चमोली (भारत)- भारतको उत्तराखण्डास्थित धौलीगंगा हिमनदीमा बाढी आएपछि बाँध भत्कँदा चमौली जिल्लाका ९ जनाको मृत्यु भएको छ भने दर्जनौँ बेपत्ता भएका छन्।हिमपहिरोपछि आएको बाढीले बाँध भत्काएपछि तल्लो तटीय क्षेत्रमा ठूलो बाढी पसेको अधिकारीहरूले बताएका छन्।
कैयौँ गाउँहरूबाट मानिसहरूलाई सुरक्षित स्थलमा पठाइएको छ। अधिकारीहरूले करिब डेढ सय मानिसहरू हराइरहेको हुनसक्ने बताएका छन्।
सामाजिक सञ्जालमा राखिएका भिडिओहरूमा बाढीको भेल तीव्र गतिमा पसेर धौलीगङ्गा नदीको छेउछाउमा रहेका बस्तीमा डुबान भएको छ। नदी क्षेत्रमा धेरै नोक्सानी पुर्याएको छ।हराइरहेकामध्ये अधिकांश जलविद्युत आयोजना निर्माणमा संलग्न मजदुर रहेको बताइएको छ।
प्रधानमन्त्री नरेन्द्र मोदीले अवस्थाको अनुगमन गरिरहेको बताएका छन्। 'सबैको कुशलताका निम्ति यतिवेला सम्पूर्ण देशले प्रार्थना गरिरहेको छ,' मोदीले ट्विट गरेका छन्।
भारतीय वायुसेनालाई उद्धारकार्यका निम्ति परिचालन गरिएको छ।
इन्डो–तिब्बती सीमा प्रहरीले चमोलीबाट दिएको जानकारी अनुसार हिमपहिरोका कारण आएको बाढीका कारण तपोवन क्षेत्रमा फसेका कम्तीमा १६ जनालाई आइतबार प्रहरीले सकुशल उद्धार गरेको छ। -रासस/एएनआई
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
