काठमाडौं- प्रदेश १ का मुख्यमन्त्री तथा नेकपा संसदीय दलका नेता शेरधन राईले थप एक जना प्रदेशसभा सदस्यलाई निलम्बन गरेका छन्। राईले आफूविरुद्ध अविश्वासको प्रस्तावमा हस्ताक्षर गर्ने नेकपा दाहाल-नेपाल समूहका प्रदेशसभा सदस्य उपेन्द्र घिमिरेलाई निलम्बन गरेका हुन्।
यसअघि राईले १५ जना सदस्यलाई निलम्बन गरेका थिए। शुक्रबार थप एक जना निलम्बन गरेसँगै प्रदेशसभामा निलम्बित सदस्यको संख्या १६ पुगेको छ।
राईले अविश्वासको प्रस्तावमा हस्ताक्षर गरेपछि स्पष्टीकरण सोधिएका १९ जनामध्ये बिहीबार १५ लाई निलम्बन गर्ने निर्णय गरेका थिए। अविश्वासको प्रस्तावमा गरेको हस्ताक्षर फिर्ता लिएर आफ्नो पक्षमा ल्याउन असफल भएपछि राईले घिमिरेलाई निलम्बन गरेका हुन्।
मुख्यमन्त्री राईले गरेको निलम्बनमा पर्ने प्रदेशसभा सदस्यहरूममा भीम आचार्य, इन्द्रबहादुर आङ्बो, जीवन घिमिरे, विजयकुमार विश्वास, टंकबहादुर आङबुहाङ, राजेन्द्रकुमार राई, मोहनकुमार खडका, लिलाबल्लभ अधिकारी, लछुमन तिवारी, कुलप्रसाद साम्बा, यशोदा अधिकारी, धिरेन्द्र शर्मा, कुशुम श्रेष्ठ, सरिता थापा र सावित्राकुमारी रेग्मी छन्।
दलको विधानविपरीत नेतासमेत रहेका मुख्यमन्त्री राईविरुद्ध अविश्वासको प्रस्तावमा हस्ताक्षर गरेकामध्ये १९ जना प्रदेशसभा सदस्यलाई प्रमुख सचेतक बुद्धिकुमार राजभण्डारीले मुख्यमन्त्रीको निर्देशनमा सोमबार २४ घण्टे स्पष्टीकरण सोधेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
