काठमाडौं- दोस्रो संविधानको चुनावमा केही क्षेत्रको मत परिणाम विशेष चर्चामा रह्यो। तिनैमध्येको एक थियो- सिरहा ५। जहाँ विघटित संविधानसभाको सबैभन्दा ठूलो दलका अध्यक्ष पुष्पकमल दाहाल प्रचण्ड पनि उम्मेवार भएका थिए। उनीसँग प्रतिस्पर्धामा थिए- एमालेका लीलानाथ श्रेष्ठ।
त्यतिबेला दुई स्थानबाट उम्मेदवार रहेका प्रचण्ड काठमाडौं १० बाट भने पराजित भइसकेका थिए। सिरहामा पनि प्रारम्भिक मतगणनामा उनी पराजित हुने संकेत देखिएको थियो। तर, अन्तिमतिर मतगणनामा अवरोध भयो। त्यही बीचमा उनको पक्षमा 'माहोल' बनाइएको आरोप लाग्दै आएको छ।
चुनावमा प्रचण्डले १५ हजार २ सय ४४ मत प्राप्त गरी विजयी भए भने श्रेष्ठले १४ हजार ३ सय २३ पाए।
नेपाल लाइभसँगको एउटा अन्तर्वार्तामा श्रेष्ठले भनेका थिए- ०७० सालको चुनावमा के भएको हो सबै तपाईंहरुलाई थाहै छ। जनताले मलाई भोट दिएकै हो। तर, के भएको र के नभएको तपाईंहरुलाई थाहा छ। ... ०७० सालको चुनावमा सिरहा–५ का जनताले मलाई मत दिएर माया गर्नुभएको थियो, त्यसमा दुई मत छैन।
प्रचण्डसँग हारे पनि श्रेष्ठ चर्चामा रहे। प्रचण्डलाई जिताउन उनलाई 'बलीको बोको' बनाइएको विश्लेषण त्यतिबेला खुबै भएका थिए।
उनै श्रेष्ठ २०७० सालको प्रतिनिधिसभाको चुनावमा सिरहा ३ बाट तत्कालीन माओवादीकै सहयोगमा विजयी भए। उनले २३ हजार २ सय ७२ मत ल्याएका थिए भने निकटतम प्रतिद्वन्द्वी संघीय समाजवादी फोरम नेपालका अशेश्वर यादवले २१ हजार २ सय २० मत पाएका थिए।
श्रेष्ठले बुधबार भएको मन्त्रिपरिषद् पुनर्गठनमा अवसर पाएका छन्। उनलाई महिला, बालबालिका तथा ज्येष्ठ नागरिक मन्त्रालयको जिम्मेवारी दिइएको छ। त्यसअघि यो मन्त्रालय पार्वत गुरुङले सम्हालेका थिए। गुरुङ अब सञ्चार तथा सूचना प्रविधि मन्त्री बनाइएका छन्।
श्रेष्ठ पहिलोपटक मन्त्री भएका हुन्। सिरहाको गोलबजार नगरपालिकाका उनी २०५४ सालको स्थानीय तहको निर्वाचनमा तत्कालीन सिरहा जिल्ला विकास समितिको उपसभापति भएका थिए। क्रमश उनी एमालेको सिरहा अध्यक्ष भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782224905-1782225890.jpeg)
-1764146706.png)
