अर्थ समाचार

म्याद गुज्रिएका खाद्यवस्तु ‘रिलेबलिङ’मा विशाल ग्रुपको संलग्नता, ८ जना प्रहरीको नियन्त्रणमा

नेपाल लाइभ शुक्रबार, असोज १६, २०७७ ११:४४

काठमाडौं–म्याद गुज्रिएका खाद्यवस्तुको अवैध ‘रिलेबलिङ’ (नयाँ स्टीकर लगाउने कार्य) मा विशाल ग्रुपको संलग्नता देखिएको छ। बजारबाट म्याद गुज्रिएको स्निकर, चकलेट, ओरियो बिस्कुट, आलुचिप्स, टेंगो जुसलगायत वस्तु उठाउने र त्यसको रिलेबलिङ गर्ने अवैध कार्यमा विशाल ग्रुपको संलग्नता देखिएको हो।

वाणिज्य, आपूर्ति तथा उपभोक्ता संरक्षण विभाग, नेपाल प्रहरीको केन्द्रीय अनुसन्धान ब्युरो (सिआईबी) र महानगरीय प्रहरी अपराध महाशाखाले काठमाडौंको कलंकीस्थित ३ घरमा छापा मारेको थियो। यसरी वस्तुको रिलेबलिङ गर्ने कम्पनीहरु आयान डिस्ट्रिब्युटर र अमेजन डिस्टिब्युटर छन्। यी दुवै कम्पनीले विशाल ग्रुपले बिक्री वितरण गर्दै आएका वस्तुको म्याद सकिएपछि बजारबाट त्यस्ता वस्तु उठाउने र नयाँ स्टिकर लगाई फेरि बजारमा पठाउने गरेको देखिएको छ।

यो पनि पढ्नुहोस्

कलंकीको एक घरभर म्याद गुज्रिएका सामान, नयाँ स्टिकर लगाएर बजार पठाउने गरेको खुलासाबिहीबार, असोज १५, २०७७

विभागका अनुसार आयान डिस्ट्रिब्युटरले प्रयोग गर्दै आएका २ घर र अमेजन डिस्ट्रिब्युटरको १ घरमा शिलबन्दी गरिएको छ। ती घरमा चकलेट, बिस्कुट, आलुचिप्सलगायत वस्तुमा पुरानो स्टिकर मेटाउने र नयाँ स्टिकर प्रिन्ट गर्नका लागि प्रयोग हुने मेसिनसहित घरभरि नै म्याद गुज्रिएका वस्तु भेटिएको छ।

त्यस्तै ३ वटा गाडी र ८ जना व्यक्तिलाई सिआईबीले नियन्त्रणमा लिएको पनि विभागले जनाएको छ। विभाग उच्च श्रोतका अनुसार आयान डिस्ट्रिब्युटर र अमेजन डिस्ट्रिब्युटरको सोझो सम्बन्ध विशाल ग्रुपसँग देखिएको छ। ‘विशाल ग्रुपकै मालवस्तुहरुमा रिलेबलिङ गर्ने गरेको देखियो। अरु कम्पनीले बेच्ने सामान त्यहाँ नहुनुले पनि हामीले अनुसन्धानको दायरालाई थप बढाउनुपर्ने र मुख्य व्यक्तिसम्म पुग्नुपर्ने देखियो,’विभाग श्रोतले नेपाल लाइभसँग भन्यो।

यो विषयलाई सिआईबीले पत्ता लगाएर बिहीबार वाणिज्य विभागको सहयोगमा कलंकीका ३ घरमा शिलबन्दी गरेको थियो। अहिले पनि अनुसन्धान टुंगिनसकेकाले थप व्यक्ति र कम्पनीको संलग्नता बारे खुलाउन नसकिने विभागको भनाइ छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

काठमाडौं महानगरका ४९७ पसल अनुगमन गर्दा २० वटामात्रै मापदण्ड अनुसारका

लगानी जुटेसँगै मनाङ मर्स्याङ्दी जलविद्युत् आयोजना निर्माण सुरु

केन्द्रीय बैङ्कको अध्ययनः गण्डकीमा कृषि भूमि घट्यो