डडेल्धुरा- डडेल्धुराको अजयमेरु गाउँपालिकाअन्तर्गतका सामुदायिक तथा निजी विद्यालयहरु खुलेका छन्। गाउँपालिकामा रहेका सबै विद्यालय खुलेसँगै आइतबारबाट पठनपाठन सुरु गरिएको हो।
अजयमेरुका ३० वटा सामुदायिक विद्यालयहरु र २ वटा निजी विद्यालय गरी ३२ वटा विद्यालयहरुले सामाजिक दूरी कायम गरी स्वस्थ्य सतर्कता अपनाउँदै पठनपाठन सुरु गरेको गाउँपालिका शिक्षा शाखा प्रमुख हरिप्रसाद पन्तले जानकारी दिए।
‘नेपाल सरकार शिक्षा तथा प्रविधि मन्त्रालयको भदौ १९ मा मन्त्रीस्तारीय बैठकवाट पारित निर्णयअनुसार विद्यार्थी सिकाई सहजीकरण निर्देशिकाको दफा ३३ को उपदफा २ लाई आधार मानेर विद्यालयहरुमा पठनपाठन सुरु गरेका हौं’ उनले भने।
दुई पटक अभिभावकहरुसँग छलफल गरी सहमति र सहयोगमा विद्यालय संचालन गरेको भद्रपुर माध्यामिक विद्यालय भद्रपुरका प्रध्यानाध्यापक हेमराज पाण्डेयले बताए।
प्रध्यानाध्यापक पाण्डेयका अनुसार विद्यालय संचालन भएको पहिलो दिनमा विद्यार्थीहरुलाई कोभिड–१९ का विषयमा स्वास्थ्य संस्थाका कर्मचारीहरुमार्फत् जानकारी गराइएको छ। पठन पाठनका लागि आउने विद्यार्थीहरुलाई विद्यालयको गेटमा पुग्ने बित्तिकै साबुन पानीले हात हुन लगाउने, एउटा बेन्चमा दुई जना राख्ने राख्ने गरिएको छ भने अभिभावकहरुले विद्यार्थीहरुका लागि आवश्यक पर्ने खाजा तथा पानि घरघरबाटै पठाउनुपर्ने व्यवस्था गरिएको छ।
२० जनाभन्दा कम विद्यार्थी रहेका कक्षामा नियमित पठनपाठन हुने र २० भन्दामाथि विद्यार्थी भएको कक्षालाई दुई सिफ्टमा विभाजन गरी पठनपाठन सुरु गरिएको सहश्रलिङ माध्यामिक विद्यालयका प्रध्यानाध्यापक रणबहादुर ऐरले बताए।
‘कक्षा दशमा ८० जना विद्यार्थीहरु रहेकाले ४ सिफ्ट बनाएका छौँ’, उनले भने, ‘२० जनालाई विद्यार्थीहरुलाई एक दिन र २० जना अर्को दिन बोलाएर पठनपाठन गर्ने व्यवस्था गरेको र विद्यार्थीहरुलाई अनिवार्य मास्क प्रयोग गराएर विद्यालय पठाउन अभिभावकहरुलाई अनुरोध गरेका छौँ।’
अजयमेरुका सबै समुदायमा अनलाईनबाट पठनपाठन गराउन सम्भव नभएको र सबै अभिभावकहरुसंग इन्टरनेट प्रयोग गर्ने क्षमता नभएकाले सामाजिक सुरक्षा सतर्कता अपनाएर विद्यालय संचालन गर्ने निर्णय गरेको अजयमेरु गाउपालिका अध्यक्ष उमेशप्रसाद भट्टले बताए।
विगतका दिनमा क्वारेन्टाइन बनाइएका विद्यालय भवनका कक्षाकोठा पूर्णरुपमा सेनेटाइज गरी पठनपाठन कार्य सुचारु गरिएको शिक्षक बताउँछन्। हालका लागि विद्यालयको चौरमा समाजिक दूरी कायम गरी पठनकार्य गराइरहेको अमयमेरु १ मा रहेको बालकल्याण माविका प्रधानाध्यापक जगदिशसिंह भण्डारीले बताए।
कृषिधारको प्राविधिक शिक्षाको समेत पढाइ हुने बालकल्याणमा बाहिर जिल्लाबाट पनि विधार्थी पढ्न आउँछन्। अन्य विधालयभन्दा सो विद्यालयमा जोखिम बढी भएपनि सुरक्षाका सम्पूर्ण मापदण्ड पूरा गरेर मात्रै विद्यालय खोलिएको प्रअ भण्डारीले बताए। बाहिरबाट आउने विद्यार्थीका लागि होस्टेलको व्यवस्थापन गरिएको उनले जानकारी दिए।
जिल्लाका अरु स्थानीय तहमा पनि विद्यालय खोल्नका लागि छलफल भइरहेको छ। स्थानीयस्तरमा कोरोना महामारीको संक्रमणताको जोखिमलाई हेरी नियमित विद्यालय संचालन गर्नका लागि छलफल अगाडि बढाइएको जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
