नवलपरासीमा हुलाकी राजमार्ग निर्माणको काम हुँदै। काठमाडौं-तराईंको समृद्धिको संवाहक भनिएको हुलाकी राजमार्ग निर्माणको भौतिक प्रगति ५६.२ प्रतिशत भएको छ। यो राजमार्गको वित्तीय प्रगति ५६.७६ प्रतिशत (३७.०१ अर्ब) भएको सडक विभागले जानकारी दिएको छ।
राष्ट्रिय गौरवको यो आयोजनामा सुरुवाती लक्ष्यअनुसार काम नभएकाले निर्माण सम्पन्न गर्ने मिति पनि सरेको सर्यै छ। हालसम्म निर्माण सम्पन्न भइसक्नुपर्ने यो राजमार्गको आधाउधी काम बाँकी नै भएको सडक विभागले जनाएको हो।
१ हजार ७ सय ९२ किलोमिटरको यो राजमार्ग हालसम्म ६ सय २ किलोमिटरमात्र कालोपत्रे भएको छ। त्यस्तै २ सय २६ किलोमिटर सडक ग्राभेल भएको छ भने ६ सय ९५ किलोमिटर निर्माणाधीन अवस्थामा रहेको सडक विभागले जनाएको छ।
झापादेखि कञ्चनपुरसम्मको यो राजमार्गमा २१९ वटा पुल बनाउनुपर्छ। चालु आर्थिक वर्षको मंसिर मसान्तसम्मको प्रगति विवरणअनुसार हुलाकी राजमार्गमा जम्मा ९७ वटा मात्र पुल बनेको विभागको भनाइ छ।
चालु आर्थिक वर्षको साउनदेखि कात्तिकसम्ममा भने हुलाकी राजमार्गको प्रगति उत्साहजनक भएको विभागको भनाइ छ। पहिलो चौमासमा आयोजनाको भौतिक प्रगति ८१.४१ प्रतिशत छ। चार महिनामा ८२ किलोमिटर कालोपत्रे गर्ने, २३ किलोमिटर ग्राभेल गर्ने र ३ वटा पुल निर्माण गर्ने लक्ष्य लिइएकोमा ९० किलोमिटर कालोपत्रे, २८ किलोमिटर ग्राभेल र २ वटा पुल निर्माण सम्पन्न भएको विभागले जनाएको छ।
आर्थिक वर्ष २०६६/६७ देखि निर्माण थालिएको यो आयोजना २०७५/७६ सम्म बनाइसक्ने लक्ष्य लिइएको थियो। तर हाल यो आयोजना निर्माण सम्पन्न गर्ने मिति २०७९/८० राखिएको छ। अहिलेकै रफ्तारमा निर्माण जारी रहने हो भने पछिल्लो निर्धारित मितिमा समेत सम्पन्न हुने अवस्था नरहेको सडक विभागकै इन्जिनियर बताउँछन्।
सन् २००२ देखि २०२० का लागि तयार पारिएको २० वर्षे दीर्घकालीन सडक गुरुयोजनामा पूर्वदेखि पश्चिमसम्म २० जिल्लालाई जोड्ने हुलाकी राजमार्ग निर्माण गर्ने योजना बनाइएको थियो। राजमार्ग बनाउन सन् २००६ मा नेपाल–भारतबीच समझदारी भएको थियो। समझदारीअनुसार सरकारले छानेको यो सडकको डिजाइन, सुपरिवेक्षण र निर्माण तीन चरणमा पूरा गर्ने र यसको सम्पूर्ण खर्च भारतले बेहोर्ने सम्झौता गरेको थियो।
पूर्व मेचीदेखि पश्चिम महाकालीसम्मको तराईका बस्तीमा यातायात विस्तार गर्न हुलाकी राजमार्गको योजना ल्याइएको हो। यसले झापाको केचनाकवलबाट पश्चिममा कञ्चनपुरको दोधारा-चाँदनीसम्म जोड्छ। यो राजमार्गलाई तराई–मधेसका जिल्ला जोड्ने पहुँचमार्गका रुपमा लिइएको छ।
२०७५ मा सम्पन्न हुने अनुमान गरिएको आयोजनाको कुल लागत ४७ अर्ब २७ करोड अनुमान गरिएको छ। आयोजना सक्ने लक्ष्य बढेसँगै आयोजनाको लागतसमेत बढेको छ। हाल यो आयोजनाको कुल लागत ६४ अर्ब २० करोड रुपैयाँ अनुमान गरिएको छ। निर्माण सम्पन्न हुनेबेलासम्म अझ लागत बढ्न सक्ने अनुमान गरिएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
