मुम्बई–प्रियंका चोपडा र राजकुमार राव अभिनित चलचित्र ‘द ह्वाइट टाइगर’ नेटफ्लिक्समा प्रदर्शन गरिएको केही समय बितिसक्यो। फिल्ममा प्रियंका र राजकुमार त छन् नै, साथमा महत्वपूर्ण भूमिका निर्वाह गरेका आदर्श गौरवको चर्चा अझै सेलाएको छैन।
आदर्श यो फिल्ममा प्रियंका र राजकुमारको कथालाई जोड्ने महत्वपूर्ण कडिका रुपमा छन् । फिल्मको ट्रेलर नै हेर्ने हो भने पनि उनी सुरुदेखि अन्त्यसम्म छाएका छन्।
शाहरुख खानको फिल्म ‘माइ नेम इज खान’ बाट आफ्नो फिल्मी करिअर सुरु गरेका थिए आदर्शले। ‘माइ नेम इज खान’ लाई करण जौहरले निर्देशन गरेका थिए।
सुरुवातमै निकै ठूलो ब्यानरसँग काम गर्ने मौका पाए पनि उनले सफलताको स्वाद चाख्न ‘द ह्वाइट टाइगर’ लाई नै कुर्नुपर्यो ।
पाँच महिनासम्म बिना कामका थिए
एक अन्तवार्ताका क्रममा आदर्शले सबैलाई छक्क बनाउने कुरा बताएका छन् । उनका अनुसार द ह्वाइट टाइगरमा अडिसन दिनुअघि उनले ५ महिनासम्म खाली समय बिताए । ‘पाँच महिनासम्म केही काम थिएन र अडिसन दिएका हरेक ठाउँमा असफलता मात्रै हात लागिरहेको थियो,’ आदर्शले भनेका छन्। यहीकारण आफ्नो कार्यक्षमता नै कमजोर भएको अनुभव भएको उनले बताएका छन्।
चरित्रमा ढल्नका लागि पुरी व्यापारी
उनले भने, ‘मैले आफू किशोरावस्थामा हुँदा द ह्वाइट टाइगर किताब पढेको थिएँ। त्यसैले यसको कथा मलाई थाहा थियो। अडिसन सफल भइसकेपछि कथाको पात्र बलराम कस्तो रहेछ भनेर अनुभव गर्न मैले पुरी पसलमा काम गरें।’ दुई हप्तासमम झारखण्डको एक गाउँमा सानो पानीपुरी पसलको स्टलमा काम गरेको उनले बताए उक्त स्टलमा १२ घण्टा काम गरेबापत साहुले उनलाई सय रुपैयाँ पारिश्रमिक दिन्थे।
बहुप्रतिभाशाली आदर्श
आदर्श गौरव बहुप्रतिभाशाली पनि छन्। उनी कलाकारका साथै लेखक र गायक पनि हुन्। बाल्यकाल झारखण्डमा बिताएका उनी ठूलो भएपछि मुम्बई आएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
