काठमाडौं- सत्तारुढ नेपाल कम्युनिस्ट पार्टी (नेकपा) दुई समूहमा विभाजित छ। दुवै समूहले आफूलाई असली नेकपा दाबी गरिरहेका छन्। यद्यपि निर्वाचन आयोगले कुनै समूहलाई आधिकारिता दिइसकेको छैन।
प्रधानमन्त्री केपी शर्मा ओलीले शनिबार राजधानीमा आयोजित काठमाडौं जिल्लास्तरीय कार्यकर्ता भेलामा 'बरमझियाको बुढाको पेडा पसल हो र असली दाबी गर्नलाई?' भन्दै आफू असली नेकपा भएको पटक–पटक जिकिर गरे। निर्वाचन आयोगले सही 'चार्ली च्याप्लिन' चिन्ने भन्दै हास्य कलाकार च्याप्लिनकै हाराहारीमा ठट्टा गरे।
जसको कटेरो उसकै पुच्छर बाहिर
प्रधानमन्त्री ओलीले सम्बोधनको सुरुदेखि नै अनेक किस्सा र विम्बको प्रयोग गरे। यही क्रममा उल्लेख भयो– जसको कटेरो उसको पुच्छर बाहिर? उनले आफू साविकको नेकपाको घरमूली भएको दर्शाउन उनले यसको प्रयोग गरेका हुन्। उनले भने, 'कार्की ब्याकेटमा गएर केपी ओलीलाई निकाल्ददियौँ भनेर भन्नु भएछ। निर्वाचन आयोगमा पत्र पठाउनु भएछ। निर्वाचन आयोगका आयुक्त कति दिन हास्नु भयो होला? जसको कटेरो उसको पुच्छर बाहिर?'
प्रचण्ड-माधव समूहको आन्दोलनमा कार्यकर्ता र जनताले साथ नदिएको बताउन उनले रत्नपार्कको सिसीवाला औषधि पसलेको प्रसंग सँगै जोडेर ल्याएका थिए। त्यो आन्दोलनमाथि ओलीको मजाक यस्तो थियो, 'पेरिसडाँडामा अहिले पत्रकार सम्मेलन हुँदैछ। यति गते यहाँ जाने, वहाँ जाने भनेका छन्। सिसीमा औषधि जम्मा गर्नेले पनि अलीअली मान्छे जम्मा गर्छ। टाउको दुखेको, पेट दुखेको औषधि भनेर अब रत्नपार्कमा जम्मा गर्ने वहाँहरूको हालत हो।'
नेकपा पेडा पसल हो र असली दाबी गर्नलाई?
नेकपा नाम र लोकप्रिय चुनाव चिह्न सूर्यको लडाइँ पेचिलो बन्दै गइरहेको छ। दुवै समूहले आ–आफ्नो दाबी गरिरहेका छन्। यही क्रममा प्रचण्ड-माधव समूहले आफूसँग केन्द्रीय कमिटीको बहुमत संख्या रहेको जनाउ दिन माइतीघरदेखि निर्वाचन आयोगसम्म केन्द्रीय समितिका नेताहरूलाई नै हिँडायो। शीर्ष नेताहरूले आयोगमै पुगेर हस्ताक्षर बुझाए। आफूहरू वास्तविक नेकपा भएको भनेर दाबी पेस गरे।
यसैमाथि शनिबार केपी ओलीले मजाक गर्दै भने, 'यो बरमाझियाको बुढोको पेडा पसल हो र म नै असली भनेर दाबी गर्नलाई? यो पेडा पसल होइन। पार्टी हाम्रो हो। हामी नै असली हौँ भनेर निवेदन दिएको भनेर मलाई जानकारी आएको छ। जसको घर हो ऊ निवेदन हाल्न जानु पर्छ? जसको जमिन र गाडी हो ऊ जानु पर्दैन। पार्टीको विधान र नियमावली र कानुनअनुसार पार्टी सञ्चालन गरिरहेका छौँ।'
प्रचण्ड र नेपाल भेट्नु कुहिएर झरेका फल
प्रधानमन्त्री ओलीले गरेको प्रतिनिधिसभा विघटनविरुद्ध सडक संघर्ष गरिरहेका नेकपा प्रचण्ड–माधव समूहलाई खिया लागेको नटबोल्टदेखि भेट्नु कुहिएर झरेका फलसम्मको संज्ञा दिए। उनीहरू नेकपाबाट अलग्गिएको तर पार्टी नफुटेको दलिल कार्यकर्तामाझ पेस गर्ने क्रममा पूर्व सहयोद्धाविरुद्ध यो स्तरको गालीगलौजमा ओली उत्रिएका हुन्। उनको भनाइ थियो, 'भेट्नु कुहिएर झरेका दुई फलहरूले रुख मै हुँ भनेर दाबी गर्ने? बैठकमा आउनुस् भनेका छौँ। पुष्पकमल दाहाललाई अध्यक्षमा राखेका छौँ। माधव नेपाल र झलनाथ खनाललाई वरिष्ठ नेतामा राखेका छौँ।'
पार्टीमा विभाजनको अवस्था आउनु र सरकार राम्रोसँग सञ्चालन गर्न नसक्नुमा दोषी पुष्पकमल दाहाल प्रचण्ड र माधव नेपाललाई देखाउने क्रममा उनले सधैँको झमेला र गुटका कारण यस्तो अवस्था आएको आरोप लगाए।
पार्टी र सरकारले अब रफ्तार पकड्ने जिकिर गर्न उनले यस्तो तीतो शैली अपनाए, 'सधैको झमेला र गुटको स्थिति थियो। गएका तीन वर्ष पार्टीले देश अघि बढाउन महत्वपूर्ण काम गर्नु पर्दथ्यो तर त्यो भएन। कार्यकर्तालाई अलमलमा राखियो। असंगठनमा राखियो। बलिदान गरेका कार्यकर्ता आज समाजको पछौटेपन हटाएर समाजलाई सचेत बनाएर संगठित नभएर शिथिलतामा पुगेका छन्। समस्या कहाँ रहेछ र खिया कहाँ लागेको छ? दुई वटा नटबोल्ट फेर्दा कहाँ पुग्यो। खिला लागेका नटबोल्ट आफैँ फुक्लेका हुन्।'
असली चार्ली च्याप्लिन अदालतले चिन्छ
शनिबारको प्रधानमन्त्री ओलीले कार्यकर्तालाई सम्बोधन गरिरहेका थिए वा कुनै हास्य कलाकार मनोरञ्जन दिने कोसिसमा थिए भनेर छुट्याउन मुस्किल पर्ने देखिन्थ्यो। पदीय मर्यादा र परिस्थितिले प्रदान गरेको जिम्मेवारीको ख्याल गर्नबाट उनी पटक–पटक चुके। सँगै अदालतमा विचाराधीन मुद्दामा घुमाउरो रुपमा अदालतमाथि नै व्यंग्य कसे।
प्रधानमन्त्री ओलीले आफू असली नेकपा भएको दलील पेस गर्दै अदालत र निर्वाचन आयोगले असली चार्ली च्याप्लिन चिन्ने क्षमता राख्ने बताए। विश्व विख्यात हास्यकलाकार चार्ली च्याप्लिनसँग जोडिएको यस्तो किस्सा सुनाए, ‘एकपटक चार्ली चाप्लिनको क्यारिक्याचेर गर्ने प्रतिस्पर्धा भएछ। त्यो प्रतियोगितामा चार्ली पनि सहभागी भएछन्। चारजना फाइनल राउन्डमा पुगेछन्। त्यहाँसम्म चार्ली पनि पुगे। प्रतियोगिताको अन्तिममा अरु नै असली चार्ली ठहरिएछ,’ ओलीले कथामा प्रचण्ड-नेपाललाई व्यंग्य गर्दै भने, ‘हाम्रो अदालत चार्ली चाप्लिन कुन हो भनेर छुट्याउन नसक्ने अवस्थामा छैन। जुँगा हेरे चिन्छ। जेल लगाएको कपाल हेरेर चिन्छ। अनुहार हेरेर चिन्छ। अनेक हिसाबले चिन्छ। कुम हल्लाएको भएपनि चिन्छ।’
ओलीले न्याय निरुपण गर्नेहरूले गल्ती नगर्ने बताउँदै सूर्य चिन्ह आफ्नो पार्टीका हुने विश्वास कार्यकर्तालाई दिलाए। ‘ढुक्क हुनुस् साथीहरू सूर्य चिन्ह हामीसँग हुन्छ। पार्टी हाम्रो हुन्छ,’ ओलीले चुनाव चिन्ह र पार्टी आफ्नो बनाउने दाबी गर्दै भने, ‘उहाँहरूले बहुमत छ भन्नु भएको छ। 'गफै त हो नि सम्धी' भने जस्तो हो। कहाँबाट आयो बहुमत उहाँहरूसँग? कहाँ पुष्टि भयो? कुन महाधिवेशन वा कुन अधिवेशनले भन्यो?’
प्रचण्डको डुप्लिकेट बच्चा
प्रधानमन्त्री ओलीले अर्को समूहका नेता प्रचण्डसँग नेकपाको वास्तविक लिगेसी नभएको दर्शाउन केटाकेटी र खेलौनाको कथा हाले। आफ्नो पार्टी राम्रो लागेर एकता गर्न आएको तर अहिले आफ्नो दाबी गरिरहेको उनको उक्त कथाको सार थियो।
उनले उक्त प्रसंग यसरी प्रस्तुत गरे, 'एकपल्ट मैले दुई केटाकेटी देखेको थिएँ। एकजना बच्चाको हातमा खेलौना थियो। अर्कोले कस्तो राम्रो खेल्न देउ न, हेर्न देउ न भन्दै माग्यो। सोझो हिसाबले उसले दियो। दुईटैले एकछिन मिलेर खेले। एकछिन पछि फेरि अघि खेलौना माग्नेले नै लियो।'
यो प्रसंग यतिमै रोकिएन। प्रधानमन्त्री ओलीको झटारो थियो, 'त्यो बच्चा कस्तो प्रचण्डको डुप्लिकेट रहेछ!'
बिरालो अनि विविध
प्रचण्ड-नेपाल समूहका नेतालाई पदलोलुप देखाउने क्रममा अरु पनि अनेक कथा उनले हाले। अनेक व्यंग्यवाण गरे। थुप्रै खित्कौली सुनाए। यही क्रममा एक ठाउँमा भने, 'माथिका नेताहरूको ध्यान पदमा छ। यता (आफ्नो पक्षमा) आउनु पर्ने थियो। सुन्तला खान सुन्तलाघारीतिर जानु पर्ने थियो। सल्लाघारीतिर गएपछि कहाँ सुन्तला पाइन्छ? पद चाहिएको छ ठूलोठूलो तर खालीखाली ठाउँमा जाने?'
यसैगरी प्रचण्डलाई समयमा चिन्न आफूहरूले नसकेको विषयलाई बिरालो र चोरको किस्सासँग जोडेर प्रस्तुत गरे। किस्सा यस्तो थियो, 'एकपटक एउटा घरमा चोर पसेछ। रातीको समयमा पसेर भाँडा भुईंमा खसेछ। घरवालाले चोर हो कि भनेछ। चोरले म्याउँ भनेछ। तर फेरि भाँडा झरेपछि हेर्दा ढाँडे रहेछ। त्यसको गति के भयो होला? एकछिन अध्यारोमा म्याउँ गर्लान्। तर यस पटक ठेगान लगाउने हो।'
उनले संसद् पुनर्सथापना कुनै हालतमा नहुने दलील दोहोर्याए, 'झन्डै ६४ प्रतिशतको दलको नेताले ताजा जनादेश चाहिन्छ भनेर चलाउन्न भनेपछि कहाँ पठाउने फेरि?' यसक्रममा पनि ओलीको स्वभाविक फ्लेवर प्रस्तुत भयो। त्यो यस्तो थियो, 'घरवाला भन्दैछ छानो नयाँ बनाउछु, तर छिमेकी पुरानै छानो हुनुपर्छ भन्छन्। कुहिएको छानोले नभएर नयाँ बन्दैछ। पुरानै खरको टुक्रा खोज्न जाने कुरा संविधानमा उल्लेख छैन भनेको छु।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764216337.png)
-1764216040.png)
-1764146706.png)
-1763721444.png)
-1763559424.jpg)
-1764080971.png)
