काठमाडौं- भारतीय विदेश सचिव हर्षवर्धन शृंगला नोभेम्बर महिनामा दुई दिने नेपाल भ्रमणका लागि आउने भएका छन्। नोभेम्बर २६ र २७ का लागि शृंगला नेपाल भ्रमणमा जाने तय भएको भारतीय सञ्चार माध्यम हिन्दूस्तान टाइम्सले समाचार प्रकाशन गरेको छ।
भारतीय स्थल सेनाध्यक्ष मनोजमुकुन्द नरवणेलाई नेपाली सेनाको मानार्थ महारथी पदवी प्रदान गरिएको केही दिन नबित्दै भारतले विदेशसचिव शृंगलालाई नेपाल पठाउने निर्णय गरेको हो। नरवणेले प्रधानमन्त्री केपी शर्मा ओली र राष्ट्रपति विद्यादेवी भण्डारीसँग छुट्टाछुट्टै भेट गरेका थिए। यसअघि भारतीय गुप्तचर संस्था रअका प्रमुख सामन्तकुमार गोयलले पनि प्रधानमन्त्री ओलीसँग भेट गरेका थिए।
भारतले अतिक्रमण गरेका नेपाली भूमि समेटेर नेपालले नयाँ नक्सा जारी गरेपछि दुई देशबीच लामो समयसम्म संवादहीनताको अवस्था रहेपनि पछिल्लो समय भारतीय सरकारको पक्षबाट नेपालमा भ्रमण बाक्लिँदै गएका छन्।
लामो समयदेखि स्थगित परराष्ट्र सचिवस्तरीय वार्ताको लागि भारतीय विदेश सचिव नेपाल भ्रमणमा आउन लागेको बताइएको छ। शृंगलाको नेपाल भ्रमणका क्रममा सीमा निर्धारणसम्बन्धी दुवै देशका प्रतिनिधि सम्मिलित संयुक्त कार्यदलको पनि बैठक हुन सक्ने बताइएको छ।
'यो एक मात्र एजेन्डामा केन्द्रित हुने भ्रमण होइन,' एक वरिष्ठ कूटनीतिज्ञलाई उद्धृत गर्दै हिन्दूस्तान टाइम्सले लेखेको छ, 'पञ्चेश्वर बहुउद्देश्यीय जलविद्युत आयोजनालागयतका विषयमा पनि छलफल हुन सक्छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773818466.png)
-1773818050.png)
-1764146706.png)
