काठमाडौं- अघिल्लो वर्षको यही समयमा भ्याइनभ्याई भेटिने उपत्यकाका भाँडा व्यापारीहरु यतिबेला निकै फुर्सदिला देखिन्छन्। भाँडा किन्ने ग्राहक नआउँदा बोहोनी नै दोहोर्याउन मुस्किल पर्ने व्यापारीहरु बताउँछन्।
इन्द्रचोकका भाँडा व्यापारी प्रविन लामा अघिल्लो वर्षको तुलनामा यस वर्ष भाँडावर्तनको व्यापार ७० प्रतिशतले गिरावट आएको बताए। ‘अघिल्लो यस्तै समयमा दिनमा १० लाखसम्म व्यापार हुन्थ्यो। अहिले त बोहोनी दोहोर्याउनै गाह्रो छ,’ व्यापारी लामाले नेपाल लाइभलाई सुनाए।
सामान्य अवस्था हुँदा विशेष गरेर तामा, पित्तल, ब्रासलगायतका भाँडावर्तनको व्यापार निकै राम्रो हुने गर्दथ्यो। तिहारको समयमा मात्रै आफ्नो पसलबाट झण्डै करोडको व्यापार हुने व्यापारी लामा बताउँछन्। तर यो वर्ष तिहार नजिकिए पनि व्यापार नभएको उनको भनाइ छ।
‘मान्छेको भिडभाड त झण्डै पहिले जस्तै नै छ तर यतिबेला मानिसहरुसँग खानकै लागि पैसा छैन भाँडा केले किन्नु?’ व्यापारी लामा भन्छन्, ‘अलिअलि त व्यापार हुन्छ। कहिले काँही दिनमा १ लाखसम्मको व्यापार हुन्छ।’
इन्द्रचोक ब्रास भाँडा पसलका व्यापारी पनि ग्राहक कुरिरहेका भेटिए। अघिल्लो वर्ष तिहार आउनुअघि नै मारामार व्यापार हुने उनीहरुको पसल यो वर्ष सुनसान छ।
‘पोहोर साल भ्याइनभ्याइ थियो। यो वर्ष यी यस्तो फुर्सद छ। व्यापार केही छैन,’ व्यापारी ठाकुर सापकोटा सुनाउँछन्। अधिकांश व्यापारीले अघिल्लो वर्षको तुलनामा ३० प्रतिशतमात्रै भाँडावर्तनको व्यापार रहेको बताएका छन्।
हिन्दुहरुको दोस्रो महान चाड तिहार खुसी, उमंग तथा उज्यालोको पर्व भनेर पनि चिनिन्छ। हरेक वर्ष दाजुभाइ तथा दिदीबहिनीबीच हर्षोल्लास साटासाट गरेर मनाइने पर्व तिहारमा विशेष गरेर मीठामीठा परिकार खाने, देउसीभैलो खेल्ने चलन छ।
यसका साथै विशेष गरी लक्ष्मी पुजाको दिनका लागि मानिसहरुले नयाँ भाँडावर्तन किन्ने चलन छ। लक्ष्मी पूजाको दिनका लागि विशेष गरी तामा, पित्तल, चाँदी, ब्रासलगायत भाँडा जोहो गरेर पुजा गर्ने चलन छ। विशेष गरी, खड्कुला, थाली, तावा, कलस, दियो, पञ्चपाला, ताम्रापात्र, कर्मपात्र, गाग्री लगायत अन्य भाँडावर्तन किन्ने गरिन्छ। यसरी तामा, पित्तल, चाँदीलगायत भाँडावर्तन लक्ष्मीपुजाको दिन भित्र्याउँदा घरमा लक्ष्मीले बास गर्ने जनविश्वास पनि छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766039188.jpg)
-1764146706.png)
