काठमाडौं- स्पेनिस फुटबल क्लब बार्सिलोनाका कप्तान लियोनल मेस्सीको खेल यो सिजन सोचेजस्तो भइरहेको छैन। गोलमा बढ्ने मेस्सीको पुरानो शैली हराइरहे जस्तो देखिन्छ। ला लिगामा पछिल्ला सेभिया र गेटाफेसँगको खेलमा पनि मेस्सी पहिले जस्तो देखिएनन्।
गएको सिजन सकिएपछि मेस्सी बार्सिलोना छाड्ने तयारीमा लागेका थिए। तर क्लबले उनको महँगो रिलिज क्लज देखाएर बाहिरिने बाटो बन्द गरिदियो, जसले उनी एक सिजन बार्सिलोनामा रहन बाध्य देखिए। जस्तो परिस्थितिहरु आएको भए पनि आफू सम्पूर्ण रुपले खेलमा ध्यान दिने मेस्सीले बताउँदै आइरहेका छन्।
नयाँ सिजन च्याम्पियन्स लिगको पहिलो खेलमा फेरेन्सभारोसी टिसीसँग बार्सिलोनाले मंगलबार राति पौने १ बजे प्रतिस्पर्धा गर्दैछ। जसमा मुख्य ध्यान लियोनल मेस्सीमाथि नै हुनेछ। यो सिजन अहिलेसम्म एक गोल मात्र गरेका मेस्सीले मैदानमा के गर्नेछन् भन्ने विशेष चासो सधैँ रहन्छ नै।
अहिले ३३ वर्षको उमेरमा मेस्सीसँग पुरानै खेलको अपेक्षा गरिरहनु त धेरै उपयुक्त नहोला तर उनले अहिले जति गरिरहेका छन् त्यो भन्दा राम्रो गर्ने ठाउँ भने देखिन्छ नै। गएको सिजन सबै प्रतिस्पर्धामा गरेर मेस्सीले ३१ गोल गरेका थिए। अन्य खेलाडीसँगको तुलनामा मेस्सीको गएको सिजन उत्कृष्ट नै हो, तर उनीसँग अपेक्षा त्योभन्दा बढी रहन्छ।
गएको सिजन ला लिगामा सर्वाधिक गोलकर्ता मेस्सीले २५ गोल गरेका थिए। जुन पछिल्लो दशकमा नै मेस्सीको कमजोर गोल आँकडामा देखिन्छ। गएको सिजन ला लिगामा मेस्सीले गरेका २१ असिस्ट भने कीतिमानि रह्यो।
ला लिगामा गएको सिजन ३३ खेल खेलेका मेस्सीले १७ खेलमा मात्र गोल गरेका थिए। अझ गएको सिजन उनले च्याम्पियन्स लिगमा ३ गोल मात्र गर्न सकेका थिए, जुन पछिल्ला १५ वर्षमा नै सबैभन्दा कम हो।
गएको सिजनमा नै कमजोर देखिएको मेस्सीको गोल संख्या यो सिजनमा अझ कमजोर हुने देखिन्छ। अहिले चार खेलमा उनले पेनाल्टीमार्फत एक गोल मात्र गरेका छन्। अहिले उनी ‘प्लेमेकर’ को रुपमा मिडफिल्डमा नै बढी देखिन्छन्। हुन त यो सिजनमा अझ लामो बाटो बाँकी नै छ, त्यसैले मेस्सीले केही गर्ने नै छन् भन्ने आशमा समर्थक रहिरहेकै छन्।
बार्सिलोनामा यसै सिजन आएका नयाँ प्रशिक्षक रोनाल्ड कोम्यानले पनि मेस्सीले अझै राम्रो खेल्नेछन् र गोलमा बढ्नेछन् भन्ने विश्वासमा आफू रहेको बताएका छन्। च्याम्पियन्स लिगमा फेरेन्सभारोसिसँग खेलबारे कुरा गर्दा कोम्यानले भनेका छन्, ‘मेस्सीले खेलमा लगाएको मेहनतमा मेरो कुनै प्रश्न र दुविधा छैन। उनले पूरा मेहनत गरिरहेका छन्। अब अगाडि राम्रो हुनेछ भन्ने आश गरौँ।’
‘अहिलेको भन्दा उनको खेल राम्रो हुन सक्ने ठाउँ देखिन्छ। हरेक दिन सुधार गर्दै गएर राम्रो गर्ने मनस्थिति उनमा पनि देखिन्छ। उनी बार्सिलोना कप्तानका रुपमा राम्रो खेलेर नै अगाडि बढ्न चाहन्छन्’ उनले भनेका छन्।
च्याम्पियन्स लिगमा यो सिजन बार्सिलोना फेरेन्सभारोसि, युभेन्टस र डायनामो किभसँगै समूह जीमा रहेका छ। जसमा क्रिष्टियानो रोनाल्डो र मेस्सीको प्रतिस्पर्धा पुनः देख्न पाउने भन्दै समर्थकका लागि यो सिजन अझ विशेष बनेको छ। पछिल्लो दशकभन्दा बढी नै फुटबलको केन्द्रमा यी दुई खेलाडी देखिइरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
