काठमाडौं- चार वर्षपछि नेप्से सूचक १८ सयको लाइनमा उक्लिएको छ। पछिल्ला दिनमा सेयर बजारमा भइरहेको सुधार जारी छ।
सुधारका क्रममा मंगलबार नेप्से सूचक १८१०.११ अंकमा पुगेको हो। वाणिज्य बैंकहरुको सुधारबिना नै सेयर बजारमा सुधार आइरहेको छ। थोरै सेयर पुँजी भएका कम्पनीको सेयरमा कर्नरिङ गरेर बजार सुधार हुने क्रम रोकिएको छैन। यसकै निरन्तरताले गर्दा मंगलबार नेप्से सूचक २९.६८ अंकले सुधार भएको छ।
सूचिकृत पुँजीका हिसाबले बैंक तथा वित्तीय संस्थाको सेयर बढी छ। तर पछिल्ला दिनमा थोरै सेयर पुँजी भएका कम्पनीको बजार पुँजीकरणको बजार हिस्सा बढिरहेको छ। त्यसैले गर्दा सूचक सुधारमा टेवा पुर्याएको हो। कर्नरिङ जारी रहेका कारण ती कम्पनीमा नाफा बुक सुरु भएको छैन। अझै मूल्य बढ्छ भन्ने महत्वकाङ्क्षाका कारण सूचकमा उछाल आएको हो।
सूचकमा सुधारसँगै कारोबार रकम ५ अर्ब ४४ करोड रुपैयाँको भएको छ। कारोबार सुरु हुने बित्तिकै केही समय रातो देखिए पनि लगत्तै बजार सुधार हुन थालेको थियो। होटलको सूचक ३४ अंकले तल झरेको छ भने वाणिज्य बैंकको सूचकमा सामान्यमात्रै सुधार देखिएको छ।
वाणिज्य बैंकहरुको सूचक १.४४ अंकले सुधार हुँदा निर्जीवन बीमाको ३२७ अंक, जीवन बीमाको सूचक २४८ अंकले सुधार भएको छ।
सबैभन्दा धेरै मूल्य बढ्ने क्रममा बोटलर्स नेपाल, हिमालयन डिष्ट्रिलरी, विशाल बजार, आखुखोला जलविद्युत र मल्टिपर्पोज फाइनान्सको सेयर मूल्यमा सर्किट लागेको छ। जम्मा १२५ कम्पनीको सेयर मूल्य सुधार हुँदा ३५ वटाको मूल्यमा भने गिरावट आएको छ। सबैभन्दा धेरै एनआइसी एसिया बैंकको ३७ करोड रुपैयाँको कारोबार भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1780051139.JPG)
-1764146706.png)
