भागरथी भट्ट।
काठमाडौं- बैतडीको दोगडाकेदार गाउँपालिका-७ चडेपानीकी १७ वर्षीया किशोरी भागरथी भट्ट हत्याको अनुसन्धान गर्ने ७ जना प्रहरी कर्मचारीलाई पुरस्कृत गरिएको छ। प्रहरी प्रधान कार्यालयले उनीहरूलाई पुरस्कृत गरिएको जानकारी दिएको हो। आफूलाई तोकिएको जिम्मेवारी पूर्ण निष्ठा र लगनका साथ सम्पादन गरी प्रहरी संगठनको प्रतिष्ठा र गौरव बढाउनमा उल्लेखनीय कार्य गरेको भन्दै उनीहरूलाई पुरस्कृत गरिएको नेपाल प्रहरीले जनाएको छ।
पुरस्कृतमध्ये ५ जनालाई नगद प्रदान गरिएको छ भने २ जनालाई भने एक तह पदोन्नति गरिएको छ। पदन्नति हुनेमा सुदूरपश्चिम प्रदेश प्रहरी कार्यालय दिपायलका प्रहरी सहायक निरीक्षक पदमबहादुर थापा र इलाका प्रहरी कार्यालय राजापुर बर्दियाका प्रहरी जवान नरबहादुर थापा छन्। उनीहरूलाई एक तह बढुवा गरिएको हो।
कार्य कुशलताको कदरस्वरुप प्रहरी नियमावली २०७१, (संशोधन सहित) परिच्छेद (४) को नियम ३९ को देहाय (क) बमोजिम एकतह माथिल्लो पदमा पदोन्नति गरिएको प्रहरीले जानकारी दिएको छ।
सोही घटनाको अनुसन्धान गरेवापत् नगद पुरस्कार पाउनेमा सुदूरपश्चिम प्रदेश प्रहरी कार्यालय दिपायलका प्रमुख प्रहरी नायब महानिरीक्षक उत्तमराज सुवेदी, जिल्ला प्रहरी कार्यालय बैतडीका प्रमुख प्रहरी नायब उपरीक्षक नारायण प्रसाद अधिकारी, प्रहरी प्रधान कार्यालय केन्द्रीय अनुसन्धान ब्युरोका प्रहरी नायव उपरीक्षक पञ्चकुमार बाखु, महानगरीय प्रहरी कार्यालय रानीपोखरीका प्रहरी नायब निरीक्षक दुर्गाकुमार योञ्जन र प्रहरी चौकी हिकिला दार्चुलाका प्रहरी जवान अशोक बहादुर कुँवर छन्।
गत माघ २१ गते भागरथीको हत्या भएको थियो। उनको जबरजस्ती करणीपछि हत्या भएको प्रहरी अनुसन्धानले देखाएको छ। हत्या आरोपमा प्रहरीले भागरथी अध्ययनरत विद्यालयमा नै कक्षा ११ मा अध्ययनरत एक छात्रलाई पक्राउ गरी सार्वजनिक गरिसकेको छ। आरोपित छात्रले हत्या स्वीकार गरिसकेको प्रहरीको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
