाथोकीले उद्धार गर्नुको साटो कुमाल खसेको खाल्डोमा वरिपरिको माटो खनेर पुरिदिएको स्थानीयको आरोप छ।

‘एक्स्काभेटरले मान्छे पुर्‍यो’ भन्दै हल्ला भएपछि चालक बुढाथोकी भागेको बताइएको छ। घटनास्थल नजिकै जंगल रहेकाले र घटना भएको समयमा चालक एक्लै भएकाले पनि भाग्न सफल भएको त्रिपुरासुन्दरी गाउँपालिकाका प्रमुख शम्भुकुमार थापाले बताए ।

घटनाको समयम सडक मजदुर खाना खाँदै थिए । पछि तिनै मजदुरले खाल्डो खनेर कुमालको शव झिकेको थापाको भनाइ छ। दाङ घर भएका चालक बुढाथोकीको खोजीका लागि सबै संयन्त्र प्रयोग गरिने पनि थापाले बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

जर्मनीबाट परराष्ट्रमन्त्री डा. राणा सिधै भारत प्रस्थान

घरायसी विवादमा दाउराले हानेर श्रीमतीको हत्या, श्रीमान् पक्राउ

इरानमा हिजाबसम्बन्धी कडा विधेयकमा सुधार गर्न सांसद्हरूद्वारा आग्रह