फाइल तस्बिर
काठमाडौं- गृहमन्त्री रामबहादुर थापा बादलले प्रधानमन्त्री‚ अध्यक्ष र राष्ट्रपति पदको लोलुपताका कारण पार्टी विभाजन भएको बताएका छन्। काठमाडौंको प्रज्ञा भवनमा आयोजित कार्यकर्ता भेलालाई सम्बोधन गर्दै गृहमन्त्री बादलले यस्तो बताएका हुन्।
‘कम्युनिस्ट आन्दोलन राजाको अन्त्यपछि नयाँ धारामा प्रवेश गरेको थियो‚’ बादलले भने‚ ‘अब देशमा जनवादी व्यवस्था स्थापना गरेका छौँ। अब समाजवाद निर्माण गर्ने हो।’ समाजवाद भनेको समृद्धि र समानताको राज्य हुने उनले बताए।
‘दुई तिहाईसहितको मत दिएर जनताले एउटा बलियो सरकार दिएका थिए‚’ बादलले भने‚ ‘प्रतिगामीहरुले गुमेको सत्ता प्राप्त गर्न र प्रतिगमतलाई पुनर्स्थापना गर्न नेकपालाई विभाजित गर्ने रणनीति तय गरे‚ अनि नेकपा त्यसैमा परेको छ।’
नेकपाको सरकारको नेतृत्वमा रहेको सरकारलाई यहाँसम्म आउँदा नेकपा विभाजन गर्न सफल भएको कुरा अकाट्य भएको उनले दाबी गरे। नेकपाको एउटा गुट अहिले पार्टीबाट अलग भएको छ‚’ बादलले भने‚ ‘यो विभाजनबाट प्रतिगामी शक्तिहरु उत्साहित भएका छन्।’
उनीहरुले राजनीतिक अस्थिरता सिर्जना गर्न सकेकामा उनीहरु हर्षोल्साल भएको दाबी बादलले गरे। उनीहरुले फेरि प्रतिगमन फर्काउन सक्नेमा ढुक्क भएको देखिएको र त्यसैका लागि उनीहरू सडकमा उत्रिएको दाबी बादलको थियो।
‘हाम्रो नेतृत्वले प्रतिगामीहरुलाई सही जवाफ दिएको छ‚’ उनले भने‚ ‘जनताले मात्र यो विभाजित नेकपालाई एक गर्ने भएकाले जनतामाझ गएका छौँ। यो एकदम सही निर्णय हो।’ नेकपाको नेतृत्वमा मजबुत सरकार अब कसरी निर्माण गर्ने भनेर जनतालाई बुझाउने उनले दावी गरे। जनताका बीचमा गएर प्रतिक्रान्तिको खतरालाई समाप्त पार्ने उनले बताए।
देशी विदेशी शक्तिहरु अहिलेको उपलब्धी उल्टाउने गरी लागेको र अब जनताले त्यसलाई रोक्न सक्ने उनले दाबीसमेत गरे। मध्यावदी निर्वाचनमा जानुपर्ने कारण पुरानो संसदको अस्तित्वको आवश्यकता भएको उनले बताए। उनले नयाँ संसद्को पुनर्स्थापना गर्ने बताए। जनताको बीचमा गएर नयाँ संसदको स्थापना गर्ने र त्यसबाट स्थिर सरकार निर्माण गर्ने र निर्वाचनबाटै विभाजित कम्युनिस्ट आन्दोलनलाई एकता गर्ने उनले दाबी गरे।
जनतामा गएर अवसरवादीलाई किनारा लगाउन सकिने तर यहाँ एक अर्कालाई कारवाही गरेर नसकिने उनले बताए। अहिले फुट आउनुको कारण पद र सत्ता लोलुपको कारण भएको उनले दावी गरे। ‘अहिले भएको संघर्ष कुनै राजनीतिक कारणले भएको होइन‚’ उनले भने‚ ‘प्रधानमन्त्री, राष्ट्रपति र अध्यक्ष हुनेबारे बहस छ।’ यो विचार धारात्मक बहसका कारण पार्टी विभाजन नभएको उनले बताए। पार्टी विभाजन हुने र पार्टीको केही गुटका साथीहरु बाहिर जानुमा पद लोलुपता नै मुख्य कारण भएको उनको आरोप थियो।
उनीहरुले पार्टी अध्यक्षमाथि कृत्रिम आरोप लगाएको दाबी बादलले गरे। अपराधीको रुपमा पार्टी अध्यक्षमाथि प्रश्न उठाउनुभयो‚’ उनले भने‚ ‘प्रधानमन्त्री र संसदीय दलको नेताको रुपमा होइन अपराधीको रुपमा खडा गर्नुभयो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
