काठमाडौं- स्पेनिस ला लिगामा बार्सिलोनाले ओसासुनलाई ४-० ले हरायो। जसमा खेलको ७३औँ मिनेटमा कप्तान लियोनल मेस्सीले गरेको गोल र त्यसपछिको ‘सेलिब्रेसन’को खुब चर्चा भइरहेको छ। आफ्नो गोलमार्फत मेस्सीले गएको बुधबार निधन भएका अर्जेन्टिनी स्टार खेलाडी डिएगो म्याराडोनालाई सम्झिए।
मेस्सीले गोलपछि बार्सिलोनाको जर्सी फुकाले, उनले त्यसभित्र लगाएको अर्जेन्टिनी क्लब ‘निवेल्स वल्ड ब्वाइज’ को १० नम्बर जर्सीमा दुबै हात आकाशतिर फर्काएर म्याराडोनालाई सम्झिए।
म्याराडोना सन् १९९३ मा स्पेनिस क्लब सेभियाबाट अर्जेन्टिना नै फर्किएका थिए। जहाँ उनी निवेल्स वल्ड ब्वाइजमा आबद्ध भए। सन् १९८२ मा बोका जुनियर्सबाट बार्सिलोना गएदेखि उनी अर्जेन्टिनी क्लब फर्किएको त्यसै समय थियो।
त्यसबेला निवेल्स वल्ड ब्वाइजबाट म्याराडोनाले सीएस एमिलेकविरुद्धको विजयी गोल गरेको एक खेलको प्रत्यक्ष साक्षी थिए लियोनल मेस्सी। झण्डै २७ वर्षपछि मेस्सीले उनै म्याराडोनालाई आफ्नो उत्कृष्ट गोलपछि उनकै क्लबको जर्सीमा ‘सेलिब्रेसन’ गरेर सम्झिए।
केही वर्षअघि टीवाईसी स्पोट्र्ससँगको अन्तर्वार्तामा म्याराडोनाको त्यो खेल सम्झँदै मेस्सीले भनेका थिए- ‘धेरै कुरा त मलाई सम्झना छैन, किनभने म धेरै सानै थिएँ। तर त्यसबेला म्याराडोनाले खेलेको र उनले डेब्यू गरेको कुराहरु भने सम्झना छ।’ त्यसबेला मेस्सी ६ वर्षका थिए।
निवेल्स वल्ड ब्वाइजमा म्याराडोनाले सात खेल मात्र खेले पनि त्यो समय उनका लागि विशेष थियो। किनभने १० वर्षपछि घरेलु मैदानमा फर्किंदा उनी युरोप जाने बेलाको भन्दा ठूलो नाम भइसकेको थियो। उनलाई मैदानमा हेर्न चाहनेको संख्या असीमित भइसकेको थियो।
निवेल्स वल्ड ब्वाइज म्याराडोनाको खेल जीवनको अन्तिमतिरको क्लब हो भने मेस्सीको खेल जीवनको सुरुवाती क्लब। युवा समयमा नै बार्सिलोना जानुअघि मेस्सी सन् १९९४ देखि २००० सम्म निवेल्स वल्ड ब्वाइजमा नै थिए। जुन बार्सिलोनाबाहेक उनको एकमात्र क्लब हो।
मेस्सी यस्ता खेलाडी हुन् जसलाई युवा उमेरदेखि नै धेरै पटक म्याराडोनासँग तुलना गरियो। दुवै अर्जेन्टिनाको हुनु, निवेल्स वल्ड ब्वाइजमा दुबै सामेल हुनु, दुवैले बार्सिलोनामा खेल्नु र मेस्सीको १० नम्बर जर्सीसँगै कतिपय शैली पनि मिल्नु त्यो तुलनालाई मिलेको साथ थियो।
ओसासुनाविरुद्ध मेस्सीको गोल सेलिब्रेसनको तस्बिर ट्वीट गर्दै निवेल्स वल्ड ब्वाइज क्लबले लेखेको छ- ‘यसमा क्याप्सन तपाइँ आफै राख्नुस्, मैले सकिनँ।’
मेस्सीले इन्स्टाग्राममा म्याराडोना निवेल्स वल्ड ब्वाइजमा हुँदाको उस्तै तस्बिर राखेर लेखेका छन्- ‘गुडबाई डिएगो।’
म्याराडोना र मेस्सीले सन् २००५ मा एकपटक सँगै खेलेका पनि थिए। त्यसबेला मेस्सी १८ वर्षका थिए। म्याराडोना ४५ वर्षका। उनीहरुले अर्जेन्टिनाबाट ‘च्यारिटी’का लागि एक खेल खेलेका थिए। उनीहरु अर्जेन्टिनी टिमका समान समयका खेलाडी भएको भए के हुँदो हो भन्ने कल्पनामा त्यही समय दर्शक परेका थिए। त्यो समय ला लिगामा सात खेल खेलिसकेका मेस्सीको शैली विश्वभर चिनिन थालिसकेको थियो। जहाँ उनको तुलना म्याराडोनासँग हुनसमेत सुरु भइसकेको थियो।
म्याराडोना सन् २००८ देखि २०१० को समय अर्जेन्टिनी राष्ट्रिय टिमको प्रशिक्षक रहँदा मेस्सीसँग नजिक रहेर काम गरे। २०१० को विश्वकपका अर्जेन्टिनाको समय राम्रो हुन नसक्दा म्याराडोना र मेस्सीको साझेदारी लामो समय रहेन।
मेस्सी मात्र म्याराडोनाका प्रशंसक होइनन्, हरेक समय म्याराडोना पनि मेस्सीको खुब तारिफ गर्थे। उनको शैली र खेलप्रतिको भावना राम्रो रहेको म्याराडोना मुक्तकण्ठले प्रशंसा गर्थे। मेस्सीको खेलको प्रत्यक्ष दर्शक बन्दा म्याराडोना ‘हुटिङ’ गरिरहेका हुन्थे।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
