महेन्द्र रामको मृत्युपछि भएको प्रदर्शनका सहभागी । फाइल तस्बिर
सर्लाही–सर्लाहीको रामनगर गाउँपालिका–७, सिसौट निवासी महेन्द्र रामका परिवारलाई सरकारले १० लाख रुपैयाँ उपलब्ध गराउने निर्णय गरेको छ । प्रमुख जिल्ला अधिकारी सुरेन्द्र पौडेलले मंसिर ३० गते बसेको मन्त्रिपरिषद बैठकले मृतक रामका परिवारलाई १० लाख रुपैयाँ आर्थिक सहायता दिने निर्णय गरेको बताए।
गत असोज २१ गते छिमेकीसँग विवादका क्रममा कुटपिटबाट घाइते भएका महेन्द्रको वीरगञ्जमा उपचार गर्दागर्दै मृत्यु भएको थियो। नेपाली कांग्रेस सर्लाहीले नेपाल कम्युनिष्ट पार्टी (नेकपा) का कार्यकर्ताको कुटाइबाट आफ्ना कार्यकर्ता महेन्द्रको मृत्यु भएको दाबीसहित मृतकलाई शहीद घोषणा तथा क्षतिपूर्तिस्वरूप मृतकका परिवारलाई १० लाख उपलब्ध गराउन र कुटपिटमा संलग्नलाई पक्राउ गरी कारबाहीको दायरामा ल्याउन भन्दै आन्दोलन चर्काएको थियो।
नेपाली कांग्रेसका नेता तथा कार्यकर्ताले गत असोज २८ गते जिल्ला प्रहरी कार्यालय सर्लाही घेराउ गर्ने क्रममा प्रहरीसँग झडपसमेत भएको थियो । झडपमा परी कांग्रेसका नेता कार्यकर्ता र सुरक्षाकर्मीतर्फ पाँच दर्जनभन्दा बढी घाइते भएका जिल्ला प्रहरी कार्यालय सर्लाहीले जनाएको छ।
नेपाली कांग्रेसका जिल्ला सभापति नागेन्द्रकुमार राय र नेताहरु डा अमरेशकुमार सिंह, वीरेन्द्रकुमार सिंह, उपेन्द्र कुशवाहालगायतको नेतृत्वमा निरन्तर आन्दोलन चर्किएपछि स्थानीय प्रशासनले मृतकका परिवारको आर्थिक अवस्था अत्यन्त दयनीय भएकाले उचित आर्थिक सहयोग उपलब्ध गराउन गृहमन्त्रालयमा सिफारिस गरेको थियो। मृतक महेन्द्रको शव अझै पनि वीरगञ्जको अस्पतालमै रहेको पीडितका आफन्तजनले बताएका छन् ।
प्रदेशसभा सदस्य वीरेन्द्रकुमार सिंहले सरकारले गरेको निर्णयानुसार रकम आउन केही दिन लागे पनि जिल्ला प्रशासन कार्यालयले लिखितरूपमा मृतक परिवारलाई १० लाख रुपैयाँ पाउने निर्णय भएको पत्र दिए तत्कालै शव बुझिने बताएका छन्। प्रमुख जिल्ला अधिकारी पौडेलले आफूलाई आधिकारीकरूपमा परिपत्र आएपछि मात्र सो काम गर्ने बताएका छन्। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
