काठमाडौं- अस्ट्रेलिया र भारतबीचको तेस्रो टेस्ट क्रिकेट खेल बराबरीमा सकिएको छ। पाँचौं दिन सोमबार भारतले पाँच विकेटको क्षतिमा ३३४ रन मात्रै बनाएपछि खेल बराबरीमा सकिएको हो।
तेस्रो टेस्ट खेलमा घरेलु टिम अस्ट्रेलियाले भारतलाई ४०७ रनको लक्ष्य पेस गरेको थियो। विजयी लक्ष्य पछ्याउँदै आफ्नो दोस्रो इनिङ थालेको भारतले पाँचौ दिनको समाप्तीमा लक्ष्य पूरा गर्न सकेन।
भारतका लागि रिषभ पन्तले ९७ रन बनाउँदा चेतेश्वर पुजराले ७७ र रोहित शर्माले ५२ रन बनाए। त्यस्तै, रविचन्द्रन अश्विनले अविजित ३९ रन बनाउँदा शुबमन गिलले ३१ रन जोडे। बलिङतर्फ जोश हजलवोल्ड र नाथन लियोनले समान २–२ विकेट लिए।
यसअघि अस्ट्रेलियाले ६ विकेटको क्षतिमा ३१२ रन बनाएपछि आफ्नो दोस्रो इनिङको समाप्तिको घोषणा गरेको थियो। अस्ट्रेलियाका क्यामेरन ग्रिनले ८४, स्टेभ स्मिथले ८१ र मार्नुस लचबस्काग्नेले ७३ रन बनाए। बलिङतर्फ नभदिप सैनी र रविचन्द्रन अश्विनले समान २–२ विकेट लिए।
टस जितेर पहिले ब्याटिङ गरेको अस्ट्रेलियाले आफ्नो पहिलो इनिङमा सबै विकेटको क्षतिमा ३३८ रन बनाएको थियो। सिड्नी क्रिकेट मैदानमा स्टेभ स्मिथले शतक बनाउँदा अस्ट्रेलियाले मध्यम रन बनाएको थियो। रविन्द्र जडेजाबाट रनआउट हुनुअघि स्मिथले शतकसहित १३१ रन बनाएका थिए।
स्मिथले २७ औं शतक पूरा गरेका थिए। त्यस्तै, मार्नुस लचबस्काग्नेले ९१, विल पुकोभस्कीले ६२ र मिचेल स्टार्कले २४ रन बनाए। बलिङतर्फ भारतका रविन्द्र जडेजाले चार, नभदीप सैनी र जसप्रित बुमराहले समान २–२ विकेट लिएका थिए।
त्यसपछि आफ्नो पहिलो इनिङ थालेको भारतले खराब खेल्दै २४४ रन बनाउँदा सबै विकेट गुमाएको थियो। पहिलो इनिङमै भारत ९४ रनले पछि परेको थियो। भारतका शुबमन र चेतेश्वर पुजराले समान ५०–५० रन बनाउँदा रिषभ पन्तले ३६ रन जोडेका थिए। बलिङतर्फ अस्ट्रेलियाका पट कुम्मिन्सले चार विकेट लिए।
चार खेलको टेस्ट क्रिकेट सिरिजमा भारत र अस्ट्रेलियाले समान एक–एक खेल जितेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
