फेरिएको नेपाली फिल्म नगरी

सिनेमा

पुष्पा थपलिया शनिबार, पुस २५, २०७७ ०८:४०

काठमाडौं–थरीथरीका मास्क। कसैका काला, कसैका निला त कसैका छिर्केमिर्के। आँखा–आँखामात्रै जुधिरहेका। कतिले त आँखैबाट कुराकानी पनि गरिरहेका थिए।

यो दृश्य ठमेलको छायाँ सेन्टरमा भएको एक फिल्मी कार्यक्रमको हो, जहाँ अभिनेता शिव श्रेष्ठको प्रस्तुति रहेको ‘एउटा यस्तो प्रेम कहानी’ फिल्मको शीर्ष गीत सार्वजनिक हुँदैथियो।

कलाकार जम्मा भएका कार्यक्रम अरु पनि नभएका होइनन्। तर नयाँ फिल्मको प्रचारप्रसारका लागि गरिएको कार्यक्रम भने करिब १० महिनापछिको पहिलो थियो त्यो। त्यसैले आमन्त्रित पाहुनामात्रै हैन, भेटघाट गरौं न भनेर आउनेहरुको संख्याले कार्यक्रम हल खचाखच थियो।

कलाकारले साथ दिएनन् शिवलाई
कोभिड–१९ नियन्त्रणसम्बन्धी उच्चस्तरीय निर्देशक समिति (सिसीएमसी) ले संक्रमणको जोखिमका कारण बन्द गरिएका मनोरञ्जन क्षेत्र खुला गर्ने निर्णय गरेको थियो। सिसीएमसीले सञ्चार मन्त्रालयलाई निर्णय बुझाए पनि अहिलेसम्म त्यसको केही जवाफ आएको छैन। फिल्म छायाँकनका लागि अनुमति दिए पनि हलमा प्रदर्शन गर्ने बाटो सरकारको तर्फबाट अझै खुला भइसकेको छैन।

यही अवसरमा हलवाला एक्लैले हल खोल्न गरेको प्रयासलाई अभिनेता शिव श्रेष्ठले साथ दिए। लगानीसमेत नउठ्ने भन्दै नयाँ फिल्म लगाउन निर्माताहरु डराइरहेका बेला शिव भने हलमा आफ्नो नयाँ फिल्म लगाउन कम्मर कसे ।

तर बिडम्बना, उनलाई आफ्नै फिल्मका कलाकारले समेत साथ दिएनन्। फिल्ममा चर्चित अभिनेता, अभिनेत्रीको भीड लागे पनि कार्यक्रममा उनलाई साथ दिन सुस्मा कार्कीमात्रै पुगिन्। उनले फिल्ममा एउटा आइटम गितमा नाचेकी छन्
अन्य अभिनेत्रीहरु प्रियंका कार्की, वर्षा राउत, बसुन्धारा भुसाल, करिश्मा मानन्धरकी छोरी कविता मानन्धर कार्यक्रममा उपस्थित भएनन्। त्यस्तै अभिनेताहरु आयुषमान देशराज जोशी, संजोग कोइराला र स्वयं शिवका छोरा शक्ति श्रेष्ठ पनि कार्यक्रममा आएनन्। शक्ति भने हाल अष्ट्रेलियामा छन्। शक्तिबाहेक अन्य कलाकार नेपालमै छन्।

निर्माता र हलवालाको भने साथ
सरकारको निर्णयविपरीत गरिएको पहिलो फिल्मी कार्यक्रममा सहभागी भएर निर्माता संघका अध्यक्ष आकाश अधिकारीले भने पूर्ण रुपमा साथ दिए। कसैले हिम्मत गर्न नसकेको काम शिव श्रेष्ठले गरेको भन्दै तारिफ पनि गरे।

नेपाली फिल्म क्षेत्रमा शिव श्रेष्ठ फेरि नेपाली फिल्मका लागि भगवान बनेर आइपुगेको आकाशको अभिव्यक्ति थियो। शिवको आँटले नै चलचित्र क्षेत्र चलमलाउनेमा उनी आशावादी देखिए।

चलचित्र संघका अध्यक्ष मधुसुदन प्रधानले पनि शिवप्रति उत्तिकै सम्मान देखाए। उनले पनि शिवलाई फिल्म क्षेत्रमा भगवानले पठाएका देवदूतकै रुपमा व्याख्या गरे। हलवालाको एकल निर्णयमा कुनै फिल्म निर्माताले साथ नदिइरहेका बेला उनीहरु निराश बनेका थिए।

होटलवालाको लापरवाही
लामो समयसम्म सुनसान छायाँ सेन्टरमा अवस्थित एडल्फ होटलमा परिचित अनुहारको भिडभाड राम्रै लागेको थियो त्यो दिन। फिल्म क्षेत्रभन्दा बाहिरका धेरै मानिसहरु शिवलाई शुभकामना दिन पुगेका थिए। कार्यक्रम सुरु हुनेवित्तिकै शिवले पनि होटलवालाको साथले मात्रै आफूले फिल्म प्रदर्शनपूर्वको प्रचारप्रसार गर्न सकेको भन्दै तारिफ गरेका थिए।

निकै उच्च सेवा सुविधा भएको होटलमा आँखा अगाडि ठूलो सेतो पर्दा लगाइएको थियो। तर अफशोस, त्यो बिग्रिएको रहेछ। त्यसको छेउमा भएको सानो पर्दामा उभिएर फिल्मको गीत हेर्नुपर्‍यो। युट्युबबाट बजाइएको गीत नेट स्लो भएकाले रोकिँदै घुम्दै बज्दै गर्दा आएका पाहुनाले त्यसको मज्जा लिन पाएनन्।

शिव श्रेष्ठका छोरा शक्ति श्रेष्ठ र करिष्मा मानन्धरकी छोरी कविता फिचरित गीतको मज्जा लिन नपाउँदा सबैको अनुहारमा थकथकी देखिएको थियो। प्राविधिक समस्याकै कारण भन्दै फिल्मको ट्रेलर पनि सार्वजनिक गरिएन।

फिल्मको शीर्ष गीत र ट्रेलर सार्वजनिक गर्ने भनेर बोलाइएको कार्यक्रममा धेरै कुरा नौलो भए पनि एउटा कुराले भने पुरानै रिती पालना गर्‍यो। तोकिएको समयभन्दा डेढ घण्टा ढिलो कार्यक्रम सुरु भयो। कार्यक्रम सञ्चालक नरेशले पुरानै शैलीमा केही प्राविधिक समस्या आएकाले कार्यक्रम ढिलो सुरु हुन पुगेको भन्दै माफी मागे। यो उनको सधैंको संवाद भएकाले नौलो लागेन।

मास्क र ललीपपको तालमेल

फिल्मी क्षेत्रसँगै जोडिएर आउने विषय सौन्दर्य र फेसन पनि हो। कार्यक्रममा जानुअघि पार्लर जाने अनि आफूलाई सुन्दर बनाउनेहरुको मुख लुकाएर भएको जमघट थियो त्यो। त्यसैले उनीहरुको आँखामा आफ्नो सुन्दरता देखाउन नपाउँदाको पीडा पनि झल्किन्थ्यो। भेट्नेबित्तिकै अंगालो हाल्ने, गालामा गाला टाँस्ने क्षेत्रका मान्छेहरु अप्ठेरो मान्दै मुड्की ठोक्काइरहेका थिए।

त्यही समयमा मास्कले अनुहार ढाक्नुपर्दाको पीडालाई केही कम गराइदियो ललीपपले। कार्यक्रमका आयोजकले एक थाल ललीपप राखिदिए।

ललीपप आएपछि मानिसहरुको फरक अवतार देखिन थाल्यो। केही समयअघि दुवै कान समाइरहेका मास्क यतिखेर भने कसैको चिउँडो समाइरहेको थियो, कसैको एउटा कानमा मात्रै झुण्डिरहेको थियो, कसैले कच्याककुचुक पारेर हातमा समाएका थिए त कसैलाई मास्क मुखबाट उचालेर ललीपप चुसिरहेका थिए।

छेस्कोमा समाएर ललीपप चुस्नुपर्ने भएकाले मास्कले खलनायकको भूमिका निर्वाह गर्‍यो। तर सौन्दर्य पारखीका लागि त्यो नायककै भूमिका थियो।

हलवालाका लागि पनि शिवको फिल्म मास्क र ललीपप जस्तै होस्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।