काठमाडौं-काठमाडौं उपत्यकामा विद्युतको माग गत वर्षभन्दा कम भए पनि नेपाल विद्युत प्राधिकरणले अघोषित लोडसेडिङ गर्न थालेको छ। उपत्यकामा अहिलेसम्म विद्युतको अधितकतम माग (पिक लोड) गत वर्षभन्दा कम भए पनि प्राधिकरणले व्यवस्थापन गर्न नसक्दा अघोषित लोडसेडिङ हुन थालेको हो।
विद्युत व्यवस्थापन गरी गुणस्तरीय आपूर्तिमा प्राधिकरण व्यवस्थापन र ऊर्जा मन्त्रालयले नै ध्यान दिन नसक्दा दैनिक पटक-पटक विद्युत कटौती हुन थालेको छ। उपत्यकाका अधिकांश स्थानमा दैनिक ५ पटकसम्म आपूर्ति अवरुद्ध हुने गरेको हो।
विद्युत प्राधिकरणले दिएको जानकारी अनुसार गत पुस १२ गते काठमाडौं उपत्यकामा विद्युतको अधिकतम माग ३७६ मेगावाट थियो। जबकि गत वर्षको यही दिन विद्युत माग ४२४ मेगावाट थियो। गत वर्षको तुलनामा यो वर्षको आइतबार ५० मेगावाट थोरै विद्युत माग भए पनि काठमाडौंका अधिकांश क्षेत्रमा बत्ती काटिएको थियो।
यस्तै काठमाडौंमा पुस १३ गते पनि गत वर्षको भन्दा विद्युत माग ७० मेगावाटले थोरै थियो। गत वर्षको पुस १३ गते ४४३ मेगावाट अधिकतम माग थियो। जबकि यो वर्ष पुस १३ गते काठमाडौंमा ३७७ मेगावाट विद्युत माग थियो।
प्राधिकरण स्रोतले दिएको जानकारीअनुसार काठमाडौं उपत्यकामा विद्युत माग घटे पनि भारतबाट हुने आयात भने बढेको छ। गत वर्षको पुस १३ गते ४९८ मेगावाट विद्युत आयात भएकोमा यो वर्ष बढेर ६३४ मेगावाट पुगेको छ।
यस्तै पुस १२ गते विद्युत आयात गत वर्षको यही दिनको तुलनामा १६१ मेगावाट विद्युत धेरै आयात भएको छ। गत वर्षको पुस १२ गते ४७१ मेगावाट विद्युत आयात भएकोमा यो वर्ष ६३२ मेगावाट आयात भएको प्राधिकरणले जनाएको छ।
प्राधिकरणले विद्युतको व्यवस्थापनमा ध्यान नदिँदा लगातार बत्ती जान थालेपछि उपभोक्ताले अघोषित लोडसेडिङ भएको भन्दै तीव्र विरोध गरिरहेका छन्। सामाजिक सञ्जाल प्रयोगकर्ताले ऊर्जामन्त्री टोपबहादुर रायमाझी तथा नेपाल विद्युत प्राधिकरणका कायम मुकायम कार्यकारी निर्देशक हितेन्द्रदेव शाक्यको चर्को विरोध गरिरहेका छन्।
प्राधिकरणका कायम मुकायम कार्यकारी निर्देशक शाक्यले भने जीर्ण संरचरनाका कारण विद्युत आपूर्तिमा समस्या भएको दावी गरे। काठमाडौंमा अधिकतम माग गत वर्ष जति नपुगे पनि निरन्तर उच्च विद्युत माग रहेको बताए। 'तारहरू पुराना छन्, निरन्तर उच्च लोड आपूर्ति हुँदा तिनीहरू पग्लने र चुँडिने पनि भएका छन्,' शाक्यले भने, 'हामीले लोडसेडिङ गर्न खोजेको वा तालिका तयार गर्न लागेको होइन।'
कोभिड-१९ को संक्रमणको जोखिम रहेको भन्दै काठमाडौं महानगरपालिकासहितका केही स्थानीय तहले अझै शैक्षिक संस्था खोल्न दिएका छैनन्। उनीहरूले अनलाइन कक्षाबाटै विद्यार्थीको पठन पाठन अघि बढाउन भनिरहे पनि प्राधिकरणले विद्युत आपूर्ति कटौती गर्दा अनलाइन कक्षा तथा साना तथा मझौला व्यवसायीको व्यवसाय बन्द हुने अवस्थाम पुगेको छ।
काठमाडौं उपत्यकामा माग घटे पनि समग्रमा भने विद्युत माग बढेको छ। काठमाडौंमा होटलहरू पूर्णरूपमा सञ्चालनमा नआएकाले पहिले जति माग नबढेको हो। तर तराईमा भने गत वर्षभन्दा करिब १०० मेगावाट धेरै विद्युत माग रहेको प्राधिकरण स्रोतले जनाएको छ। 'तराईमा गर्मीमा बढ्ने माग जाडोमा बढेको छ, यसको अर्थ त्यहाँ चुहावट बढ्यो,' प्राधिकरण स्रोतले भन्यो, 'चोरी नियन्त्रणमा ध्यान नपुर्याउँदा यो समस्या आएको हो।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768221200.png)
-1764146706.png)
