पर्यटन-उड्डयन

नेपाल एयरलाइन्सको हङकङ व्यापार खोसेर 'सेटिङ'मा गेटजेटलाई अनुमति

उत्तम काप्री शुक्रबार, कात्तिक १४, २०७७ १८:००

काठमाडौं- अक्टोबर ४ (असोज १९ गते) हङकङले नेपाल एयरलाइन्सलाई उडान गर्न प्रतिबन्ध लगायो। उक्त प्रतिबन्ध १७ अक्टोबरसम्म जारी रह्यो। १७ अक्टोबरमा प्रतिबन्ध फुकुवा भएसँगै पुनः नेपाल एयरलाइन्सले २ वटा काठमाडौं-हङकङ उडान गर्‍यो। तर, फेरि हङकङले नेपाल एयरलाइन्समा आएका यात्रुमा कोरोना देखिएको भन्दै २० अक्टोबरबाट उडानमा प्रतिबिन्ध लगाएको छ। यो प्रतिबन्ध नोभेम्बर ३ सम्मका लागि जारी रहनेछ।

अक्टोबर ४ मा नेपाल एयरलाइन्सलाई उडानमा प्रतिबन्ध लगाउँदा पनि नेपाल एयरलाइन्सबाट हङकङ पुगेका यात्रुमा कोरोना देखिएको भनिएको थियो। यात्रुमा कोरोना संक्रमणको कारण देखाएर नेपाल एयरलाइन्सको हङकङ उडान नखुलेका अवस्थामा विदेशी एयरलाइन्सलाई फाइदा पुग्ने गरी सेटिङ भएको पाइएको छ।

संकटको मौकामा कोरोना संक्रमित यात्रु ल्याएको बहाना पारेर नेपाल एयरालाइन्सको व्यापारमा असर पर्ने गरी गेटजेट एयरलाइन्सलाई हङकङ–काठमाडौं–हङकङ, सारजा–काठमाडौं–हङकङ र हङकङ–काठमाडौं–सारजाका लागि चार्टर उडान गर्न दिइएको अनुमतिपत्र नेपाल लाइभले प्राप्त गरेका छ। नेपाल नागरिक उड्डयन प्राधिकरण, विमानस्थल कार्यालयले २७ अक्टोबरमा दिएको कार्गो उडानको अनुमतिपत्र नेपाललाइभले प्राप्त गरेका हो।

विमानस्थल स्रोतका अनुसार यसअघि पनि गेटजेट एयरलाइन्स १७, १८ र २१ अक्टोबरमा काठमाडौं आएको थियो। उक्त समयमा गेटजेटले हङकङ–काठमाडौं–हङकङ उडान गरेको विमानस्थल कार्यालयका प्रवक्ता देवचन्द्रलाल कर्णले बताए।

गेटजेट एयरलाइन्सले हङकङ–काठमाडौं–सारजा र सारजा–काठमाडौं–हङकङ उडान गरेको विषयमा भने आफूहरूलाई जानकारी नभएको कर्ण बताउँछन्। तर, विमानस्थल कार्यालयले पछिल्लाे पटक दिएको कार्गो उडान अनुमतिपत्रमा सारजा–काठमाडौं–हङकङ, हङकङ–काठमाडौं–हङकङ र हङकङ–काठमाडौं–सारजा उल्लेख गरिएको छ।

गेटजेट एयरलाइन्सले चार्टर उडानका नाममा नेपाल एयरलाइन्सको हङकङ उडानको व्यापार खोसेको २० दिनभन्दा बढी भइसकेको छ। नेपाल एयरलाइन्सको उडान बन्द हुने र विदेशी एयरलाइन्सले काठमाडौंलाई नै बेस बनाएर चार्टर उडान गरिरहेको विषयमा प्रश्न गर्दा भने सरकारी निकाय भने मौन छन्। नेपाल एयरलाइन्सको व्यापार खोसेर विदेशीलाई दिने काममा सेटिङ भएको प्राधिकरणकै कर्मचारीहरूको भनाइ छ।

नेपाल एयरलाइन्सले हङकङ उडानमा कार्गोमा समान बोकिरहेका थियो। नेपाल एयरलाइन्सले सातामा ५ वटा उडानमा कार्गो उडान भर्दै आएको थियो। तर, उडान बन्द भएसँगै गेटजेट एयरलाइन्सले अहिले चार्टर उडान गरिरहेको हो।

यस विषयमा नेपाल नागरिक उड्डयन प्राधिकरणका उच्च पदस्थ कर्मचारीलाई सोध्दा यो विमानस्थल कार्यालयको भएको र उताबाटै चार्टर उडान अनुमति दिइएको हुने सक्ने बताए। प्राधिकरणका उच्च पदस्थ कर्मचारीले भनेको जस्तै गेटजेट एयरलाइन्सलाई कार्गो उडान अनुमति विमानस्थल कार्यालयले नै दिएको पनि देखिएको छ।

प्राधिकरण उच्च पदस्थ कर्मचारीको जवाफपछि हामीले विमानस्थल कार्यालयका प्रमुख देवेन्द्र केसीलाई गेटजेटले पाएको चार्टर उडान अनुमतिका विषयमा जिज्ञासा राखेका थियौं। तर उनले सो विषयमा आफूलाई थाहा नभएको जवाफ दिएर पन्छिए।

केसीले चार्टर उडानमा हेडअफिस (नेपाल नागरिक उड्डयन प्राधिकरण)ले क–कसलाई दिएको हुन्छ सबै आफूहरूलाई थाहा नहुने दाबी गरे। साथै उनले विमानस्थल कार्यालयका प्रवक्तासँग सूचना लिन पनि सुझाव दिए।

त्यसपछि हामीले विमानस्थल प्रवक्ता देवचन्द्र लाल कर्णसँग सम्पर्क गर्दा उनले गेटजेट एयरलाइन्सले हङकङ–काठमाडौं–हङकङ उडान गर्दै आएको बताए।

तर, गेटजेटले भने २० दिनदेखि हङकङ–काठमाडौं र काठमाडौं–सारजा (दबुई) कार्गो उडान गरिरहेको विमानस्थल टावरले जनाएको छ। टावर स्रोतले भन्यो, ‘गेटजेटको उडान अनुमतिमा सेटिङ भएको छ। नेपाल एयरलाइन्सको हङकङ उडान बन्द गराएर केही व्यक्तिले चार्टर उडानको नाममा हङकङ–काठमाडौं र काठमाडौं–सारजा कार्गो उडान गरिरहेका सत्य हो। माथिको निर्देशन बमोजिम हामीले त उडान आनुमति पाएका जहाजहरूका लागि उडान गर्न दिने मात्र हो।’

विमानस्थल कार्यालयका अनुसार अहिले गेटजेटले काठमाडौंलाई ने बेस बनाएर कार्गो उडान गरिरहेको छ। गेटजेटले हङकङ–काठमाडौं, काठमाडौं–सारजा, सारजा– काठमाडौं र काठमाडौं–हङकङ उडान गरिरहेको छ। जसका कारण नेपाल एयरलाइन्सको व्यापारमा सिधै असर परेको छ। गेटजेटको चार्टर पार्टीको विषयमा न त प्राधिरणले सूचना दिएको छ न त विमानस्थल कार्यालयले नै। सबै निकाय अहिले आफूहरूलाई थाहा नभएको भन्दै पन्छिएका छन्।

गेटजेट एयरलाइन्सको चार्टर उडानका लागि नेपाली एजेन्ट भने नेपाल एभिएसन रहेको छ। एभिएसन नेपाल फाउन्डर पर्यटन व्यवसायी विक्रम पाँडेकाजी हुन्। उनको कम्पनीसँग गेटजेटले कसरी अहिले उडान गरिरहेको हो भनेर प्रश्न गर्दा कम्पनीका प्रतिनिधिहरुले आफूहरु बिदामा रहेकाले कुनै जानकारी नभएको जवाफ दिए।