धनतेरसकै दिन बिक्यो २५ किलो सुन र ९ सय किलो चाँदी

अर्थ समाचार

अरुण सापकोटा शनिबार, कात्तिक २९, २०७७ ०८:११

काठमाडौं- कोरोना महामारीकै बीच धनतेरसको दिन सुनचाँदी व्यवसायीले अपेक्षा गरेभन्दा बढी व्यापार भएको छ।

शुक्रबार बिहानैदेखि सुनचाँदी पसलमा व्यापारीले अनुमान गरेभन्दा बढी सर्वसाधारणको घुइँचो लागेको थियो। शुक्रबारमात्रै २५ किलोभन्दा बढी सुन र ९ सय किलोको चाँदीका भाडाकुडा तथा सिक्का बिक्री भएको सुन चाँदी व्यवसायी महासंघका वरिष्ठ उपाध्यक्ष माणिकरत्न शाक्यले बताए।

व्यापारीले यस वर्षको धनतेरसका लागि खासै तयारी गरेका थिएनन्। कोभिडका कारण व्यापार नहुने अनुमान गरेका व्यापारीले अपेक्षा गरेभन्दा बढी व्यापार भएको हो। शाक्यले भने, ‘धनतेरसको दिन सुनचाँदी व्यवसायीले अपेक्षा गरेभन्दा सुन चाँदीको व्यापार भयो।‘

गएको वर्ष धनतेरसकै दिन ५० किलो हाराहारीमा सुनका सामान बिक्री भएको थियो भने एक हजारदेखि १२ सय किलो हाराहारीमा चाँदीका सामान बिक्री भएका थिए। गत वर्षको तुलनामा चाँदीको व्यापार ४० प्रतिशतमात्रै भएको छ भने चाँदीको व्यापार ७५ प्रतिशत मात्रै भयो। तर यो अपेक्षाभन्दा बढी हो।

एक साता अगाडिसम्म व्यापारीको कुनै पनि तयारी थिएन। गएका वर्षमा तिहार आउनुभन्दा १५ दिन अगाडिदेखि नै तयारी हुन्थ्यो। तर यस वर्ष दुई दिन अगाडिदेखि मात्रै अर्डर आउन थालेको शाक्यले जानकारी दिए। शुक्रबारको कारोबार व्यापारीसँग भएको स्टकले नै लगभग धानेको उनी बताउछन्। अबका केही दिन राम्रो कारोबार हुने भएकाले कालिगढहरुलाई बोलाएर सामान तयार गर्न लागिएको व्यापारीहरुले जानकारी दिए।

तिहारका अन्य दिनमा पनि सुनचाँदीको व्यापार हुने भएकाले व्यापारीहरुले नयाँ सामान तयार पार्न थालेका हुन्। नेपालमा अवको केही महिना सुनचाँदीको व्यापारको सिजन मानिन्छ। मंसिरमा विवाहको समय भएकाले यस सयम अन्य समयको भन्दा धेरै सुनको कारोबार हुन्छ।

केही दिन अगाडि अन्तर्राष्ट्रिय बजारमा सुनको भाउमा गिरावट आएकाले नेपाली उपभोक्ताले राहत पाएका छन्। दुई महिना अगाडि सुनको भाउ एक लाख रुपैयाँभन्दा माथि थियो। तीन दिन अगाडि एकै दिन सुनको भाउ ३४ सय रुपैयाँले घटेकाले पनि उपभोक्ताको आकर्षण देखिएको हो। नेपाली बजारमा सुन चाँदीको भाउ जति सुकै महंगो भए पनि केही वर्गका मानिसहरुले नियमित रुपमा किन्ने गरेको एक व्यापारीले बताए।

धनतेरसका दिन नेपालको तराइ क्षेत्र र भारतमा नयाँनयाँ भाँडाकुडा र सुनचाँदीका गरगहना किनमेल गर्ने परम्परा छ।

धनतेरसका दिन सुन, चाँदी, तामा लगायतका धातुका नयाँ भाँडाकुँडा किनेर घरमा ल्याई पूजाआजा गरेमा लक्ष्मी स्थिर भई बस्छिन् भन्ने धार्मिक विश्वास छ। यो दिन किनिएको वस्तु टिकाउ, लाभदायक र शुभ हुने धार्मिक मान्यता रहेकाले तिहार पर्वको पहिलो दिन आफ्नो क्षमताअनुसार सबैले केही न केही किन्न चाहने परम्परा छ।

यसैगरी यसदिन सुन, चाँदी, गहना र भाँडा किन्दा परिवारमा आउने सबै नकारात्मक शक्तिहरु हटेर जाने र परिवारका प्रत्येक सदस्यका लागि लाभदायक हुने विश्वास गरिन्छ।नेपालमा पछिल्लो समय धनतेरसका दिन बहुमूल्य धातु किन्ने प्रचलन बढ्दै गएको छ।