काठमाडौं–ग्लोबल आइएमई बैंक शनिबारदेखि स्थापनाको १४ औं वर्षमा प्रवेश गरेको छ। स्थापनाको छोटो अवधिमा नै बैंक पुँजी, व्यवसाय, शाखा/सञ्जाल समेतका हिसाबले नेपालकै ठूलो बनेको छ।
बैंकको हाल चुक्ता पुँजी करिब १९ अर्ब रुपैयाँ रहेको छ। प्रस्तावित १४ प्रतिशत बोनसपछि करिब २१ अर्बभन्दा बढी हुनेछ। संचित कोषसहित बैंकको प्राथमिक पुँजी २७ अर्ब २४ करोड रुपैयाँ, कुल निक्षेप २ खर्ब ४९ अर्ब रुपैयाँ र कुल कर्जा २ खर्ब ११ अर्ब रुपैयाँभन्दा बढी पुग्नेछ।
त्यस्तै, सबै क्षेत्र र वर्गसम्म बैंकिङ सेवाको पहुँच पुर्याउने उद्देश्यले बैंकले ७ वटै प्रदेश तथा ७३ जिल्लामा २६४ शाखा, २४० एटीएम, २४३ शाखारहित बैंकिङ सेवा, २४ एक्सटेन्सन काउण्टर, १ सिडिएस क्लियरिङ काउण्टर, २३ राजस्व कलेक्सन काउण्टर, तथा ३ वटा वैदेशिक प्रतिनिधि कार्यालयसमेत गरी करिब ७९७ सेवा केन्द्रबाट सेवा दिँदै आइरहेको छ।
त्यसैगरी बैंकले अमेरिका, बेलायत, अस्ट्रेलिया, मलेसिया, दक्षिण कोरिया, जापान, साउदी अरब, कतार, युएई, बहराइन, कुवेत, भारत, जोर्डनलगायतका मुलुकबाट रेमिट्यान्स भित्र्याउँदै देशको अर्थ व्यवस्थामा महत्वपूर्ण योगदान पुर्याउँदै आइरहेको छ।
१४ औं वार्षिकोत्सवका अवसरमा बैंकका अध्यक्ष चन्द्रप्रसाद ढकालले मर्जरपछि ग्राहकलाई आधुनिक, गुणस्तरीय तथा भरपर्दो बैंकिङ सेवा प्रदान गर्न अझ सहज भएको कुरालाई जोड दिँदै मर्जर तथा प्राप्तिमा ग्लोबल आइएमई बैंकसँग लामो अनुभव भएको बताए। ढकालले मर्जरपछिको व्यवस्थापनमा बैंकले हासिल गरेको उपलब्धिका आधारमा आगामी दिनमा पनि थप उत्साहित बनाउने विश्वास व्यक्त गरे।
अध्यक्ष ढकालले विभिन्न बैंक तथा वित्तीय संस्थाहरुसंग मर्जर एक्विजिशनपछि बैंकको पुँजीमा अभिवृद्धि भई प्रतिस्पर्धात्मक क्षमता तथा वित्तीय, मानव–संशाधन, प्राविधिक एवं अन्य क्षमतामा अभिवृद्धि भएको उल्लेख गरे।
उनले कोभिड–१९ को महामारीमा पनि बैंकहरुले आफ्ना ग्राहक तथा सेवाग्राहीलार्ई निरन्तररुपमा सेवा दिएको बताउँदै यसले बैंक तथा वित्तीय संस्थाप्रति आमजनमानसको विश्वास बढेको बताए।
‘कोभिड–१९ को विश्व महामारीको अत्यन्त जटिल र त्रासदीपूर्ण परिस्थितिमा पनि हामीले गरेको सेवालाई सबैले सम्झिनेछन्। यसले बैंक व्यवसाय मात्र नभई आपत विपतको साथी र संकटको सारथी पनि हो भन्ने कुरालाई स्थापित गरेको छ,’ उनले भने, ‘यसलाई हामीहरुले आफ्नो व्यवहार र सेवाले थप मजबुत र प्रष्ट पार्दै जानेछौं।’
‘विश्व महामारीको अत्यन्तै जटिल र संकटको समयमा बैंकहरुले राष्ट्र बैंकको निर्देशनबमोजिम निजी क्षेत्रले उठाउँदै आएको कर्जाको किस्ता र व्याज तिर्ने समयसीमा बढाएर, व्याजमा छुट दिएर निजी क्षेत्रको संकटको सारथी बनेर काम गरेका छौं। यसले निजी क्षेत्र आपसमा मिलेर सामना गरियो भने भविष्यमा आइपर्ने सम्भावित संकट परास्त गर्न वा त्यसको क्षति न्यून गर्न सकिन्छ भन्ने ज्ञान प्राप्त गरेका छौं, संकटको समयमा फुटेर होइन जुटेर अघि बढ्नुपर्छ भन्ने सन्देश पनि हामीले पाएका छौं,’ ढकालले भने।
बैंकका प्रमुख कार्यकारी अधिकृत रत्नराज बज्राचार्यले विभिन्न मर्जर तथा एक्विजिशनपछि अहिले ग्लोबल आइएमई बैंक मुलुककै एक उत्कृष्ट, सबल र मजबुत बैंक बनेको बताए।
उनले भने, ‘मर्जरपछि धेरैजसो सूचकहरुमा ग्लोबल आइएमई देशकै ठूलो र एउटा उत्कृष्ट बैंकको रुपमा रहेको छ। यसलाई थप उचाइमा पुर्याउने र सेवालाई ७७ वटै जिल्लामा विस्तार गरी सबैका लागि बैंक भन्ने मूल नारालाई साकार पार्ने गरी बैंकले काम गरिरहेको छ,’ उनले भने।
मर्जर र मर्जरपछिको व्यवस्थापनमा बैंक केन्द्रित रहेको बताउँदै उनले अबका दिनमा बैंकलाई देशकै सबैभन्दा उत्कृष्ट र सबल बैंकको रुपमा स्थापित गर्ने दाबी गरे। बज्राचार्यले सरकार, नेपाल राष्ट्र बैंक, धितोपत्र बोर्डलगायत विभिन्न नियमनकारी निकाय, ग्राहकवर्ग तथा सम्पूर्ण सेवाग्राहीलाई बैंकप्रतिको निरन्तर साथ, सहयोग र विश्वासका लागि हार्दिक आभारसमेत व्यक्त गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1782224905-1782225890.jpeg)
