निर्माणाधीन पोखरा क्षेत्रीय अन्तर्राष्ट्रिय विमानस्थल। काठमाडौं- सरकारले चालु आर्थिक वर्ष २०७७/७८ को आधा वर्षमा तीन वटा गौरवको आयोजना अन्तर्गतको अन्तर्राष्ट्रिय विमानस्थलमा झन्डै ८ अर्ब रूपैयाँ खर्च गरेको छ। जसमा सबैभन्दा बढी पोखरा क्षेत्रीय अन्तर्राष्ट्रिय विमानस्थल निर्माणमा चालु आर्थिक वर्षको ६ महिनामा ५ अर्ब ६ करोड रूपैयाँ खर्च भएको छ।
जुन चालु आवको लागि विनियोजित बजेटको आधा रकम हो। सरकारले चालु आर्थिक वर्ष २०७७/७८ मा पोखरा क्षेत्रीय अन्तर्राष्ट्रिय विमानस्थलका लागि १० अर्ब ७५ करोड रूपैयाँ विनियोजन गरेको थियो।
पोखरा क्षेत्रीय अन्तर्राष्ट्रिय विमानस्थल सन् २०२१ को जुलाई भित्र सम्पन्न गर्ने सरकारको लक्ष्य छ। तर, कोभिडको कारण विमानस्थल निर्माणको काममा प्रभाव पारेको छ। कोभिडका कारण विमानस्थल निर्माणको काम ६ महिनादेखि १ वर्षसम्म लम्बिने आकलन गरिएको छ। पोखरा क्षेत्रीय अन्तर्राष्ट्रिय विमानस्थल निर्माणमा अहिले ६२ प्रतिशत भौतिक कार्य सम्पन्न भएको छ।
विमानस्थलका लागि आवश्यक भौतिक संरचना निर्माण काम सम्पन्न भइसकेको छ। तर, उपकरण जडान र फिनिसिङको काम अहिले सुस्त गतिमा चलिरहेको छ। केहीदिन अगाडि मात्रै राष्ट्रिय सभा अन्तर्गतको दिगो विकास तथा सुशासन समितिले पनि विमानस्थलमा जहाज ल्यान्ड तथा अवतरणमा अवरोध हुने रिठेपानी डाँडा कटानी गर्न समेत निर्देशन दिइसकेको छ।
‘पोखरा क्षेत्रीय अन्तर्राष्ट्रिय विमानस्थल निर्माणको प्रगति सन्तोषजनक नै छ’, नेपाल नागरिक उड्डयन प्राधिकरणका राष्ट्रिय गौरवको आयोजना निर्देशनालयका निर्देशक प्रदिप अधिकारीले भने, ‘भैरहवा र पोखरा विमानस्थल निर्माणले गति लिँदै अन्तिम चरणमा पुगेको छ। तर, भैरहवामा विदेशबाट आउनपर्ने प्राविधिक समयमा नआउँदा केही समस्या आएको छ।’
पोखरा क्षेत्रीय अन्तर्राष्ट्रिय विमानस्थलको लागत २२ अर्ब भन्दा बढी छ। पोखरा क्षेत्रीय अन्तर्राष्ट्रिय विमानस्थलका लागि आवश्यक हवाई इन्धनका लागि आवश्यक पूर्वाधार निर्माणको काम पनि तीब्र गतिमा भइरहेको नेपाल आयल निगममा कार्यकारी निर्देशक सुरेन्द्रकुमार पौडेलले बताए।
यसैगरी, सरकारले चालु आर्थिक वर्षको ५ महिनामा गौतम बुद्ध अन्तर्राष्ट्रिय विमानस्थल निर्माणमा २ अर्ब ९८ करोड रूपैयाँ खर्च भएको जनाएको छ। चालु आर्थिक वर्ष २०७७/७८ मा सरकारले गौतम बुद्ध अन्तर्राष्ट्रिय विमानस्थल निर्माणका लागि ४ अर्ब ७२ करोड ५० लाख रूपैयाँ निनियोजन गरेको थियो।
विमानस्थलमा अहिले उपकरण जडान तथा विमानस्थल सञ्चालनका लागि आवश्यक सञ्चार प्रणालीका उपकरण जडानको काम भइरहेका छ। विमानस्थल निार्माणका लागि दक्ष प्राविधिक कामदार चीनबाट नआएपछि निर्माणको काम गरिरहेको चिनियाँ निर्माण कम्पनीले भारतीय दक्ष प्राविधिक कामदार ल्याएर काम सुरु गरेको छ।
भारतीय दक्ष कामदारको सहयोगमा अहिले टर्मिनल भवनको एसी जडान तथा रनवे लाइट जडानको काम सुरु भएको छ। विमानस्थल निर्माणको अन्तिम समय २०२० को डिसेम्बरमा सकिएपनि सरकारले समय थप भने गरेको छैन।
सरकारले चालु आर्थिक वर्षमा विमानस्थलबाट व्यवसायिक उडान सुरु गर्ने लक्ष्य लिएको थियो। यो आयोजना सन् २०१५ मा सुरु भइ सन् २०१७ को डिसेम्बरमा सम्पन्न हुने अपेक्षा गरिएकोमा उक्त अवधिभित्र नसकिएपछि संशोधित कार्यतालिकाअनुसार ३१ मार्च २०२० मा सम्पन्न हुनु पर्ने थियो। उक्त समयसीमा पनि सकिएको छ। अब पुनः समय थप गर्नु पर्ने अवस्था आएको छ।
तर, अहिलेसम्म औपचारिक रुपमा समय थपको निर्णय भएको छैन। आयोजनाको अनुमानित लागत ६ अर्ब ८२ करोड रूपैयाँ रहेको छ। आयोजना निर्माण अन्तिम चरणमा पुगेपनि अझै सञ्चालन मोडालिटी भने टुंगो लागेको छैन।
त्यस्तैगरी, बारामा निर्माणको चरणमा रहेको निजगढ अन्तर्राष्ट्रिय विमानस्थलमा भने खासै प्रगति भएको छैन। चालु आर्थिक वर्षमा तारबार तथा सडक निर्माणका लागि ५० करोड रूपैयाँ विनियोजन गरिएकोमा ६ महिनामा ५ करोड रूपैयाँ मात्रै खर्च भएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
