कोभिड प्रभावित ऋणीलाई पुनर्कर्जाका लागि आवेदन दिन राष्ट्र बैंकको आह्वान

बैंक/बिमा/सेयर

नेपाल लाइभ शुक्रबार, पुस १७, २०७७ १२:३७

काठमाडौं–नेपाल राष्ट्र बैंकले कोभिडप्रभावित ऋणीहरुलाई पुनर्कजाका लागि आवेदन दिन पुनः आह्वान गरेको छ। यसअघि वास्तविक ऋणीले पुनर्कर्जा प्राप्त गर्न नसकेको बैंकरहरुको गुनासो गरेपछि राष्ट्र बैंकले पुनः कोभिड–१९ बाट अति प्रभावित र मध्यम प्रभावित ऋणीहरुलाई पुनर्कजाका लागि आवेदन दिन आह्वान गरेको हो।

ऋणीले पुस १७ देखि माघ १६ गतेसम्म आफूले कर्जा लिएको बैंकमा एकमुष्ठ रुपमा आवेदन दिन सक्ने छन्। राष्ट्र बैंकले पुनर्कर्जा कार्यविधि २०७७ को बुँदा ९ को २ (क) बमोजिम एकमुष्ट रुपमा प्रदान हुने लघु, घरेलु तथा साना मध्यम पुनर्कर्जा, साधारण पुनर्कर्जा तथा विशेष पुनर्कर्जाका लागि आवेदन दिन अनुरोध गरेको छ।

ऋणीले नेपाल राष्ट्र बैंक पुनर्कर्जा कार्यविधि, २०७७ को अनुसूची १ बमोजिमको ढाँचा अनुसार आवेदन दिनुपर्नेछ। इजाजतपत्र प्राप्त संस्थाको सञ्चालक समितिको निर्णय समावेश गर्नु पर्नेछ। पुनर्कर्जा माग गर्ने ऋणीले नेपाल राष्ट्र बैंकले तोके अनुसारको वित्तीय विवरण एक्सेल सिटमा उल्लेख गर्नु पर्छ।

ऋणीले माग गर्ने कूल पुनर्कर्जा रकम संस्थाको प्राथमिक पुँजीको अधिकतम २० प्रतिशतसम्म हुनुपर्ने उल्लेख छ। एकभन्दा बढी बैंक तथा वित्तीय संस्थामार्फत् कर्जा उपयोग गरेका ऋणीको हकमा एक बैंक वित्तीय संस्थामार्फत् मात्र आवेदन भएको व्यहोरा आवेदकले सुनिश्चित गरेको हुनुपर्नेछ।

पुनर्कर्जाका लागि आवेदन गर्दा लघु, घरेलु तथा साना उद्यम क्षेत्रका ऋणीलाई अधिकतम मात्रामा समेट्ने गरी आवेदन गर्नुपर्नेछ। आवेदनका लागि कर्जा छनोट गर्दा प्रत्येक शाखाबाट न्यूनतम ५ वटा ग्राहक–ऋणी समेटिएको हुनुपर्ने राष्ट्र बैंकले उल्लेख गरेको छ। यस्तै, आवेदन पेश गर्ने संस्थाको पुँजीकोष अनुपात राष्ट्र बैंकले तोकेबमोजिम पुगेको हुनु पर्नेछ।

नेपाल राष्ट्र बैंकले ऋणीको वर्गीकरण निम्न अनुसार गरेको छ।
अति प्रभावित क्षेत्रः
ट्रेकिङ्ग, ट्राभल एजेन्सी, पर्वतारोहण, र्‍याफ्टिङ्ग, क्याम्पिङ्ग, टुर अपरेटर, हिलिङ्ग सेन्टर, क्यासिनो, मसाज स्पा आदि।
होटल, पर्यटक आवास, मोटेल, ग्रामीण पर्यटन, होम स्टे, रिसोर्ट, तथा रेष्टुराँ, पर्यावरणीय पर्यटन, वन्यजन्तु आरक्ष।

साहसिक पर्यटन-स्किइङ्ग, ग्लाइडिङ्ग, वाटर र्‍याफ्टिङ्ग, हट एयर व्यालुनिङ्ग, क्यानोइङ, प्यारासेलिङ्ग, घोडचढी, हात्तीचढी, बन्जी जम्पिङ्ग, हिमाल आरोहण र अवलोकनलगायत, गल्फ कोर्स, पोलो, पोनी ट्रेकिङ्ग, पदयात्रा, माउन्टेन फ्लाइट सञ्चालन।

केवलकार हवाई तथा पर्यटकीय यातायात (हवाई इन्धन परिवहन तथा सम्बन्धित व्यवसाय)।

मनोरञ्जन, मनोरञ्जन पार्क, रिक्रिएसनसम्बन्धी व्यवसाय, पार्टी प्यालेस, चलचित्र उत्पादन, वितरण, सिनेमा हल रोजगारी गुमेका वा ले अफमा परेका श्रमिक, कामदार वा कर्मचारी।

सडेर गलेर जाने वस्तु, जस्तै तरकारी, फलफूल, पुष्प, माछा मासु, दाना।

दुध तथा दुग्धजन्य उत्पादन, अण्डा आदि
उत्पादन तथा बिक्री वितरण-कुखुरापालन व्यवसाय, पशुपन्छी, मौरी तथा मत्स्यपालन व्यवसाय, तयारी पोशाक, हस्तकला तथा सीपमुलक व्यवसाय।

वैदेशिक रोजगार सेवा प्रदायक, शैक्षिक परामर्श सेवा प्रदायक संस्थाहरु।

मध्यम प्रभावित क्षेत्र
खप्ने सामान जस्तै, प्लास्टिक, फलाम–स्टील, टायर, छाला, धातुका उत्पादन, घरायसी उपकरण आदि उत्पादन तथा विक्री वितरणसँग सम्बन्धित उद्योग व्यवसाय।

निजी तथा आवासीय विद्यालय, उच्च शिक्षालय तथा माध्यमिक विद्यालय, कलेज तथा विश्व विद्यालय प्राविधिक शिक्षालय, प्रि–स्कुल, चाइल्ड केयर, यात्रुवाहक स्थल यातायात, व्युटी पार्लर, सैलुन, कस्मेटिक सर्जरीलगायतका सामाजिक तथा व्यक्तिगत सेवाका क्रियाकलाप, कानुनी, लेखा, इन्जिनियरिङ लगायतका परामर्श सेवा वा व्यवसाय, अस्पताल, क्लिनिक, नर्सिङहोम, डायग्नोस्टिक सेन्टर, हेल्थ सेन्टर वा फिट्नेस सेन्टर.

भण्डारण गर्न सकिने वस्तु (खाद्यान्न वाहेक) उत्पादन, प्रशोधन तथा बिक्री वितरण, वन तथा खनिजजन्य उद्योग, निर्माण व्यवसाय, औषधि उत्पादन, छपाइ, प्रकाशन तथा संचार गृह, निर्माणाधीन जलविद्युत तथा नवीकरणीय ऊर्जा, पत्थर, माटो तथा सिसाका उत्पादनसम्बन्धी व्यवसायीले पुनर्कर्जाका लागि आवेदन दिन सक्ने छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

सहकारी ठगी प्रकरण: रविलाई अदालतमा उपस्थित गराइयो

घुम्नैपर्ने एक सय गन्तव्यमध्येको मुन्दुम पदमार्ग प्रवर्द्धन गर्न महोत्सव

सिंहदरबारमा विपक्षी दलहरूको बैठक जारी